Apocalipsis 7 - Kashibo-Kakataibo Biblia

ꞌItsaira judíos unicamax Nucën Papa Diosnan ꞌaish ꞌunántiocë ꞌiá bana

¹ Usaquin istancëxun cana rabë́ ꞌimainun rabë́ ángel isan. Achúshinëx ca aucüaxa bari urucë anu nicë ꞌiaxa. Bëtsix ca ami bari cuabúcë anu nicë ꞌiaxa. Bëtsíxa baca rëbumi ꞌimainun ca bëtsix baca tsipúmi ꞌiaxa. A ángelcaman ca suñun me bëcanan parúnpapa bëcaisama oquin bëaranan iribi bëcaisama oquin bëaraxa.

² Usaquin bëaranan mecamacëñun anu ꞌicë ñucama, ꞌimainun parúnpapacëñun anu ꞌicë ñucamaribi ꞌatimonun ca Nucën Papa Diosan a ángelcama aín cushi ꞌinánxa. Acama istancëxun cana bëtsi ángel aucüaxa bari urucë anuax aia isan. An ca uquin axa bamatimoi tsócë, Nucën Papa Diosan unicama, anun Cristonën anë ꞌimainun Nucën Papa Diosan anë aín bëmánanu cuënëoti ñu bëaxa. Usa ꞌixun ca a ángelnën munuma cuëncëni banaquin rabë́ ꞌimainun rabë́ ángelcama a caxa:

³ —Nun an Nucën Papa Dios quicësabi oquin ꞌacë unicama ꞌunánti oquin atun bëmánancama cuënëocëma pan ꞌain camina mecama ꞌimainun parúnpapacama ꞌimainun icamaribi ꞌatimotima ꞌain.

⁴ Catancëxun ca axa Nucën Papa Diosmi catamëcë unicama ꞌunánti oquin cuënëoxa, uiti cara cuënëocë ꞌicë quixun ꞌën cuanun ca a ángel ësai quiaxa: —A ꞌunánti oquin cuënëocë unicamax ca ꞌaisamaira, ciento cuarenta y cuatro mil (144,000) uni ꞌicën, atux ca Israelnën mëcën rabë́ ꞌimainun rabë́ bëchicëcaman rëbúnqui ꞌicën.

⁵ Doce mil ax ca Judatan rëbúnqui ꞌicën. ꞌImainun ca doce milribi Rubénën rëbúnqui ꞌicën. ꞌImainun ca doce milribi Gadnën rëbúnqui ꞌicën.

⁶ ꞌImainun ca doce mil Asernën rëbúnqui ꞌicën. ꞌImainun ca doce milribi Neftalínën rëbúnqui ꞌicën. ꞌImainun ca doce milribi Manasésnën rëbúnqui ꞌicën.

⁷ ꞌImainun ca doce milribi Simeonën rëbúnqui ꞌicën. ꞌImainun ca doce milribi Levitan rëbúnqui ꞌicën. ꞌImainun ca doce milribi Isacarnën rëbúnqui ꞌicën.

⁸ ꞌImainun ca doce milribi Zabulonën rëbúnqui ꞌicën. ꞌImainun ca doce milribi Josénën rëbúnqui ꞌicën. ꞌImainun ca doce milribi Benjaminën rëbúnqui ꞌicën. Usai ca ꞌën cuanun quiaxa.

ꞌAisamaira unían chupa uxua pañucë

⁹ Usaquin cuatancëxun cana unin tupúntisama, ꞌaisamaira uni isan. Acamax ca camabi menuax ucë ꞌaish bëtsi bëtsi unibu ꞌiaxa. Usa ꞌaish ca bëtsi bëtsi banan bananan anua Nucën Papa Dios, ax ꞌApuira ꞌicë, a ꞌimainun Carnero ꞌicësaribitia unin ꞌucha cupí bama, aín bëmánon sëtë́cë ꞌiaxa. A camáxbi ca aín chupa uxua ꞌianan xëbin pëchisa ñu pëchi tuíncë ꞌiaxa.

