Apocalipsis 22 - Kashibo-Kakataibo Biblia

¹ Usaquin ꞌë ismitancëxun ca angelnën anua Nucën Papa Dios ꞌimainun Carnero ꞌicësaribitia unin ꞌucha cupí bama, ax ꞌicë, anuaxa baca aín ꞌunpax bëxnan bëxnánquicë chiquitia ꞌë ismiaxa.

² A bacax ca a ëmanu ꞌicë bai cha anúnbi xobucë ꞌiaxa. A bacax ca ꞌunpax ꞌaíshbi Nucën Papa Diosan cushi anúan uni bamatimoi tsóti, a ꞌiaxa. A baca aín cuëbí rabë́ amo anu ca i achúshi ꞌiaxa. Camabi baritian ca a in mëcën rabë́ ꞌimainun rabë́ oquin tuaxa, ꞌuxë camabi. A bimix i bimisa ꞌaíshbi ca ax anúan uni bamatimoi tsóti, a ꞌiaxa. A i pëchix ca camabi menuax ucë uníxa anun ꞌinsíntëcëntimoi bucuti a ꞌiaxa.

³ Usa ꞌain ca Nucën Papa Diosan uisoquin cara ꞌati ꞌicë usoquin ꞌati ñu anu ꞌaíma ꞌiti ꞌicën. Anu ca Nucën Papa Dios ꞌimainun Carnero ꞌicësaribitia unin ꞌucha cupí bama, ax ꞌApu ꞌiti ꞌicën. Usa ꞌicë ca anuxun aín unicaman a rabiti ꞌicën.

⁴ Rabianan ca anuax abë isananti ꞌicën. Usa ꞌaish ca Nucën Papa Diosan anë atun bëmánanu cuënëocë ꞌiti ꞌicën.

⁵ Anu ca bëánquicë ꞌaíma ꞌiti ꞌicën. Anuxun ca Nucën ꞌIbu Diosanbi a ëma pëcati ꞌicën. Usa ꞌain ca lamparín ꞌimainun barin pëcacë anu ꞌaíma ꞌiti ꞌicën. Nucën Papa Diosbë ca anuax aín unicama xënibua ꞌaínbi ꞌapu ꞌiti ꞌicën.

Jesucristo utëcënti nëtë ca ꞌurama ꞌicë quicë bana

⁶ Ismitancëxun ca a ángelnën ꞌë caxa: —ꞌËn mi cacësabi oi ca asérabi ꞌiti ꞌicën. Nucën ꞌIbu Dios, an ax quicë bana uni ñuixuncë unicama sinánmicë, an ca uisai cara xënibucëma ꞌaínshi ñu ꞌiti ꞌicë quixuan, aín unicaman ꞌunánun, aín ángel xuaxa.

⁷ Xënibucëma ꞌaínshi cana uti ꞌain. An, ënë bana quicësabi oi ca asérabi ꞌiti ꞌicë quixun sinánquin a bana cuacë unicama, ax ca cuëëinra cuëënti ꞌicën.

⁸ ꞌËx Juan ꞌixun cana ꞌën ënë ñucama cuanan isan. Usoquin ënë ñucama cuanan isi cana ángel, an ꞌë ismicë, a rabinux a tanáin rantin purúan.

⁹ ꞌËn a rabicascëxunbi ca ꞌë caxa: —Usai ꞌiaxma ca ꞌit. Mibëtan, an min ꞌacësaribi oquin an Nucën Papa Diosan bana uni ñuixuncë unicama ꞌimainun an ënë quiricanu cuënëocë banacama upí oquin sinánquin cuacë unicaman ꞌacësaribi oquin cana ꞌënribi ax quicësabi oquin ꞌaquin Nucën Papa Dios rabin. Usa ꞌain ca ꞌë rabixunma Nucën Papa Diosëshi rabit.

¹⁰ Usaquin catancëxun ca ësaquinribi ꞌë caxa: —Ënë quiricanu cuënëocë ñucama camina unpuquinma chanioquin ñuiti ꞌain, camabi unían ꞌunánun, anun ënë ñucama ꞌiti nëtë ca ꞌurama ꞌicë, usa ꞌain.

¹¹ A nëtë ꞌurama ꞌaínbi ca an ñu ꞌatima ꞌacë unicaman an ꞌacësabi oquin ꞌati ꞌicën, axa ꞌuchacë unix ca usabii ꞌuchati ꞌicën, an upí ñu ꞌacë unin ca an ꞌacësabi oquin ꞌati ꞌicën, ax Nucën Papa Dios cuëëncësabi oi ꞌicë unix ca usabi ꞌiti ꞌicën.

