Colosenses 2 - Kashibo-Kakataibo Biblia

¹ Ënë ñucama ꞌunánun cana ësoquin mitsu cain: Mitsúnmi ꞌacësaribi oquian Laodiceanu ꞌicë unicama ꞌimainun bëtsi bëtsi ëmanu ꞌicë unicamanribi ꞌë iscëma ꞌixunbi cana mitsu ꞌimainun aturibi sinánquin Nucën Papa Dios ꞌitsaira ñucáxunin.

² Mitsúnmi Cristomi cushicë ꞌaish bëtsibë bëtsibë nuibanani achúshisaishi ꞌianan upí oquin a ꞌunáncëma ꞌixunbi bërí Cristo ꞌunánquin, uisaira oquin cara mitsu ꞌaquinti ꞌicë quixun ꞌunánun, cana mitsu Nucën Papa Dios ñucáxunin.

³ An camabi ñu ꞌunáncë ꞌixun ca ainan cupíshi Cristonën aín unicama ꞌunánmia.

⁴ Cristonan ꞌicëa bëtsi unin paránquin mitsu ꞌatimaquin sinanamiti rabanan cana mitsu ësaquin cain,

⁵ mitsu ꞌura ꞌaíshbi ꞌën sináncënëinshi mitsubë ꞌicësa ꞌaish cana mitsúxmi uisa ñu cara ꞌicëbëbi a ëníma Cristomi catamëti ami cushicë ꞌicë cuati cuëënin.

⁶ Usa ꞌain camina ainan ꞌiisa tania Nucën ꞌIbu Jesucristonën mitsu ainan ꞌimicë cupí axa mitsun ꞌibuira ꞌain, upitiira ami catamëti abë ꞌi ax cuëëncësabi oíshi ꞌiti ꞌain.

⁷ A upí oquin ꞌunánan uisa cara ax ꞌicë quixun ꞌunani camina aín unían mitsu cacësabi oi, ami upiti catamëcanti ꞌain. Usai ꞌiquin camina camabi nëtën Nucën Papa Dios —asábi ca —quixun cati ꞌain.

Cristonan ꞌaísha uni bëtsi ꞌicë quicë bana

⁸ An uni bëtsi bëtsi bana ñuixunquin paráncë unicaman mitsu, Cristomi catamëcë ꞌicëbi, ami manúnun quixun paránti rabanan camina bërúancati ꞌicanin. A unicaman ca Cristo ñuiquinma atúnbi sinánxuan unin ñuicë bana ꞌimainun ënë nëtënu ꞌicë ñu sinánti, a banacamaishi uni ꞌunánmia.

⁹ Cristonëx ca uni ꞌicën, ꞌaíshbi ca uisaira cara Nucën Papa Dios ꞌicë usaribi ꞌicën.

¹⁰ Ax cushiira ꞌixuan an ꞌimicëxma ca ángelcama ꞌimainun ñunshíncamaribi ꞌimainun uisa ñun cushi cara, acamaxbi ñancáishi ꞌiti ꞌicën. Usa ꞌain ca Cristobëmi achúshisa ꞌain, aín cushi anúnmi Nucën Papa Dios cuëëncësabi oquin ꞌati ax mitsubë ꞌicën.

¹¹ Mitsux usai Cristobë achúshisa ꞌaish camina Nucën Papa Diosnan cupí ꞌunántioracacësaribi ꞌain. Judíos unicamaxa chamaratsu ꞌaish ꞌunántiocë usa ꞌaíshmabi camina Cristonënbia mitsun sinan upí ꞌimianan ñu ꞌaisama ꞌati ëmicë ꞌaish, Nucën Papa Diosnan cupí ꞌunántiocësa ꞌain.

¹² Mitsun, Nucën Papa Diosan ca bamacëbi Cristo baísquimiacëxa quixun ꞌunánquin, an ca a cushínbi ꞌë ië́miti ꞌicë quixun ꞌunani camina ax ꞌiásaribiti nashimicë ꞌaish Cristobëbi bamacë acëñun maíncëx abëbi baísquiasa ꞌain.