¹⁰ Usa ꞌaish ca camáxbi munuma banai quiaxa: Anu ꞌApuira tsóti, axa anu tsócë Nucën Papa Dios, an ca Carnero ꞌicësaribitia unin ꞌucha cupí bama, a cupí nun ꞌuchacama tërë́nquin xënibua ꞌaínbi ainan ꞌinun nu ië́miaxa.

¹¹ A unicamaxa quicëbë ca camabi ángelcaman, anu ꞌApuira tsóti anua Nucën Papa Dios ꞌicë, ꞌimainun mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama, ꞌimainun axa ꞌitsaira bëruñu rabë́ ꞌimainun rabë́ ñu, axribia bamatimoi tsócë, acama nëbë́tsioraxa. Nëbë́tsioraquin ca anua ax ꞌicë anuax rantin puruni, meu bësuquin, Nucën Papa Dios rabiaxa.

¹² Rabiquin ca caxa: Ësai ca ꞌiti ꞌicën. Mix cuëënun ca camabi unicama ꞌimainun ángelcamanribi mi rabiti ꞌicën. Camabi unicaman ꞌApu ꞌianan, camabi ñu ꞌunáncë ꞌicë cananuna —asábi ca —quiquin mi rabin. Min cushix ca chaira ꞌicën. Mixmi cëñútimoi usabi ꞌia cananuna xënibua ꞌaínbi mi rabiti ꞌain. Usaquin cananuna ꞌati ꞌain.

¹³ Nucën Papa Dios rabicëbëtan ca aín anu tsótinu tsócë caniacëcë uni achúshinën ꞌë ñucáxa: —¿An chupa uxua pañucë unicama ënëx cara ui ꞌic? ¿Uinuax cara uax?

¹⁴ Cacëxun cana can: —ꞌËn cana ꞌunaniman. Min camina ꞌunanin. Cacëxun ca ꞌë caxa: —ꞌËnë unicaman ca ami sináncë cupí ꞌaisamaira tëmëraquinbi Nucën Papa Diosmi catamëti ëncëma ꞌicën. Atux ca Carnero ꞌicësaribitia unin ꞌucha cupí aín imi ꞌapati bama, ami catamëti aín ꞌuchacama tërë́ncë ꞌaish aín nuitu upí ꞌaish chucacësa ꞌicën, aín chupa uxuira axa chuañumasa ꞌinun.

¹⁵ Usa ꞌaish ca anua Nucën Papa Dios ꞌicë anubi ꞌicën. Anuxun ca nëtë́nbi, imë́bi rabiquin, ax cuëëncësabi oquin a ñu ꞌaxunia. Usoia ca Nucën Papa Dios ax ꞌApuira ꞌaish cushi ꞌixun, acama ënquinma bërúanti ꞌicën.

^16-17 Carnero ꞌicësaribitia unin ꞌucha cupí bama, ax anua Nucën Papa Dios ꞌicë anu ꞌixun ca acamaxa nëtë́timoi upitax tsónun bërúanti ꞌicën. An ꞌaracacë ñuina aín ꞌibun upí oquin ꞌunpax ꞌamianan bërúancësaribi oquin ca an aín unicama bërúanti ꞌicën. An ca acama chuámarua tani cuëënun ꞌimiti ꞌicën. ꞌImainun ca Nucën Papa Diosanribi atúxa iní masá nuitutia nëtë́miti ꞌicën. Nëtë́mianan ca atúxa bëunan mëscutiabi aín bëun tërë́nti ꞌicën. Usa ꞌain ca anu ꞌicë aín unicamax tëmëratëcënima, ꞌianan ꞌacëñuma ꞌitëcënima, ꞌianan shimatëcënima, ꞌianan bari cushin xarotëcëncëma ꞌianan añu ꞌitsísbi tantëcëntima ꞌicën.