¹² Xënibucëma ꞌain cana uti ꞌain. Uquin cana an ñu upí ꞌacë ꞌën unicama uisoquin cara ñucama ꞌaxa, usaribi oquin cupíoquin cuëënun ꞌimiti ꞌain.

¹³ ꞌËx cana uisa ñubia ꞌaíma ꞌaínbi ꞌiacën. Usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain.

¹⁴ Ui unicamax cara a ëmanu atsínxun, anu ꞌicë anun uni bamatimoi tsóti i bimi biti sinani, chupa uxuira chuañumasa ꞌinun aín nuitua upí ꞌiminun Jesucristomi catamëtia, acamax ca anu ꞌaish cuëëinra cuëënti ꞌicën.

¹⁵ Usa ꞌaínbi ca ꞌaisama unicamax a ëma ëmáinshi ꞌiti ꞌicën. An ñu ꞌaisama sináncë unicama, an ñu xëacë ñubë́ unicama, aín xanuma ꞌicëbi bëtsi xanu cuëëncë unicama, aín bënëma ꞌicëbi bëtsi uni cuëëncë xanucama, an uni ꞌacë unicama, an Nucën Papa Diosmabi bëtsi ñu rabicë unicama, axa uni paránti cuëëni cëmëcë unicama, acamax ca a ëmanu atsíntima ꞌicën. Ca ëmáinshi ꞌiti ꞌicën.

¹⁶ ꞌËx cana Jesús ꞌain. Usa ꞌixun cana axa ꞌëmi catamëcë unicaman ënë ñucama ꞌunánun ꞌën ángel mia canun xuan. ꞌËx cana David, axa judíos unibunën ꞌapu ꞌiá, aín rëbúnqui ꞌain. Usa ꞌaíshbi cana ꞌëx David ꞌicëma pan ꞌain ꞌiacën. Pëcaratia xaba ꞌinúan ꞌispon urucë usaribi cana ꞌëx ꞌiti ꞌain.

¹⁷ Usoquin caia ca Carnero ꞌicësaribitia unin ꞌucha cupí bama, Cristo, amia ax catamëcë unicamabëtan Nucën Papa Diosan Bëru Ñunshin Upitan —bënëtishi ca ut —quixun a caia. An atun bana cuacë unicamanribi ca —bënëtishi ca utëcën —quixun a cati ꞌicën. Shimaia uni ꞌunpax ꞌacatsi bënë́cësa usaribitia ax Jesuscristonan ꞌicatsi bënë́cë uni, an ca ami catamëquin Jesucristo —ëx cana minan ꞌiisa tani —quixun cati ꞌicën. Usaía ꞌia ca Cristonën ainan ꞌimianan xënibua ꞌaínbi abë ꞌinun ꞌimiti ꞌicën, cupímashi.

¹⁸ An ënë quiricanu cuënëocë bana iscë unicama cana ësaquin cain: —An ënë banacama isquinbi ax quicësama oquin bëtsi banacëñun mëscuquin ñuixuncë, a ca Nucën Papa Diosan ënë quiricanu cuënëocë banacamaxa uni tëmëramiti quicësabi oquin tëmëramiti ꞌicën.

¹⁹ Uicamanribi cara ënë quiricanu ꞌicë Nucën Papa Diosan bana ñuiquinbi bëtsi bëtsi bana —a banax ca ꞌaisama ꞌicë —quiquin a uni ñuixunima, acama ca Nucën Papa Diosan ënë quiricanu cuënëoquin ñuicë Jerusalén ió anu abë ꞌitimoquin ꞌimianan anu ꞌicë quiricanua ꞌicë aín anë a tërë́nti ꞌicën.

²⁰ An ënë ñucama ꞌë ismicë, an ca ꞌë caia: —Cana bënëtishi utëcënti ꞌain. Cacëxun cana cuëëinra cuëënquin —asábi ca, usai ca ꞌiti ꞌicën, ca ut —quixun, Nucën ꞌIbu Jesús cain.

²¹ Nucën ꞌIbu Jesucristonën aín uni ꞌicë mitsu nuibaquin ꞌaquincëxmi upí ꞌiti cana cuëënin. Usai ꞌiti cana cuëënin. Ashi.