Colosenses 1 - Kashibo-Kakataibo Biblia

Pablonëan Colosasnuax Jesucristomi catamëcë unicama quirica cuënëoxuan

¹ ꞌËx cana Pablo, Nucën Papa Dios cuëëncësabi oquin aín bana uni ñuixunun Jesucristonën caísa ꞌain. Usa ꞌixun cana axribi Jesucristomi sináncë ꞌaísha nucën xucë́nsa ꞌain, Timoteobëtan mitsu quirica buánmin.

² Colosas ëmanuaxmi Cristomi sinani ami catamëti Nucën Papa Diosnan ꞌicë, cana ënë quirica mitsu buánmin. Nucën Papa Diosan mitsu nuibaquin upí oquin sinánxuncëxmi chuámarua bucucanti cana cuëënin.

I. CRISTONËXA CUSHIIRA ꞌAISH UPIIRA ꞌAIN CA ASARIBI AÑU ÑUBI ꞌAIMA ꞌICË QUICË BANA (1.3-2.23) Axa Jesucristomi catamëcë unicama Pablonën Nucën Papa Dios ñucáxuan

³ Mitsu ñucáxuni abë banaquin cananuna nun ꞌacësabi oquin, Nucën ꞌIbu Jesucristonën Papa, ax Nucën Papa Dios ꞌicë, a —asábi ca —quixun cain.

⁴ Usa ꞌixun cananuna Jesucristomi asérabi catamëtími Nucën Papa Diosan unicamabë nuibanania ñuicania cuan.

⁵ Nucën Papa Diosan mëníosabi oi aín nëtënu abë ꞌiti sinani camina usai ꞌicanin. Jesucristomi catamëti aín ꞌuchacama tërë́ncë ꞌaish ca uni ainan ꞌaish xënibua ꞌaínbi Nucën Papa Diosbë ꞌiti ꞌicë quixuan aín unin mitsu ñuixuncëxun camina a bana cuaquin upí oquin ꞌunáncan.

⁶ Nucën Papa Diosan ca usaquin nu nuibatia quixun unin ñuia mitsun cuacë a banabi ca bëtsi bëtsi menu cuanquin ꞌitsaira unin ñuia. Usa ꞌain ca unin ñuia cuatishimi mitsux ꞌicësaribiti camabi menu ꞌicë uni a bana cuati —asérabi ca —quixun sinani Jesucristomi catamëtia.

⁷ A bana ca nun nuibacë Epafrasnën, axribi nubëtan uni bana ñuixuncë ꞌixun nux cuancëbëtanmabi ñuixunquin upí oquin mitsu ꞌunánmiaxa.

⁸ An ca Cristonan ꞌaish camina mitsux bëtsibë bëtsibë nuibanani upitax bucui quixun nu caxa.

⁹ Epafrasnëan mitsu ñuiquin nu cacë bana cuaxun cananuna ënquinma Nucën Papa Dios mitsu ñucáxunin. Uisaími ꞌiti cara Nucën Papa Dios cuëënia, a mitsu ꞌunánminun ñucáxuanan cananuna an aín unicama ꞌunánmiti ñucama mitsu ꞌunánminun a ñucatin.

¹⁰ Mitsux usai ꞌi camina Nucën ꞌIbu Jesucristonan ꞌaísha uni ꞌicësai ꞌiti ꞌain. Usa ꞌaish camina ax cuëëncësabi oquinshi ꞌaquin, uisa ñu cara upí ꞌicë ashi ꞌanan, asérabi mitsun nuitu mëu upí oquin Nucën Papa Dios ꞌunánti ꞌain.

¹¹ ꞌAnan cananuna ax cushiira ꞌixúan, uisa ñu cara ꞌicëbëbi bënëtima cuëënquin tanshinuan mitsu ꞌaquinun quixun a mitsu ñucáxunin.

¹² Usoquin cananuna uisaira oquin cara aín unicama cuëënmiti ꞌicë quixun ꞌunánquinmi mitsun a —asábi ca —canun, Nucën Papa Dios mitsu ñucáxunin.

¹³ Ñu ꞌatima ꞌatishi sinánan nux cuëëncësabi oíshi ꞌiisa taniabi ca Nucën Papa Diosan aín nuibacë Bacë Bëchicënan ꞌinun nu ꞌimiaxa.

¹⁴ Nun ꞌuchacama cupínu abë ꞌitima ꞌicëbi ca aín Bëchicë bamacë cupí Nucën Papa Diosan nun ꞌucha tërë́nquin ainan ꞌinun nu ië́miacëxa.

Cristo bama cupía uni Nucën Papa Diosbë upí ꞌiti

¹⁵ Uinu ꞌicë unínbia Nucën Papa Dios istima ꞌaínbi ca unían uisa cara Nucën Papa Dios ꞌicë quixun ꞌunánun asaribi ꞌaish aín Bëchicë ënë menu uacëxa. Añu ñubi unitisama ꞌain ca axira pain aín Papabë ꞌiacëxa.

