Apocalipsis 3 - Kashibo-Kakataibo Biblia

Sardisnu ꞌicë unicama quirica buánmia

¹ Usaquin catancëxun ca ësaquinribi cuënëonun Jesusan ꞌë caxa: —An axa Sardisnuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: Axa Nucën Papa Diosan Bëru Ñunshin Upíñu ꞌianan an aín mëcënan ꞌispa mëcën achúshi ꞌimainun rabë́ tuíncë, an ca ësaquin mi caia: —Mitsúnmi ñu ꞌacëcama cana ꞌunanin. Unin ca mitsux camina Nucën Papa Diosbë upí ꞌai quixun ñuia. Ñuicëxbi camina usama ꞌaish bamacë unisa ꞌain.

² Mitsux axa ꞌuxcë unisa ꞌaíshbi camina bësucësa ꞌiti ꞌain. ꞌËn iscëxun ca mitsúnmi ꞌacë ñucama ꞌën Papa Diosan upí isima. Usa ꞌain camina mitsúnmi bërí ꞌacë ñu axribia an iscëx ꞌaisama ꞌitin rabanan, upí oquin sinánquin ax cuëëncësabi oquin ꞌati ꞌain.

³ Usoquin ꞌaquin camina mitsua ꞌën sinánmicëxun ꞌën unicaman ñuixuncë bana a sinánti ꞌain. A sinánquin camina a bana quicësabi oquin ꞌanan sinanaquin mitsun ñu ꞌatima ꞌacëcama ënti ꞌain. Usai ꞌicëbëma cana an ñu mëcamacë uníxa, unin sináncëbëmabi ucësaribicuatsini, ꞌëx mitsun ꞌunáncëma nëtën uisoquin carana ꞌati ꞌai usoquin mitsu ꞌai uti ꞌain.

⁴ Mitsúnmi ꞌëx cuëëncëma ñu ꞌacë ꞌaínbi ca Sardisnu ꞌicë uni ꞌitsamashinën ñu ꞌaisama ꞌacëma ꞌicën. Usa ꞌaish ca aín nuitu upí ꞌain chupa uxua pañucësa ꞌaish ꞌëbë niti ꞌicën.

⁵ Axa ꞌëmi catamëquin ꞌëx cuëëncësabi oi ꞌiti ëncëma unicama atux ca usoquin chupa uxua pañucë ꞌiti ꞌicën. A unicaman anë cana ꞌën quiricanua tërë́ntima ꞌain. Tërë́nquinma cana acama achúshi achúshi ñuiquin —ax ca ꞌënan ꞌaish xënibua ꞌaínbi ꞌëbë ꞌiti ꞌicë —quixun ꞌën Papa Dios ꞌimainun aín ángelcama cati ꞌain.

⁶ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën.

Filadelfianu ꞌicë unicama quirica buánmia

⁷ Usaquin catancëxun ca ësaquinribi cuënëonun Jesusan ꞌë caxa: —An axa Filadelfianuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: A aín chaitiocë David ꞌiásaribi ꞌApu ꞌinun Nucën Papa Diosan ꞌimicë, Jesús, axa ꞌuchañuma ꞌaish aín bana asérabi ꞌice, ax ca an xëcuë bërúancë unisaribi ꞌicën. An xëcuë bërúancë ꞌixuan an xëocaia ca uinu ꞌicë unínbi xëcuë xëputima ꞌicën. ꞌImainun ca an xëpuia uinu ꞌicë unínbi xëcuë xëocatima ꞌicën. Usaribi oquin ca ui unix cara ainan ꞌiti ꞌicë, ui unin cara aín bana unicama ñuixunti ꞌicë, acama ainshi mëníoia. Usoquian an mëníocë ꞌain ca uinu ꞌicë unínbi —usama ca —catima ꞌicën. Ax usa ꞌixun ca ësaquin mi caia:

⁸ Mitsúnmi ñu ꞌacëcama cana ꞌunanin. ꞌËn cana ꞌunanin, mitsux ꞌitsairama ꞌixunbi camina ꞌën bana quicësabi oquin ꞌanan, ꞌëx cana Cristonanma ꞌai quiax quicëma ꞌain. Usa ꞌicë cana anun atsínti xëcuën atsíncësa ꞌinun ꞌën bana unicama ñuixunun mitsu ꞌimian. Usoquin ꞌimia ca ui unínbi mitsúnmi usoquin ꞌaxunma ꞌanun mitsu ꞌimitima ꞌicën.

