Colosenses 3 - Kashibo-Kakataibo Biblia

II. AXA JESUCRISTOMI CATAMËCË UNICAMAX CA ËSAI ꞌITI ꞌICË QUICË BANA (3.1-4.6)

¹ Cristonan ꞌaish camina mitsux axa bamax baísquicësaribi ꞌain. Usa ꞌain camina ax, asaribi cushiira ꞌaish aín Papa mëqueu tsócë, ax cuëëncësabi oi ꞌitishi sinánti ꞌain.

² Camina ënë menu ꞌicë ñuishi sinánquinma Cristo cuëëncësa oishi ꞌiti sinánti ꞌain.

³ Mitsun ꞌucha cupía Cristo bama ꞌain camina ꞌuchatëcëntimoi abë bamacësa ꞌain. Usa ꞌaish camina axa baísquitancëx abë ꞌain, mitsúxribi aín Papabë ꞌain, mitsux Cristobë ꞌaish.

⁴ Cristo, anun nux tsóti, axa upíira ꞌianan cushiira ꞌaish utëcëncëbë camina nëtë́timoi abë ꞌianan asaribi upíshi ꞌiti ꞌain.

Bëráma ꞌacësa oquin ñu ꞌaisama ꞌatëcëntima bana

⁵ Usa ꞌain camina bërámami ꞌacansa oquin Nucën Papa Diosnanma unicaman ꞌacësa oquin ënë menu ꞌicë ñuishi ꞌati sinántëcëntima ꞌain. Unix ca aín xanuma ꞌaínbi bëtsi xanubë ꞌitima ꞌicën. Usaribiti ca xanu aín bënëma ꞌaínbi bëtsi unibë ꞌitima ꞌicën. ꞌImainun ca uni xanúxmabi bëtsi unibë ꞌitima ꞌicën. ꞌImainun camina ñunshinacëquin ꞌatima ñu ꞌati cuëëntima ꞌain. Camina ñuñu ꞌitishi sinántima ꞌain. Ñuñu ꞌitishi cuëëncë unix ca Nucën Papa Dios rabima, a cuëëncë ñuishi rabicësa ꞌicën.

⁶ Usai ꞌiia, ax cuëëncësabi oi ꞌiisama tancë unicama ca Nucën Papa Diosan uisa cara oti ꞌicë usoquin castícanti ꞌicën.

⁷ Jesucristo ꞌunáncëma pain ꞌixun camina mitsúnribi usa ñucama ꞌacën.

⁸ Usa ꞌain camina bëráma ꞌá ꞌixunbi ënë ñucamaribi ënti ꞌain: Bëtsi unibë nishánanti, ꞌimainun bënëtishi nishti, ꞌimainun bëtsi unibë ꞌatimonanti, ꞌimainun bëtsi unimi ꞌatimati banati.

⁹ Acama ëanan camina bëráma ꞌatimaquin sinan ꞌixunbi bërí Cristonën sináncësa oquinshi sináncanin. Usa ꞌaish camina cëmëi paranántima ꞌain.

¹⁰ Mitsun bëtsi oquin sinánquin camina Cristonën sináncësa oquin sinánti ꞌain. Usai ꞌiquinmi a upí oquin ꞌunánun ca an unio ꞌixun Nucën Papa Diosan mitsu ꞌimia.

¹¹ Judíosma unicama ꞌimainun judíos unicama, ꞌunántioracacë unicama ꞌimainun ꞌunántioracacëma unicama, bëtsi menu ꞌicë unicama ꞌimainun raëcëma unicama, an uni ñu mëëxuncë unicama ꞌimainun an uni ñu mëëxuncëma unicama, a unicamaxbi ca Cristonan ꞌaish bëtsibë sënën ꞌicën. A unicamaxbi ca Cristo abë ꞌain Cristonainshi ꞌicën.

¹² ꞌItsaira nuibaquin ca Nucën Papa Diosan ainan ꞌaish an iscëx upí ꞌinun mitsu caísacëxa. Usa ꞌixun camina mitsúnribi bëtsi uni nuibaquin upíoti ꞌain. Usoquin ꞌanan camina —ꞌëx cana bëtsi unisamaira ꞌaish upí ꞌai —quixun sinántima ꞌain, masáquin sinani camina bënëtishi unimi nishtima ꞌain.

¹³ Mimi nishquian unin ꞌatimocëxunbi aribi ꞌatimoíma camina usaquian mi ꞌacë ñucama a manui abë upíshi ꞌiti ꞌain. Nucën ꞌIbu Cristonëan tërë́nxunquin mitsun ꞌuchacama manucësaribi oi camina axa mimi ꞌuchacë uni aín ꞌucha manumi abë upí ꞌiti ꞌain.