¹⁶ Nucën Papa Diosan uniomicëxun ca aín Bëchicënën naínu ꞌicë ñucama ꞌimainun menu ꞌicë ñucamaribi ꞌanan bëtsi bëtsi ñu unin aín bërúnbi iscë ꞌimainun unin iscëma ñucamaribi uniocëxa. Usonan ca ángelcama ꞌimainun uisa cushi cara, acamaribi uniocëxa, ainan ꞌaish ax cuëëncësabi oi ꞌinun.

¹⁷ Ñucama uniocëma pan ꞌaish ca axira pain ꞌiacëxa. ꞌIxun ca uniotancëxun, usabia ꞌinun camabi ñu mëníocëxa.

¹⁸ Cristo axira ca axa ami catamëcë unicaman cushi ꞌaish amiira aín unicama catamëcë ꞌicën. Ësa ca Cristobë aín unicama ꞌicën. Mëcë́nñu, taëñu, xoñu, nuituñuribi ꞌaíshbi ca uni achúshi ꞌicën. Usaribiti cananuna Jesucristonan ꞌaish ꞌaisamaira ꞌaíshbi abë achúshisa ꞌain. Aín unicamaxa usaribiti ꞌiti oi axira pain bamatancëx baísquia ꞌaish ca an unio ñucamabë sënë́nmaira ꞌicën.

¹⁹ Nucën Papa Dios cuëëncësabi oi ca Jesucristo ax asaribi cushiira ꞌianan upíira sinánñu ꞌiacëxa, uni ꞌaíshbi.

²⁰ Aín nuitu ꞌaisama ꞌaísha uni abë upꞌi ꞌitima ꞌaínbi ca Nucën Papa Dios cuëëncësabi oquin Cristonën i curúsocënu bamaquin ënë menu ꞌicë ñucama ꞌimainun naínu ꞌicë ñucamaribi an iscë́xa upí ꞌinun mëníocëxa.

^21-22 Mitsun Nucën Papa Diosmi sináncëma ꞌixun ñu ꞌaisamaishi ꞌacë ꞌaish camina abë upíma ꞌaish ami nishcësa ꞌiacën. Usai ꞌiá ꞌicëbi ca Cristo uni ꞌaish bama cupími abë upí ꞌinun Nucën Papa Diosan mitsu ꞌimiaxa. Mitsúxmi upíira sinánñu ꞌianan ꞌuchañuma ꞌaish Nucën Papa Diosnanshi ꞌinun ca Cristo bamacëxa.

²³ Usa ꞌinuxun camina camabi nëtën Cristomishi catamëcë ꞌixun sinánbëquinquinma ainan ꞌaíshmi aín nëtënu abë ꞌiti ashi manuquinma sinánti ꞌain. Usai ꞌi ca uni asérabi Nucën Papa Diosnan ꞌicë quixunmi cuacë bana ca camabi menuxunribi ñuicania. ꞌËnribi cana unicama a bana ñuixunin.

Nucën Papa Diosan Pablo axa Jesucristomi catamëcë unicama aín bana ñuixunun ꞌimia

²⁴ Mitsux ainan ꞌinun ꞌëx tëmëracë cupí cana cuëënin. Usai ꞌi cana Cristonëan camabi uni ainan ꞌinun tëmëra ꞌain, ꞌëxribi camabi menu ꞌicë unicama a ꞌunánti cupí tëmëraíbi cuëëinra cuëënin.

²⁵ Aín unicamabëtanmi mitsúnribi upí oquin aín banacama cuanun a bana ñuixunun ca Nucën Papa Diosan ꞌë ꞌimiacëxa.

²⁶ Uínsaran nëtë́nbi uinu ꞌicë unínbi a bana ꞌunánma ꞌicëbi ca bërí aín unicama, an iscë́xa upí ꞌicë, Nucën Papa Diosan ꞌunánmia.

²⁷ Uisaira upí cara a bana ꞌicë quixun ca Nucën Papa Diosan aín unicama ꞌunánmisa tancëxa. A banax ca judíosma unicamananribi ꞌicën. A banax ca ësai quia, Cristo ax ca mitsubë ꞌicën. Axa mitsubë ꞌain camina aín nëtënuribi abë ꞌiti ꞌain.

²⁸ Nun cananuna Cristo ashi ñuiquin aín unicama ñuixunin. Ñuixunquin cananuna aín unicaman upí oquin cuanan, Cristonan ꞌaish ax cuëëncësabi oíshi ꞌinun quixun upí oquin ꞌësëquin, aín unicama ꞌunánmin.

²⁹ Usaía aín unicama ꞌinun quixun cana Cristonën ꞌë cushiocëxun ënquinma aín bana ñuixunin.