⁹ Usa ꞌain cana ñunshin ꞌatimanën ꞌapun sinánmicë unicama axa, ꞌëx cana asérabi judío uni ꞌai quibi cëmëi ꞌëmi sináncëma unicama a mitsun bana cuatia mitsumi sinánun ꞌimiti ꞌain. ꞌImicëxun ca ꞌunánti ꞌicën, ꞌën cana asérabi mitsu nuibati quixun.

¹⁰ Mitsun camina uisa ñu cara ꞌicëbëtanbi ꞌëmi catamëanan ꞌën bana quicësabi oquin ꞌati ëncëma ꞌain. Usaími ꞌicë cupí cana anúan unicama paë tani tëmërati nëtëa ucëbëmi tëmëraxma ꞌinun mitsu ꞌimiti ꞌain.

¹¹ Xënibucëma ꞌaínshi cana utëcënti ꞌain. ꞌËx umainun min ꞌacësabi oquin ꞌëmi sinánti ënquinma ꞌën mitsu cacë bana ꞌacë ꞌaish camina ꞌëbë ꞌën nëtënu ꞌi cuëënti ꞌain. Usai ꞌimi ꞌiti cupí camina unían mitsu sinanaminun ꞌamitima ꞌain.

¹² Axa ꞌëmi catamëquin ꞌëx cuëëncësabi oi ꞌiti ëncëma unicama, a cana anua Nucën Papa Dios ꞌicë anubia nëtë́timoi ꞌinun ꞌimiti ꞌain. Anuaxa chiquítimoquin ca Nucën Papa Diosan ꞌimiti ꞌicën. ꞌËn Papa Diosan anëbi cana a unicamanu cuënëoti ꞌain. Cuënëonan cana anu Nucën Papa Dios ꞌiti Jerusalén ió, axa naínuax ubúti, aín anëribi ꞌanan cana ꞌën anë ióribi atunu cuënëoti ꞌain.

¹³ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën.

Laodiceanu ꞌicë unicama quirica buánmia

¹⁴ Usaquin catancëxun ca ësaquinribi cuënëonun Jesusan ꞌë caxa: —Axa Laodiceanuax ꞌëmi catamëcë unicama an Nucën Papa Diosan bana ñuixuncë, a buánminuxun camina ësoquin cuënëoti ꞌain: Ax upíira upí ꞌixuan uisa cara Nucën Papa Dios ꞌicë quixun paránquinma uni ꞌunánmicë, an Nucën Papa Diosbëtan camabi ñu unio, an ca ësaquin mi caia:

¹⁵ ꞌËn cana usaími mitsux ꞌicë acama ꞌunanin. Usa ꞌixun cana ꞌën ꞌunanin, mitsúnmi upí oquin sinánxun ax cuëëncësabi oquinra Nucën Papa Dios ꞌaxuniama. Usa ꞌixun camina mitsun sinanin, mitsúxbi usai ꞌia isquin sapi isa Nucën Papa Diosan upí oquin sinania quixun. Usa ꞌaish camina mitsux an Nucën Papa Diosan bana cuacë unicama ꞌicësai ꞌiman. Usa ꞌaish camina a Nucën Papa Diosan bana cuacëma unicama ꞌicësairibi ꞌiman. Usa ꞌain cana cuëënin, mitsux an asérabiira Nucën Papa Diosan bana cuacë ꞌiti. Usai ꞌicëma ꞌixun, mitsun ꞌaisama ñu ꞌacë ꞌixun, —ꞌaisama ñu ꞌacë cupí cana ainanma ꞌai —quixun ꞌunáncë ꞌiti cana cuëënin.

