Apocalipsis 8 - Kashibo-Kakataibo Biblia

¹ Usai a caniacëcë uni quicëbëtan cana Carnero ꞌicësaribitia unin ꞌucha cupí bama, an anun quirica tacáshcacë itsi, ashiquin pëóshia isan. Pëóshcëbë ca banai sharatima nëtë́ishiaxa, media hora ꞌitámainun.

Mëcën achúshi ꞌimainun achúshi anun quirica tacáshcacë ñu pëóshtancëxun ashiquin pëóshtëcëncëbëtan Juanën ñu isa

² Usaía ꞌicëbëtan cana mëcën achúshi ꞌimainun rabë́ ángel Nucën Papa Dios bëmánon nicë isan. Iscëxun ca Nucën Papa Diosan ꞌináncëxun, a ángelcama achúshi achúshinën manë banañu biaxa.

³ Usa ꞌain ca bëtsi ángelribi, aín curi xanpa tuíanx uax, anua Nucën Papa Dios ꞌicë a bëmánon ꞌicë anuxun sanutanun tsëpasa ñu nëënti, curi ꞌacëribi, a rapasu niracëaxa. Usai ꞌia ca aín unicaman a rabianan ñucácë banacamabëa aín cuin tëxë́quianx ꞌirutanuan nëënun Nucën Papa Diosan ꞌitsaira tsëpasa ñu a ángel ꞌinánxa.

⁴ Angelnëan tuíncë xanpa anuax ca sanu cuínbë, aín unicaman a rabianan ñucácë bana, ax anu Nucën Papa Dios ꞌicë anu cuaruaxa.

⁵ Usai ꞌicëbëtan ca ángelnën anuxun sanutanun tsëpasa ñu nëënti, anua tsisu rëquirucë biquin, a xanpanu ꞌaruquin buácatancëxun menu niaxa. Nicëbëa caná mëriti banacëbë ca bëtsi ñuribi sharámainun mecama shaíquiaxa.

Manë banañucama

⁶ Usai ꞌicëbëtan ca a ángelcama mëcën achúshi ꞌimainun rabë́, an aín manë banañu banonuxun mëníoxa.

⁷ Achúshi ángelnën pain ca aín manë banañu banoxa. Banocëbë ca ꞌuí ꞌaíshbi matsiira ꞌaish iru, a ꞌimainun tsi rëquirucë, acamabë imi mëscúcë, acamax meu nicëx rëucüaxa. Rëucucëbë ca ꞌaisamaira ꞌaíshbi mecama nëbë́tsi, rabë́ ꞌimainun achúshi oquin tëacësa ꞌaíshbi amo ꞌicë achúshi nëëmëti nëtë́axa. Icama ꞌimainun basi paxacamaribi nëbë́tsi, rabë ꞌimainun achúshi oquin tëacësa ꞌaíshbi, amo ꞌicë achúshi ca nëëmëaxa.

⁸ Usai ꞌicëbëtan ca bëtsi ángelnënribi aín manë banañu banoxa. Usocëbë ca achúshi ñu chaira aín bashi nëëmë́cësa ꞌicë nicë́xa parúnpapanu nipacëcëbë parúnpapa chaira ꞌaíshbi nëbë́tsi, rabë́ ꞌimainun achúshi oquin tëacësa ꞌaíshbi amo ꞌicë achúshi imisa ꞌiaxa.

⁹ Usai ꞌicëbë ca anu ꞌicë ñuinacama ꞌimainun anu ꞌicë manë nunticamaxribi, ꞌitsa ꞌaíshbi nëbë́tsi, rabë́ ꞌimainun achúshi oquin tëacësa ꞌaíshbi amo ꞌicë achúshi cëñuti nëtë́axa.

¹⁰ Usai ꞌicëbëtan ca bëtsi ángelnënribi aín manë banañu banoxa. Banocëbë ca ꞌispa chaira, bimicëxa taban rëquirucësa ꞌaish naínuax rëquícuaianx nipacëaxa. Usari ꞌi ca bacacamabëa xëxácama ꞌitsa ꞌaíshbi nëbë́tsi, rabë́ ꞌimainun achúshi oquin tëacësa ꞌain, amo ꞌicë achúshinu nipacëaxa.

¹¹ A ꞌispax ca Mucaira caquin anëcë ꞌiaxa. Anu a ꞌispa nipacëcë bacacamabë ca xëxácamaribi mucaxa. Usai ꞌia mucacë cupí ca ꞌaisamaira uni bamaxa.

¹² Usai ꞌicëbëtan ca bëtsi ángelnënribi aín manë banañu banoxa. Banocëbë ca bari, ꞌuxë ꞌimainun ꞌispacamaribi ꞌitsa ꞌaíshbi nëbë́tsi rabë́ ꞌimainun achúshi oquin tëacësa ꞌaíshbi amo ꞌicë achúshi bënamëti pëquicëma ꞌicën. Usa ꞌain ca nëtë ꞌimainun imë́ribi nëbë́tsi rabë ꞌimainun achúshi oquin tëacësa ꞌaíshbi amo ꞌicë achúshi bari, ꞌuxë, ꞌispacaman pëcacëma ꞌiaxa.

¹³ Usacëbëtan istëcënquin cana ángel naínuax nuania isan. Nuania, munuma banai ësai quia cana cuan: —Manë banañu rabë́ ꞌimainun rabë́ banocë ꞌaínbi ca rabë́ ꞌimainun achúshi ángelnënribia banocëbëtan, axa menu bucucë unicaman masócë ꞌixun ꞌaisamaira paë tanti ꞌicën. Achúshi banocëbë tëmëranan ca bëtsi banocëbëribi tëmëranan bëtsiribia banocëbë usaribiti tëmëratëcënti ꞌicën.