Apocalipsis 9 - Kashibo-Kakataibo Biblia

¹ Usai ꞌicëbëtan ca bëtsi ángelnënribi aín manë banañu banoxa. Banocëbëtan cana naínuaxa ꞌispa achúshi menu nipacëcë isan. Nucën Papa Diosan ꞌináncëxun ca anun quini chaira ꞌaish nëmínra xëocati ñu bixun tuíanxa.

² A tuíncë ñu anun ca quini chaira ꞌaish nëmínra a xëocaxa. Xëocacëx ca anuax tsin cuin chiquíaxa, manë tsi rëquirucë aín cuin chiquícësaribi ꞌinun. Chiquíquin a cuinan mapucëx ca bari bëánquicësa ꞌiaxa.

³ A tsin cuínuax ca ꞌaisamaira chanpusaribi ñu chiquíaxa, mecamanu cuanux. Nucën Papa Diosan ꞌimicëx ca a chanpucaman paëx, nibantan paësaribi ꞌiaxa.

⁴ Tsin cuínuax chiquitia ca Nucën Papa Diosan a chanpucama caxa: Menu ꞌicë basi, imaxu, chucu, ro, i acama camina ꞌatimotima ꞌain. A ꞌaquinma camina, ax ca ꞌënan ꞌicë quixun ꞌunánun aín bëmánanu ꞌën anë ꞌaquin ꞌunántiocëma uni acama cuni ꞌatimoti ꞌain.

⁵ Mëcën achúshi ꞌuxë́an paë tanun ꞌaquinbi camina a unicama bamamitima ꞌain. Usoquian cacëxun ꞌacëx ca aín paëx nibantan uni ꞌacëxuan paëocësa usaribi ꞌiaxa.

⁶ Usaía ꞌimainun ca a ꞌacë unicamax axbi bamatisa taníbi bamatima ꞌicën. Asérabi cana bamatisa tani quibi ca ꞌaisamaira oquin paë taníbi bamatima ꞌicën.

⁷ A chanpucamax ca anúan ꞌacánani suntáru cuancë caballo usaribi ꞌiaxa. Aín maxcánu ca curi mañuti ꞌacësa ꞌiaxa. ꞌImainun ca aín bëmánan unin bëmánansa ꞌiaxa.

⁸ Aín bux ca xanun busa ꞌiaxa, aín xëtax ca ꞌinúanën xëtasa ꞌiaxa.

⁹ Aín namicamax ca manë chupan rabumëcësa ꞌiaxa. ꞌIanan ca aín pëchi banamiaxa. Nuánquianquin ca ꞌaisamaira autua an niquincë caballonën ꞌacánani cuanquin buancë́xa banacësaribi oquin aín pëchi banamiaxa.

¹⁰ A chanpucaman tsispin ca nibanta inasaribi ꞌiaxa. Ax ca anúan mëcën achúshi ꞌuxën uni paë tanmiti ꞌiaxa.

¹¹ A chanpucaman ꞌapu ax ca quini chaira ꞌaish nëmíinra anu ꞌicë ñunshíncaman cushi ꞌiaxa. A ñunshinan anëx ca hebreo banan cacë Abadón ꞌicën, griego banan cacë ca Apolión ꞌicën.

¹² Usaquin ca rabë́ ꞌimainun rabë́ ángelnëan aín manë banañu banocëbëtan bëtsi ángelnënribi aín manë banañu banocëbëtan chanpun pain ꞌaisamaira oquin unicaman paë tanmiaxa. Usaquian ꞌacëbëtanbi ca rabë́ ángelnën aín manë banañu unicama paë tanun banocëma pan ꞌicën.

¹³ Banoíma ꞌixun ca a rabë́ ángel achúshinën aín manë banañu banoxa. Banocëbëtan cana anua Nucën Papa Dios ꞌicë a bëmánon ꞌicë anuxun sanutanun tsëpasa ñu nëënti, curi ꞌacë, aín cuëbícamanu i, vaca matúxcasa ꞌitánun ꞌacë, rabë́ ꞌimainun rabë́, anuaxa banaia cuan.

¹⁴ Banaquin an bërí manë banañu banocë ángel a caía, ësai quia cana cuan: —Camina Eufrates cacë baca rapasunuxuan nëacë rabë́ ꞌimainun rabë́ ángel a tubuxun ënti ꞌain.

¹⁵ A rabë́ ꞌimainun rabë́ ángelcama Eufrates baca rapasunuxuan nëacë, ax ca anúan camabi unicama rabë ꞌimainun achúshi oquin tëacësa ꞌaíshbi amo ꞌicë achúshi acama ꞌati nëtë utámainun nëacë ꞌiaxa. Usa ꞌain ca anuxun sanutanun tsëpasa ñu nëënti anuaxa banaia a cuaxun, manë banañu tuíncë ángel an nëacë ángelcama tubuxun ëanxa. Usaquin ca a baritia, a ꞌuxë, a nëtë, a horabi ca unia ꞌanun ëncë ꞌiti ꞌicë quixuan Nucën Papa Diosan mëníosabi oquin ꞌaxa.

¹⁶ A rabë́ ꞌimainun rabë́ ángelcama aín suntárucamax ca ꞌaisamaira caballonu tsócë ꞌiaxa. Acamax ca ꞌaisamaira ꞌaish doscientos millones ꞌicë quiáxa quia cana cuan.

¹⁷ ꞌËn iscëx ca a caballocama ësa ꞌiaxa: anu tsócë suntárucaman manë chupa atun shicánu ꞌicë ax ca tsi rëquirucësa ꞌianan cuman batsisa ꞌaíshbi tunántani ꞌianan curúnsa ꞌiaxa. A caballocaman maxcatax ca ꞌinúanën maxcása ꞌiaxa. Aín cuëbínuax ca tsi rëquirucë ꞌimainun tsin cuin ꞌimainun azufre cacë ñu nëëmëti chiquíaxa.

¹⁸ Caballonën cuëbínuax chiquícë ñucamax chiquíquin ca unicama nëbë́tsi, rabë́ ꞌimainun achúshi oquin tëacësa ꞌaíshbi amo ꞌicë achúshi cëñuaxa.

¹⁹ A caballocaman inax ca maxcáñu ꞌaish runusa ꞌiaxa. Anun ca unicama paë tanmiquin ꞌatimoxa. Usai ꞌiquin ca caballocaman aín cuëbínuax chiquícë ñucama ꞌimainun aín ina runusa, anun unicama ꞌaisamaira oquin ꞌatimoquin cëñuaxa.

²⁰ ꞌAisamaira oquin ꞌatimocëxbia bamacëma unicamax ca sinanaquin, atun ñu ꞌaisama ꞌacëcama ëncëma ꞌiaxa. Ñunshin ꞌatimacama rabianan ca unin ꞌacë ñu, curi ꞌacë ꞌimainun uxua manë ꞌacë ꞌimainun panshían manë ꞌacë ꞌimainun maxax ꞌacë ꞌimainun i ꞌacë, a ñucaman isíma ꞌianan cuatíma ꞌianan nitsíamabi, a rabiquin an ꞌacësabi oquin ñu ꞌatima ꞌati ënquinma ꞌaxa.

²¹ Uni ꞌati, ꞌimainun ñu xëax ñubë́ ꞌiti, ꞌimainun aín xanuma ꞌaínbi xanu itsibë ꞌiti, ꞌimainun aín bënëma ꞌaínbi uni itsibë ꞌiti, ꞌimainun ñu mëcamati, acama sinanaquin ënquinma usabi oquin ꞌaxa.