Apocalipsis 6 - Kashibo-Kakataibo Biblia

Mëcën achúshi ꞌimainun rabë́ anúan quirica tacáshcacë ñucama ñuicë bana

¹ Usaquin istancëxun cana Carnero ꞌicësaribitia unin ꞌucha cupí bama, an anúan quirica tacáshcacë mëcën achúshi ꞌimainun rabë́ ñu a achúshi pëóshia isan. Pëóshcëbëtan cana ꞌitsa bëruñu rabë́ ꞌimainun rabë́ ñu, axribia bamatimoi tsócë, acama achúshinëxa caná banacësari munuma banai —ca chiquiti ut —quia cuan.

² Quicëbëtan isquin cana achúshi caballo uxua chiquitia isan. Axa a caballonu tsócë unin ca canti achúshi tuíanxa. Tuíanx uquin Nucën Papa Diosan ꞌináncëxun biquin, ꞌapúan mañucë mañuti mañutancëx ca axa ami nishcë unicama ñusmoi abë ꞌacanani cuanxa.

³ Usai ꞌicëbëtan ca Carnero ꞌicësaribitia unin ꞌucha cupí bama, an anúan quirica tacáshcacë ñu itsi pëóshaxa. Pëóshcëbëtan cana ꞌitsa bëruñu rabë́ ꞌimainun rabë́ ñu, axribia bamatimoi tsócë, acama itsíxa —ca chiquiti ut —quia cuatëcëan.

⁴ Quicëbë ca bëtsi caballo, ushían chëxëira, anuax chiquíaxa. Axa a caballonu tsócë uni an ca bëtsibë bëtsibë ꞌacánani cëñuanánun unicama ꞌiminuan, Nucën Papa Diosan ꞌináncëxun, aín manë masínbu biaxa.

⁵ Usai ꞌicëbëtan ca Carnero ꞌicësaribitia unin ꞌucha cupí bama, an anúan quirica tacáshcacë ñu itsi pëóshaxa. Pëóshcëbëtan cana ꞌitsa bëruñu rabë́ ꞌimainun rabë́ ñu, axribia bamatimoi tsócë, acama itsíxa —ca chiquiti ut —quia cuatëcëan. Cuaquin isquin cana caballo tunan chiquitia isan. ꞌËn iscëxun ca anu tsócë unin, piti ñua ꞌitsairama ꞌain, anun ñu ꞌië tupúnti tuíanxa.

⁶ Isquin cana ꞌitsa bëruñu rabë́ ꞌimainun rabë́ ñu, axribia bamatimoi tsócë, acama nëbë́tsinuaxa banaia cuan, piti ñu cupíira ꞌaían ësai quia: —Achúshi nëtën ñu mëëtancëxun bicë curíquinën camina achúshi kiloishi trigo biti ꞌain. A biquinma camina rabë́ ꞌimainun achúshi kilo cebada biti ꞌain. Usa ꞌaínbi ca i bimin xëni ꞌimainun vinoribi aín cupí usabi ꞌiti ꞌicën.

⁷ Usai ꞌicëbëtan ca Carnero ꞌicësaribitia unin ꞌucha cupí bama, an anúan quirica tacáshcacë ñu itsi pëóshaxa. Pëóshcëbëtan cana ꞌitsa bëruñu rabë́ ꞌimainun rabë́ ñu, axribia bamatimoi tsócë, acama itsíxa —ca chiquiti ut —quia cuatëcëan.

