Apocalipsis 4 - Kashibo-Kakataibo Biblia

Aín nëtënuxun Nucën Papa Dios rabiti bana

¹ A ñucama pain cuatancëxun cana xëcuë xëocacësa ꞌinuan naí panárabëcë isan. Isquin cana anun paían ꞌë cacë bana axa manë banañu banocë́xa banacësari banaia cuatëcëan, ësai qui: —Ënu ca ꞌirui ut, mixmi aia cana uisa ñucama cara ꞌiti ꞌicë quixun mi ismiti ꞌain.

² Cacëxunshi Nucën Papa Diosan Bëru Ñunshin Upitan ꞌimicëxun cana ꞌuxúnmabi namácësa oquin naicamëꞌëonua anu tsóti upíira upí anu ꞌApuira tsóti, a isan. Isanan cana axa anu tsócë Nucën Papa Dios aribi isan.

³ Axa anu tsócë ax ca upíira upí ꞌiaxa, maxax nibá upíira upí, paxa ꞌaíshbi tunántani, jaspe cacë, a iscësa ꞌianan bëtsi maxax ushíantani, cornalina cacë, a iscësaribi ca aín ichúcë ꞌiaxa. Anu ax tsócë a nëbë́tsioracë ca nónbai upíira upí, maxax ñu paxa iscësa, esmeralda cacë, axa ichutia iscësa ꞌiaxa.

⁴ Anu ax tsócë aribi nëbë́tsioracë ca mëcën rabë́ ꞌimainun taë rabë́ ꞌimainun rabë́ ꞌimainun rabë́ anu tsóti itsi ꞌiaxa. Axa a anu tsótinu tsócëcamax ca mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama ꞌiaxa. Acamax ca aín chupa uxua ꞌianan curi ꞌacë mañuti mañucë ꞌiaxa.

⁵ Anu tsóti upíira upí anuaxa caná mëriti banaia cana cuan. Cuanan cana anuaxribia bëtsi ñuribi sharatia cuan. Anu Nucën Papa Dios ꞌicë aín bëmánoncüa, cana mëcën achúshi ꞌimainun rabë́ i tëacënu nanxun bimicë́xa ꞌapú rëquirucësaria rëquiruia isan. Isquin cana anu ca Nucën Papa Diosan Bëru Ñunshin Upí ꞌicë quixun ꞌunan.

⁶ Anua Nucën Papa Dios ꞌicë a bëmánon ca parúnpapa upí, bëxnan bëxnánquicë iscësa ꞌaíshbi ꞌunpáxma ꞌiaxa. Anua Nucën Papa Dios ꞌicë a nëbë́tsi ꞌianan a nëbë́tsioracë ca ꞌitsaira bëruñu rabë́ ꞌimainun rabë́ ñu, axa bamatimoi tsócë, axribi ꞌiaxa. Aín bëmánon ꞌitsaira bëruñu ꞌianan ca aín caxumiribi a ñu ꞌitsaira bëruñu ꞌiaxa.

⁷ A ñu achúshi ca paru ꞌinúansa ꞌiaxa, bëtsix ca vaca bënësa ꞌiaxa, bëtsix ca unin bëmánan iscësa ꞌiaxa, bëtsix ca tëtëcamëꞌëo nuania iscësa ꞌiaxa.

⁸ A ñucama achúshi achúshinëx ca anúan nuánti mëcën achúshi ꞌimainun achúshi pëchiñu ꞌiaxa. Aín bërucamax ca ëman ꞌianan ꞌucë mëúribi ꞌiaxa. A ñux ca nëtë́nbi imë́bi nëtëtima Nucën Papa Dios rabi ësai quiaxa: Nucën Papa Dios, ax ca upíira upí, upíira upí upíira upí ꞌicën. Aín cushix ca chaira ꞌaish bëtsi cushisama ꞌicën. Ax ca usabi ꞌiá ꞌaish, usabi ꞌaish, usabi ꞌiti ꞌicën.

⁹ Usaquian ꞌitsa bëruñu ñu an Nucën Papa Dios, axa anu ꞌApuira tsóti, anu ꞌianan bamatimoi tsócë, a nëtë́timoquin rabianan —ca asábi ꞌicë —quixun cacëbëtan cacëbëtan,

¹⁰ ca mëcën rabë́ ꞌimainun taë rabë́ ꞌimainun rabë́ ꞌimainun rabë́ a caniacëcë unicama an axa xënibua ꞌaínbi bamatimoi tsócë Nucën Papa Dios ami bësui, rantin puruni tsóbuquin a rabiia. Rabiquin ca curi ꞌacë mañuti atúan mañucë Nucën Papa Dios ꞌinánquin anua ax ꞌicë aín bëmánon nanquin rabiquin ësaquin caia:

¹¹ Nucën ꞌIbu Dios, min camina camabi ñu uniocën. Mix cuëëncësabi oi ca ꞌiacëxa, mix cuëëncësabi oquin camina min cushínbi camabi ñu ënë menu ꞌicë ꞌimainun naínu ꞌicë ñuribi uniocën. Usa ꞌaish camina camabi unicama ꞌimainun ángelcamanribi rabitisa ꞌain.