Apocalipsis 20 - Kashibo-Kakataibo Biblia

Mil baritia ca ñunshin ꞌatimacama sipuacë ꞌiti ꞌicë quixun ñui quicë bana

¹ Usaquin istancëxun cana ángel naínuax ubutia isan. A ángelnëx ca quini chaira, anun aín xëcuë xëocati ñu a tuíanan, manë risi chaira aribi tuíncë ꞌiaxa.

² Ubútancëxun ca a ángelnën capë́sa ꞌaíshbi pianancë ñuinacanꞌëo chaira, an bëráma runusa ꞌixun Nucën Papa Diosan uniotabatia uni paran ꞌixun camabi menu ꞌicë uni paráncë, ñunshin ꞌatimanën ꞌapu Satanás, a biquin mil baritia niaxma ꞌinun manë risin nëaxa.

³ Usoquin nëatancëxun ca quini chaira anu nipáxa. Nipátancëxun xëpuquin ca uinu ꞌicë unínbi xëocaisama oquin ꞌunántioxa. Anuaxa unicama parántëcënux chiquitima, anu mil baritian sipuacë ꞌinun ca ángelnën a capë́sa ñuina nëaxun quini chairanu nipáxun xëpuaxa. Usaquin nipácë ꞌaish ca mil baritia ꞌicëbëtan chiquíncë ꞌiti ꞌicën, ꞌuráinra ꞌinuxmabi.

⁴ Acama istancëxun cana anu tsóti cha bëtsi bëtsi isan. Anu ca an uni raíri ñu upí cara ꞌaxa, ñu upíma cara ꞌaxa quixun isti, acama tsócë ꞌiaxa. Acama isanan cana axa —ꞌëx cana Jesúsnan ꞌai —quiquin bana ñuixuncë cupí tëbíscacë unicama, ꞌimainun axa Nucën Papa Diosan bana cuacë cupí tëbíscacë unicama, acaman ñunshínribi isan. Acamax ca ꞌitsa maxcáñu ꞌianan ꞌitsa matúxca ñuinacanꞌëo a rabima, ꞌianan a tanquin unin ꞌacë ñu a rabima, ꞌianan ainan ꞌinun ꞌunántioquin aín bëmánan ꞌimainun aín mëcën cuënëocëma ꞌiaxa. ꞌËn iscëx ca acamax bama aíshbi baísquiaxa. Baísquitancëx ca Cristobë mil baritia ꞌapu ꞌiaxa.

⁵ Acamax baísquicë ꞌaínbi ca axa bama raíri baísquicëma pan ꞌiaxa, mil baritia inúcëbë cuni baísquinux.

⁶ Uicamax pain cara baísquicë ꞌicë, acamax ca Nucën Papa Diosan ꞌimicëx aín nuitu upíira ꞌaish cuëëinra cuëënti ꞌicën. Bamatëcëntimoi ca xënibua ꞌaínbi Nucën Papa Diosbë ꞌiti ꞌicën. Bamatëcëntimoi ca Nucën Papa Dios ꞌimainun Cristo cuëënquin rabianan abë mil baritian ꞌapu ꞌiti ꞌicën.

⁷ Mil baritia inúcëbë ca Nucën Papa Diosan ꞌimicëx Satanás quini chaira anuax chiquíti ꞌicën.

⁸ Chiquítancëxun ca camabi menu ꞌicë unicama paránquin bëtsi oquin sinánmiti ꞌicën. Usoquin ꞌanan ca Gog cacë ꞌapu ꞌimainun Magog cacë ꞌapu ꞌimainun aín unicama paránquin tsuáquirumiquin axa Nucën Papa Diosmi sináncë unicamabëa ꞌacananun timëti ꞌicën. An timëcë unicamax ca ꞌaisamaira ꞌaish parúnpapa masisaribi ꞌiti ꞌicën.

⁹ ꞌËn iscëxun ca tsuácarucëxun mecamanu cuanquin a suntárucaman anua an Nucën Papa Diosan bana cuacë suntárucama ꞌicë, a bëararanan a Nucën Papa Dios cuëëncë ëma, Jerusalén, aribi bëararaxa. Bëararatiabi ca Nucën Papa Diosan naínuax ucë manë tsin a suntárucama cëñuaxa.

¹⁰ Usoquin cëñuanan ca ñunshin ꞌatimanën ꞌapu, an unicama paráncë, a ꞌianëmëꞌëosa manë tsi, anuaxa azufreribi rëquirucë, anu ꞌinun niaxa. Anua ꞌitsa maxcáñu ꞌianan ꞌitsa matúxcañu ñuinacanꞌëo a ꞌimainun bëtsi ñuinacanꞌëo an Nucën Papa Dios rabiquinma ñuinacanꞌëo rabinun quixun unicama paráncë, anu atux ꞌicë ca ñunshin ꞌatimanën ꞌapuribi anu niaxa. Anuxun ca acaman nëtë́nbi imë́bi xënibua ꞌaínbi nëtë́timoquin paë tanquin tëmërati ꞌicën.

Anu Nucën Papa Dios ꞌicë, a bëmánon unicama sëtë́cë isa

¹¹ Usaquin istancëxun cana anua ꞌapu tsóti uxua chaira isan, anu tsócë aribi cana isan. Iscëxbi ca ax anu ꞌain, me ꞌimainun naícama ꞌimainun anu ꞌicë ñucama nëtë́axa, nëtëti ca anua ax ꞌiti ꞌaíma ꞌiaxa.

¹² Usaquinribi isanan cana axa bama unicama, uni cushibu ꞌimainun uni cushimabu, acamaxa baísquitancëx anua Nucën Papa Dios ꞌicë aín bëmánon sëtë́cë isan. A unicamaxa sëtë́mainun ca quirica achúshi, anu ui unicamax cara Nucën Papa Diosbë ꞌiti ꞌicë quixun aín anë cuënëocë, ax bacacë ꞌiaxa. A isanan cana bëtsi quiricacamaribi isan. A quiricacamanu ca añu ñucama cara unicaman ꞌaxa quixun cuënëocë ꞌiaxa. A quiricacama isquin ca Nucën Papa Diosan unin cara upí ñu ꞌaxa, cara upíma ñu ꞌaxa quixun isaxa. Isun ca aín ñu ꞌacësabi oquin mëníonan an ñu upí ꞌacë uni upí ꞌimainuan an ñu upíma ꞌacë unicama tëmëranun ꞌimiaxa.

¹³ Bama unicama ꞌimainun ca parúnpapanuax bacamiquia camaxribi baísquiaxa. Baísquia ca uisoquin cara ñu ꞌatima ꞌaxa, usoquinribi Nucën Papa Diosan uisoquin cara ꞌati ꞌicë usoquin ꞌaxa. ꞌAnan ca uisoquin cara ñu upí ꞌaxa usaribi oquin a upitia bamatimoi abë tsonun ꞌimiaxa.

^14-15 Usaquin ꞌá ꞌain ca bamati ꞌimainun anua uni bamacë ꞌicë ax ꞌianëmëꞌëosa manë tsi rëquirucë anu nicë ꞌiaxa. ꞌImainun ca ui unicamax cara Nucën Papa Diosan nëtënu ꞌinun aín anë cuënëoma ꞌicë, acamaxribi anuax bamatëcëncësa ꞌaish chiquítimoi ꞌinux, ꞌianëmëꞌëosa manë tsinu nicë ꞌiaxa.