⁸ Cuaquin isquin cana bëtsi caballo, curua, chiquitia isan. Axa anu tsócë uni aín anëx ca Bamati cacë ꞌiaxa. An Bamati cacë uni a nuibiancë, a unix ca Anua Uni Bamacë ꞌIti caquin anëcë a ꞌiaxa. A uni rabë́ ca, ënë menu ꞌicë unicama ꞌaisamaira ꞌaísha nëbë́tsi, rabë́ ꞌimainun rabë́ oquin tëacësa ꞌicëbia amo ꞌicë achúshi cëñunun Nucën Papa Diosan ꞌimiaxa. Usaquin ꞌimicëxun ca a uni rabëtan ꞌacananía ꞌaisamaira uni bamanun ꞌimianan ꞌacëñuma ꞌaísha ꞌaisamaira uni bamanun ꞌimianan ꞌinsinan ꞌaisamaira uni bamanun ꞌimianan axa piánancë ñuinacan picë́xa ꞌaisamaira uni bamanun ꞌimiaxa.

⁹ Usai ꞌicëbëtan ca Carnero ꞌicësaribitia unin ꞌucha cupí bama, an anúan quirica tacáshcacë ñu itsiribi pëóshaxa. Pëóshcëbëtan cana Nucën Papa Diosan bana cuanan, a banax ca asérabi ꞌicë quiax quicë cupí unin ꞌacë́xa bama unicaman ñunshin, anuxun ñuina xaroti bucúncë maxax, a tëmúcüa isan.

¹⁰ A ñunshinax ca munuma banai quiaxa: —Nucën ꞌIbu Dios, upíira upí ꞌaish ꞌuchañumaira ꞌixun mix quicësabi oquin ꞌacë ꞌicë, ¿uínsarainra caramina menu ꞌicë unicama, an nu ꞌa, a cupiti ꞌain?

¹¹ Usai quia Nucën Papa Diosan ꞌináncëxun ca acama achúshi achúshinën chupa uxua biaxa. ꞌInáncëxuan bicëbëa ësoquin atu cai banaia cana cuan: —Mitsu ꞌacësaribi oquin axa Cristomi catamëcë raíri uniribi, unin ꞌaquin sënë́ontamainun, camina caínpainti ꞌain.

¹² Usai ꞌicëbëtan ca Carnero ꞌicësaribitia unin ꞌucha cupí bama, an anun quirica tacáshcacë ñu itsiribi pëóshaxa. Pëóshcëbë ca mecama shaíquiaxa. Usai ꞌicëbë ca bari bëánquiaxa, chupa tunánsa ꞌinun. ꞌImainun ca ꞌuxë imi iscësa ꞌiaxa.

¹³ Usaía ꞌimainun ca suñúanëan bëcacë́xa higos bimi paxa rëucucësari ꞌispa rëucüaxa.

¹⁴ Quirica taráncësa ꞌinun taramëti ca naicamëꞌëo nëtë́axa. ꞌImainun ca aín bashicama ꞌimainun nasícama anua ꞌicënuax tacúaxa.

¹⁵ Usai ꞌicëbë ca axa Nucën Papa Diosmi sináncëma unicama, ꞌapucama ꞌimainun uni cushibubë ñuñu unicama, ꞌimainun capitáncama, ꞌimainun uni chacama, ꞌimainun an uni itsi ñu mëëxuncë unicama, ꞌimainun an uni itsi ñu mëëxuncëma unicama, a camáxbi racuëti matá me shimú ꞌicë quinicamanu ꞌianan aín bashinu ꞌicë xaxu chacama nëbë́tsi unë́axa.

^16-17 Unë́quin ca aín bashi ꞌimainun xaxu chacama caxa: —A nëtë anúan axa anu tsóti upíira upí, anu ꞌApuira tsóti, anu tsócë Nucën Papa Dios a ꞌimainun Carnero ꞌicësaribitia unin ꞌucha cupí bama, an axa ami sináncëma unicamami nishquin castícanti nëtë ca uaxa. Usa ꞌain ca unicamax uíxbi ië́tima ꞌicën. Usa ꞌain ca nunu rurucubut, ꞌApuira an nu isnúnma ca rurucubúquin nu unput. Carnero ꞌicësaribitia unin ꞌucha cupí bama, axa nun ꞌucha cupí numi nishcë, an nu castícanxunma ꞌanun ca nu unët.