Apocalipsis 5 - Kashibo-Kakataibo Biblia

Nucën Papa Diosan tuíncë quirica ꞌimainun Carnero ñuicë bana

¹ Axa anu tsócë Nucën Papa Dios an aín mëcën mëquenën tuíncë cana quirica taráncë isan. Iscëx ca aín namë́nu cuënëocë ꞌianan aín caxunuribi cuënëocë ꞌiaxa. A quirica aín namë́ istisama ꞌitánun upí oquin tacáshcacë ꞌaish ca anúan tacáshcacë ñu mëcën achúshi ꞌimainun rabë́ ꞌiaxa.

² A isanan cana achúshi ángel cushiira axa ësai qui munuma banaia isan: —¿Uínra cara ax bëtsibë sënë́nmaira ꞌixun ënë quirica anúan tacáshcacë pëóshxun bacati ꞌic?

³ Quicëbëbi ca an pëóshti ꞌaíma ꞌiaxa. Naínu ꞌicë ángelcama ꞌimainun menu ꞌicë unicama ꞌimainun anua bamacë unicama ꞌicë, anu ꞌicë unicama achúshinëxbi ca an a quirica bacanan isti ꞌaíma ꞌiaxa.

⁴ An bacanan uisai quicë cara quixun isti ꞌaíma ꞌimainuan an ami bësuquin a quirica ñachati unibi ꞌaíma ꞌicë isi cana ini bëunan mëscúan.

⁵ Usai bëunan mëscutiabi ca a caniacëcë unicama achúshinën ꞌë caxa: —Camina ini bëunan mëscútima ꞌain. Ca is, Judatan rëbúnquicama achúshi, ꞌInúan cacë, ax Davidnën rëbúnquiribi ꞌicë, Jesús, ax bamáxbi baísquia ꞌaish camabi ñun ꞌibuira, an ca a quirica taráncë bacaquin, anúan a tacáshcacëcama pëóshti ꞌicën.

⁶ Usai quicëbëtan cana anua Nucën Papa Dios ꞌicë, ꞌimainun anu axa ꞌitsa bëruñu rabë́ ꞌimainun rabë́ ñu axribia bamatimoi tsócë, ꞌimainun caniacëcë unicama, acama nëbë́tsia nicë, carnero ꞌicësaribitia unin ꞌucha cupí bama Cristo a isan. Ax ca unin ꞌucha cupí carnero ꞌacësa oquin ꞌaquian unin anu ꞌá aín namicama istisabi ꞌaish nicë ꞌiaxa. ꞌËn iscëx ca ax mëcën achúshi ꞌimainun rabꞌë matúxcañu ꞌianan mëcën achúshi ꞌimainun rabë́ bëruñu ꞌiaxa. Aín bëru mëcën achúshi ꞌimainun rabë́ ax ca aín Bëru Ñunshin Upí Nucën Papa Diosan camabi menu ꞌicë unicamanu cuanun xucë a ꞌicën.

⁷ Anu cuanquin ca Carnero ꞌicësaribitia unin ꞌucha cupí bama, an axa tsócë Nucën Papa Dios aín mëcën mëqueua ꞌicë quirica a biaxa.

⁸ Bicëbë ca ꞌitsa bëruñu rabë́ ꞌimainun rabë́ ñu, axribia bamatimoi tsócë, acama ꞌimainun mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicamaribi, Carnero ꞌicësaribitia unin ꞌucha cupí bama ami bësucë ꞌaish a rabi rantin purúanxa. A caniacëcë unicaman ca arpa cacë ñu a ꞌai cuëëni cantati, a ꞌimainun curi ꞌacë manë xanpa anua sanutanun nëënti tsëpasa ñu ꞌicë, acama tuíanxa. A xanpanuax cuin tëxë́quianxa ꞌirucë, ax ca aín unicaman Nucën Papa Dios rabianan ñucácë banacama a ꞌiaxa.

⁹ Carnero ꞌicësaribitia unin ꞌucha cupí bama, ami bësuax ca cantati ió cantaxa, ësai qui: —Min camina bëtsibë sënë́nmaira ꞌixun a quirica anúan tacáshcacë pëóshxun bacati ꞌain. Mix bamax baísquia ꞌixun camina nucama bëtsi bëtsi unibu, bëtsi bëtsi banan banacë, ꞌimainun camabi nëtënuax ucë, ꞌimainun bëtsi bëtsi ꞌapuñu unicama, Nucën Papa Diosnan ꞌinun ië́mian.

¹⁰ Ië́mianan camina atu Nucën Papa Diosbë ꞌapu ꞌinun ꞌimianan judíos sacerdotesa ꞌimiquin an Nucën Papa Diosbë banaquin a rabicë ꞌimian. Usaquinmi ꞌimicëx ca mibë ënë menu ꞌicë unicaman ꞌapusa ꞌiti ꞌain.

¹¹ A cantati cuatancëxun isquin cana anu Nucën Papa Dios ꞌicë a ꞌimainun anua ꞌitsa bëruñu ñu, axribia bamatimoi tsócë acama ꞌicë, ꞌimainun anua caniacëcë unicama ꞌicë, a nëbë́tsioratia ꞌaisamaira tupúntisama ꞌaish ángelcama munuma banaia cuan.

¹² Ësai ca munuma banai quiaxa: —Carnero ꞌicësaribitia unin ꞌucha cupí bama, ax ca bëtsibë sënë́nmaira ꞌicën. A unin ꞌacë, axa camabi unicaman ꞌapu ꞌianan, camabi ñun ꞌibu ꞌianan, camabi ñu ꞌunáncë, ꞌianan cushiira a ca camabi unicama ꞌimainun ángelcamanribi rabiti ꞌicën. Rabianan ca —asábi ca —quixun caquin rabiquin an cacë banacama cuati ꞌicën. Cuëënquin ca axribia cuëënun rabiti ꞌicën.

¹³ Usai banaia cuanan cana Nucën Papa Diosan unio ñucama, naínu ꞌicë ñucama, ꞌimainun menu ꞌicë ꞌimainun bacanu ꞌicë, anua bamacë unicama ꞌicë anu ꞌicë unicama, acamaxa munuma banai ësai quia cuan: Ax anu tsócë Nucën Papa Dios, a ꞌimainun Carnero ꞌicësaribitia unin ꞌucha cupí bama, aribi ca camaxunbi cuëënquin axribia cuëënun rabiti ꞌicën. Rabianan ca —asábi ca —quixun caquin rabiquin an cacë bana cuati ꞌicën. Ax cushiira ꞌaísha bëtsi ꞌapusama ꞌicë ca camaxunbi xënibua ꞌaínbi a rabiti ꞌicën. Cuëënquin ca axribia cuëënun rabiti ꞌicën.

¹⁴ Usaía cantaia ca ꞌitsa bëruñu rabë́ ꞌimainun rabë́ ñu, axribia bamatimoi tsócë, acaman —usai ca ꞌiti ꞌicë —quixun caxa. Cacëbë rantin purúnquin ca a caniacëcë unicamanribi axa bamatimoi tsócë a rabiaxa.