¹³ Mitsun cuëëncësa oquinshi ñu ꞌaími bamacësa ꞌianan judíos unicamaxa ꞌicësaribiti ꞌunántiorcacëma ꞌaish ainanma ꞌicëbi ca Nucën Papa Diosan a cupíshi mitsun ꞌuchacama tërë́nxunquin Cristobë baísquicësa mitsu ꞌimiaxa.

¹⁴ Usa ꞌixun ca Nucën Papa Diosan nun ꞌuchacama tërë́nxunquin, nun nu Moisésnën cuënëo bana quicësabi oquin ꞌacëma ꞌicëbi Cristo i curúsocënu bama cupí, nun ꞌuchacama sinántëcënuxunma nu tërë́nxuancëxa.

¹⁵ Usonan ca Cristonën i curúsocënu bamaquin uisa ñunshinax cara uisaira cushiñu ꞌicë, abi camabi unían ꞌunánun ñusmoquin cushiñuma ꞌimiacëxa.

Nucën Papa Dios cuëëncësabi oi ꞌiti bana

¹⁶ Atúan ꞌacësaribi oquinmi ñu pianan ñu xëaima ꞌianan camabi nëtë ca bëtsi nëtësaribi ꞌicë quixun sinánan ꞌuxë isícëbëa atux ꞌicësai ꞌima ꞌianan anun tantiti nëtën atux ꞌicësaribiti ꞌiama oquian unin ñuicëxunbi camina tantima ꞌain.

¹⁷ Uisai cara Cristo ucë ꞌain ꞌiti ꞌicë quixuan unin sinánun ca ënë ñucama ꞌiacëxa. Usa ꞌaínbi cananuna Cristo uá ꞌain ainan ꞌixun, uisa caranuna Cristobë ꞌiti ꞌai quixun ꞌunanin.

¹⁸ Atúnbi ca —ꞌëx asama ꞌixun cana Nucën Papa Diosma ángelcamaishi rabiti ꞌai —quixun sinánquin atúnbi sináncë ñu ñui rabíquin unicana bana ñuixunia. Usa ꞌain camina Cristonan ꞌiti ëntin rabanan atúan mitsu ñuixuncë bana a tantima ꞌain.

¹⁹ A unicaman ca ami sináncëma ꞌixun Cristonëan ësaquin aín unicama ꞌimiti a sinanima. An ca aín unicama asaribi upí ꞌinun Nucën Papa Dios cuëëncësabi oquin ꞌimia. Aín mëcën, aín xo, aín imi acamañu ꞌaíshbia uni achúshi ꞌicësaribi oquin ca Cristonën aín unicamaxa ꞌitsa ꞌaíshbi bëtsin sináncësabi oquin sináncë ꞌaish achúshisa ꞌinun ꞌimia.

²⁰ ¿Mitsux ꞌuchatëcënuxma Cristobë bamacësa ꞌaíshbi caramina uisa ꞌaish bërámami unin ñuicë ënë nëtënu ꞌicë ñuishi sinánquin rabicësa ꞌitëcënin?

²¹ Axa usai ꞌicë unicamax ca ësai quia: —Nucën Papa Diosbë upí ꞌinuxun camina bëtsi bëtsi ñu ramántima ꞌain, camina bëtsi bëtsi ñu pitima ꞌain, camina bëtsi bëtsi ñu min mëcënan bitima ꞌain.

²² Usoquian ñuicëxbi ca a ñucama cëñutia, a banacamax ca unían sinánxun ñuicëshi ꞌicën.

²³ —Usaquin ꞌën ñu ꞌacë ax ca asérabi ꞌicë —quixun sinánquin an usashi oquin ñu ꞌacë uni a isquin ca uni itsin sinánti ꞌicën, ax isa asérabi sinánñuira ꞌicë quixun. Usa ꞌaínbi ca usaquin ñu ꞌaíbi aín nuitu usabi upíma ꞌia.