¹⁶ Usoquinmi mitsun asérabiira ꞌën bana ꞌacëma ꞌaish camina ꞌunpax ꞌitsístanisa ꞌain. Ënëx ca ꞌësa ꞌicën. ꞌUnpax matsi xëati ca asábi ꞌicën, ꞌunpax ꞌitsísocëribi xëati ca asábi ꞌicën. Usa ꞌaínbi ca uni ꞌunpax ꞌitsístanishi xëax anábuisa tanti ꞌicën. Usaribi cana mitsu isin. Mitsúxmi asábitanishi ꞌiti cana cuëëniman. Unían ꞌunpax ꞌitsístanishi xëax aín picë anáquin chiquíncësaribi oquin cana ꞌëbë ꞌiáxma ꞌinun mitsu chiquínti ꞌain.

¹⁷ Mitsux camina quin, ꞌëx cana asábi ꞌain, ñuñu ꞌaish cana cha ꞌain, uisa ñu carana cuëëni, a cana bitsin. Mitsux ënë nëtënu ꞌicë ñuñu ꞌaíshbi camina Nucën Papa Diosan iscëx ñuumasa ꞌianan bëxuñusa ꞌianan chupañumasa ꞌain.

¹⁸ Mitsúxmi usai ꞌinúnma cana mitsu ꞌësëquin ësaquin cain: Curi manë ax ca ꞌitsísirocëx aín chuacama nëtëtia. Nëtë́cëbë ca aín upíshi bërutia. Usaribi oquin asérabi mitsun nuitu upí ꞌinun ꞌën mitsu ꞌiminun camina ꞌë ñucáti ꞌain. Mitsun ꞌatima ñu ꞌacëcama tërë́ncë ꞌianan ꞌëmi sinánquin ñu upí ꞌacë ꞌaish chupa uxua pañucësa ꞌinun ꞌën mitsu ꞌiminun camina ꞌë ñucáti ꞌain. Mitsun uisa ñu ꞌati cara ꞌatima ꞌicë, uisa ñu ꞌati cara upí ꞌicë quixun upí oquin ꞌunáncëma ꞌaish bëxuñu unisa ꞌixunbi, acama mitsu ꞌunánminun camina ꞌë ñucáti ꞌain.

¹⁹ Uicama carana nuibatin, acama cana ñu ꞌatima ꞌatëcënxunma ꞌanun ꞌësëanan uisoquin carana ꞌati ꞌai usoquin ꞌain. Usoquin ꞌën ꞌacëxmashi camina sinanati ꞌëx cuëëncësabi oi asérabi ꞌiti ꞌain.

²⁰ Ënëx ca ësa ꞌicën. Bëtsi uni isi cuanxun ca unin aín xëpúti taxcaquin a xëocaxunun quixun caia. An aín xëpúti taxcaquin uni itsi cuëncë uni usaribi cana ꞌëx ꞌain. A unisaribi ꞌixun cana ui unin cara ꞌëmi sinánquin ꞌëx abë ꞌinun ꞌë caia a unibë ꞌiti ꞌain. Usai ꞌiquin cana unían abëtan piquin uni itsi ꞌunáncësaribi oquian ꞌë ꞌunánun a uni ꞌimiti ꞌain.

²¹ ꞌAnan cana axa ꞌëmi catamëquin ꞌëx cuëëncësabi oi ꞌiti ëncëma unicamax ꞌëbë ꞌapu ꞌinun ꞌimiti ꞌain, ꞌëx tëmëraibi ax cuëëncësabi oi ꞌiti ëncëma ꞌicëa ꞌën Papan ꞌë abë ꞌapu ꞌinun ꞌimicësaribi oquin.

²² An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën.