Apocalipsis 21 - Kashibo-Kakataibo Biblia

Naíbëa me ió ꞌiti bana

¹ Usaquin istancëxun cana a pain unio naí, me, parúnpapa, acamaxa nëtë́cë ꞌaish ꞌaíma ꞌain, naí ió ꞌimainun me ióribi isan.

² Isanan cana Jerusalén ëma ió, upíira upí, Nucën Papa Diosan nëtënuaxa ubutia isan. ꞌËn iscëx ca upíira upí ꞌiaxa, xanúxa bërí bënunux upiti mëníocacësaribi.

³ Isanan cana naínuaxa munuma ësai qui banaia cuan: —Camina isti ꞌain, anua uni bucucë, anu ca Nucën Papa Dios bërí ꞌia. Anu aín unicama ꞌicë anu ca Nucën Papa Dios ꞌiti ꞌicën. A unicamax ca asérabi aín uni ꞌiti ꞌicën. Ax aín Dios ꞌaish ca aín unicamabë ꞌiti ꞌicën.

⁴ An ca aín unicama aín bëunan mëscutia ini masá nuitutiabi nëtë́miti ꞌicën, aín bëun tërë́nquin. A unicamax ca bamatëcëntima ꞌicën, usai ꞌianan ca rarumatëcëntima ꞌicën, ꞌianan ca intëcëntima ꞌicën, acaman ca paë tantëcëntima ꞌicën. Bëráma usai ꞌiá ꞌaíshbi ca usai ꞌitëcëntima ꞌicën.

⁵ A bana ꞌën cuacëbë ca Nucën Papa Dios, axa anu ꞌApuira ꞌaish tsócë, ax ësai quiaxa: —Camina ꞌunánti ꞌain, cana camabi ñu ió ꞌinun ꞌatëcënin. Quianan ca ësairibi quiaxa: —ꞌËx quicësabi oi ca asérabi ꞌiti ꞌicën. Usa ꞌain camina ꞌëx quicë banacama ënë cuënëoti ꞌain.

⁶ Caxun ca ꞌë caxa: —Anuishi sënë́nquin cana ꞌan. ꞌËx cana uisa ñubia ꞌaíma ꞌaínbi ꞌiacën, usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain. Shimaia uni ꞌunpax ꞌacatsi bënë́cësa, usaribitia ꞌënan ꞌiisa tani bënëtia, cana ꞌënan ꞌaísha ꞌën Bëru Ñunshin Upíñu ꞌinun, cupí ñuixunquinma, ꞌimiti ꞌain.

⁷ Uicaman cara ꞌëmi catamëquin ꞌëx cuëëncësabi oi ꞌiti ëncëma ꞌicë, acama cana ꞌënan ꞌaish ꞌëbë tsóti ꞌimiti ꞌain. ꞌImainun cana ꞌëx aín Dios ꞌiti ꞌain. ꞌImainun ca ax ꞌën bëchicë ꞌiti ꞌicën.

⁸ Usa ꞌaínbi ca racuë́quian an ꞌëmi sinánti ëncë unicama, ꞌimainun an ꞌëmi catamëcëma unicama, ꞌimainun an ñu ꞌatima ꞌacë unicama, ꞌimainun an uni ꞌacëcama, ꞌimainun aín xanuma ꞌicëbi bëtsi xanu cuëëncë unicama ꞌimainun aín bënëma ꞌicëbi bëtsi uni cuëëncë xanucama ꞌimainun ñu xëacë ñubë́ unicama ꞌimainun an Nucën Papa Diosmabi bëtsi ñu rabicë unicama ꞌimainun cëmë unicama, acamax anuaxa ꞌianëmëꞌëosa manë tsi azufrebë rëquirucë anu ꞌiti ꞌicën, anu bamatëcëncë ꞌaish chiquítimoi ꞌinux.

Jerusalén ió

⁹ Usai quicëbëtan ca mëcën achúshi ꞌimainun rabë́ ángelcama anun ënë menu ꞌicë unicama ashiquin tëmëramiti ñua aín xanpanu ꞌicë, acama achúshinën ësaquin ꞌë caxa: —Ca ut. Carnero ꞌicësaribitia unin ꞌucha cupí bama, an abëa ꞌinun binuxun cacë aín unicama a cana mi ismiti ꞌain.

¹⁰ Usaquin catancëxun ca ꞌuxcëmabi namácësoquin ꞌën iscëxun aín bashi chaira anu ꞌë buánxa. Buánquian ismicëxun cana Jerusalén ëma upíira upí, anua Nucën Papa Dios ꞌicë, anuaxa ubutia isan.

¹¹ A ëma ca upíira upí, Nucën papa Diosan cushin pëcacë ꞌiaxa, maxax upíira upí ichúcësa ꞌaish, jaspe cacë maxax nibaníbaquicë iscësa ꞌiaxa.

¹² Anun cënëcë ax ca manáinra ꞌiaxa. ꞌImainun ca aín xëcuë anun atsínti mëcën rabë́ ꞌimainun rabë́ ꞌiaxa. A xëcuëcamanu ca mëcën rabë́ ꞌimainun rabë́ ángel, ax achúshi achúshitax nicë ꞌiaxa. A xëcuëcamanu cuënëocë ax ca Israelnën bëchicë, mëcën rabë́ ꞌimainun rabë́, aín anëcama ꞌiaxa.

¹³ A cënëcë anu ca amo camabi rabë́ ꞌimainun achúshi xëcuë ꞌiaxa. Aucüaxa bari urucë ami rabë́ ꞌimainun achúshi xëcuë, ꞌimainun ca anúan bari cuabúcë amiribi rabë́ ꞌimainun achúshi xëcuë ꞌiaxa. ꞌImainun ca nortemiribi rabë́ ꞌimainun achúshi xëcuë, ꞌimainun surmiribi rabë́ ꞌimainun achúshi xëcuë ꞌiaxa.

¹⁴ Cënëquin nitsíncë maxáxcama ax ca mëcën rabë́ ꞌimainun rabë́ ꞌiaxa. A maxax cha anuribi ca anë cuënëocë ꞌiaxa. Anu cuënëocë anëcamax ca Carnero ꞌicësaribitia unin ꞌucha cupí bama, an aín bana uni ñuixunun caíscë unicama, mëcën rabë́ ꞌimainun rabë́, aín anëcama ꞌiaxa.

¹⁵ Axa ꞌëbë banacë ángel ax ca curi ꞌacë tsatiñu ꞌiaxa, anúan a ëma tupúanan aín xëcuëcama tupúanan aín cënëcamaribi tupúnti.

¹⁶ Tupunia cana isan, a ëmax ca amo ꞌicë rabë́ ꞌimainun rabë́ ꞌaish bëtsibëtan sënë́nbi ꞌiaxa. Anun tupúnti tsatían tupúncëx ca aín chaxcë́ dos mil doscientos kilometro ꞌiaxa. Usaribi ca aín namë́ ꞌimainun aín manámi ꞌiaxa.

¹⁷ Unin tupúncësaribi oquin ca ángelnën aín cënëribi tupúanxa. Tupúncëx ca aín manámi sesenta y cuatro metro ꞌiaxa.

¹⁸ Cënëcë ax ca jaspe cacë maxax paxa ꞌaíshbi tunántani ꞌaish, nibaníbaquicë ꞌiaxa. ꞌImainun ca a ëmanu ꞌicë ñucama ax curi upí ꞌacë ꞌaish, bëxnan bëxnánquicësa ꞌiaxa.

¹⁹ Cënëquin nitsíncë maxáxcama abë mëscúcë ca maxax upíira upí ꞌiaxa. Acamax ca jaspe cacë maxax, ax paxa ꞌaíshbi tunántani ꞌaish nibaníbaquicë, ꞌimainun zafiro, ax cumá batsisa, ꞌimainun ágata ax cumá batsisa ꞌaíshbi tunántani, ꞌimainun esmeralda, ax ñu paxa iscësa,

²⁰ ꞌimainun ónicë, ax uxuatani ꞌaíshbi sërisabë mëscúcë, ꞌimainun cornalina, ax ushíantani ꞌimainun crisólito, ax paxasa ꞌianan bëtsibëribi mëscúcësa ꞌimainun berilo, ax ñu paxatanisa ꞌaish nibaníbaquicë ꞌimainun topacio, ax curúnsa, ꞌimainun crisoprasa, ax curisa ꞌaíshbi ñu paxasaribi, ꞌimainun jacinto, ax ushían ꞌaíshbi tunántani, ꞌimainun amatista ax minánsa ꞌiaxa.

²¹ A ëma aín xëcuëcama ca perla chaira ax po namë iscësa ꞌiaxa. Xëcuë achúshi achúshi ax ca perla achúshi ꞌiaxa. A ëman bai cha anu niti ax ca curi ꞌacë ꞌaíshbi bëxnan bëxnánquicësa ꞌiaxa.

²² Nucën ꞌIbu Dios, axa aín cushi bëtsi cushisama, a ꞌimainun Carnero ꞌicësaribitia unin ꞌucha cupí bama, axbia uinu cara a ëma sënënia anubi ꞌain, ca ꞌën iscëx a ëmanu anuxun Nucën ꞌIbu Dios rabiti xubu ꞌaíma ꞌiaxa.

²³ A ëma ca Nucën Papa Diosanbi pëcaia. Carnero ꞌicësaribitia unin ꞌucha cupí bama, anribi ca a ëma pëcaia. Usa ꞌain ca baribëtan ꞌuxën a ëma pëcaima.

²⁴ Usaquin pëcacëx ca camabi menuaxa Nucën Papa Diosnan ꞌinux ië́cë unicama aín pëcacënu niti ꞌicën. ꞌImainun ca axa ië́cë ꞌapucamaxribi anu ꞌiti ꞌicën.

²⁵ A nëtënu ca baquish ꞌaíma ꞌiti ꞌicën. Usa ꞌaish ca a nëtënu ꞌicë aín xëpúti ax xënibua ꞌaínbi usabi xëocacë ꞌiti ꞌicën, a nëtëx ca baquishima, usa ꞌain.

²⁶ Aín tucuricu unicamaribi Jesucristonan ꞌaish ca anu ꞌiti ꞌicën.

²⁷ Usa ꞌain ca anu ñu ꞌaisama ꞌitima ꞌicën, ui unix cara ꞌaisama ñu ꞌacë ꞌicë ꞌimainun ui unix cara cëmëia, usa unix ca anu ꞌitima ꞌicën. Ui unicamax cara Nucën Papa Diosan nëtënu ꞌitioquin aín anë Carnero ꞌicësaribitia unin ꞌucha cupí bama, aín quiricanu cuënëo ꞌicë, acamax cuni ca anu ꞌiti ꞌicën.