¹⁴ Ësai ꞌinux camina bëtsibë nuibananti ꞌain. Bëtsibë nuibanancë ꞌaish camina ꞌitsa ꞌixunbi bëtsin sináncësa oquinshi sinánan ꞌën mitsu cacësabi oi ꞌicanti ꞌain.

¹⁵ Usa ꞌaíshmi ꞌitsa ꞌaíshbi achúshisaishi ꞌaish chuámashirua ꞌinun ca Nucën Papa Diosan mitsu ainan ꞌimiacëxa. Usa ꞌinúan an mitsu ꞌimicëx camina usai ꞌiti ꞌain. Usai ꞌiquin camina cuëënquin a —asábi ca —quixun cati ꞌain.

¹⁶ Bëtsi bana ꞌacësamaira oquin Cristonëxa a ñui quicë bana sinani camina axa quicësa oíshi ꞌicanti ꞌain. ꞌIanan camina a bana upí oquin ꞌunani ꞌunánmianani ꞌësëánani ꞌicanti ꞌain. ꞌIanan camina a rabi Nucën Papa Diosan banan cantanan mitsúnmi ꞌacë bananribi a rabi cantati ꞌain. Camina Nucën Papa Dios min nuitu mëu sinánquin —asábi ca —cai cantati ꞌain.

¹⁷ Uisa ñu caramina ꞌain, a upí oquin ꞌanan camina banairibi upiti banaquin mitsux Nucën ꞌIbu Jesúsnan ꞌixun a ꞌaxuncësa oquin ꞌati ꞌain. ꞌAnan camina Cristonan ꞌixun Nucën Papa Dios —asábi ca —cati ꞌain.

Cristonën unix ca bëtsi unibë ësai ꞌiti ꞌicë quicë bana

¹⁸ Asérabia ax Nucën ꞌIbu Jesucristomi sináncë xanux ca aín bënë́an cacëxun cuati ꞌatimaquin sinanima abë upíshi ꞌiti ꞌicën. Bënëñu xanucama, mitsux camina usai ꞌiti ꞌain.

¹⁹ ꞌImainun camina xanuñu unicama, mitsúnribi mitsun xanu nuibanan, masá sinánquin timatima ꞌain.

²⁰ Papañu tuácama, mitsúnribi camina mitsun papabëtan mitsun titan cacëxun a cuëbíquinma aín bana cuaquin an cacësabi oquin ñu ꞌati ꞌain. Usaími mitsux ꞌia isi ca Nucën ꞌIbu Jesucristo cuëënia.

²¹ Bëchicëñu unicama, mitsun camina min bëchicënëan ꞌatima ñu ꞌaia isquin a ꞌaxunma ꞌanun caquinbi ꞌaisamaira oquin ñu catima ꞌain, usaquinmi cacëxuan masá nuituquin —cana upí oquin ñu ꞌati ꞌunanima —quixun sinánti rabanan.

²² An uni ñu mëëxuncë unicama, mitsúnribi camina an mi ñu mëëmicë unían cacësabi oquin ꞌati ꞌain. ꞌAquin camina axa cuëënun an iscëbëtan upí oquin ꞌanan an iscëxunmabi, ꞌën ꞌIbu Dios ca ënë ñu mëëti ꞌën upí oquin ꞌati cuëënia quixun sinánquin upí oquin ꞌati ꞌain.

²³ Uisa ñu caramina ꞌain, abi camina ꞌaisabi tanquin —unishima ꞌën ꞌIbu Jesucristoribi cana ënë ñu ꞌaxuni —quixun sinánquin upí oquin ꞌati ꞌain.

²⁴ Usaquin ñu ꞌaquin camina ꞌunanin, ax Nucën ꞌIbu ꞌixun ca Cristonën mitsun a ñu mëëxuncë cupí, cuëënmiquin aín nëtënu abë xënibua ꞌaínbi tsónun mitsu biti ꞌicë quixun.

²⁵ Usa ꞌaínbi ca an ꞌaisama ñu ꞌacë uni, a aín ꞌucha cupí uisa cara oti ꞌicë usoquin Nucën Papa Diosan ꞌati ꞌicën. Usa ꞌain ca ꞌapu uni, ꞌimainun ꞌapuma uni, uisa uni cara, acamaxbi ꞌaisama ñu ꞌacë ꞌaish an ñu ꞌacë usaribi oquin castícancë ꞌiti ꞌicën.