Apocalipsis 2 - Kashibo-Kakataibo Biblia

Efesonu ꞌicë unicama quirica buánmia

¹ Catancëxun ca ësaquinribi ꞌë caxa: —An axa Efesonuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: An aín mëcën mëqueu ꞌicë anun mëcën achúshi ꞌimainun rabë́ ꞌispa tuíncë ꞌianan axa mëcën achúshi ꞌimainun rabë́ anu lamparín nanti nëbë́tsi nicë, Jesús, an ca anuaxa timë́cë unicamami ësaquin a caxúnun quixun mi caia:

² Mitsúnmi ñu ꞌacëcama cana ꞌunanin, chiquíshquinma camina ñu upí ꞌain. Uisa ñu cara ꞌicëbëtanbi camina ꞌëmi sinánti ëncëma ꞌain. An ñu ꞌaisama ꞌacë unicama timaquin camina an ꞌacësaribi oquin ꞌaiman. Usai ꞌiquin camina uni raíri axa —ꞌë ca Nucën Papa Diosan aín bana unicama ñuixunun ꞌimia —quicë, ax cara asérabia Nucën Papa Diosan usoquin ꞌimicë ꞌicë quixun ꞌunánuxun isquinbi camina atúxbia cëmëi quia isan.

³ Usai tëmëraquinbi camina mitsun ꞌëmi sinánti ëncëma ꞌain. ꞌËnan ꞌicë cupí unin ꞌatimocëxunbi camina ënquinma ꞌëmi sinánquin ꞌëx cuëëncësabi oquin ꞌan.

⁴ Mitsúxmi usa ꞌicëbi cana ësaquin mitsu cain, mitsux camina ꞌëmi catamëtabati ꞌitsaira ꞌëmi sináncën. Usai ꞌiá ꞌaíshbi camina bërí usai ꞌima.

⁵ Usa ꞌain camina uisairai caramina ꞌëmi sináancë quixun sinani usai ꞌëmi sinántëcënux ꞌëmi sinanatëcënti ꞌain. Usai ꞌëmi sinanaquin camina mitsúnmi ꞌëmi sinánquin ꞌëx cuëëncësabi oquin ꞌásabi oquin ꞌatëcënti ꞌain. Usai mitsux ꞌëmi sinanacëbëtanma cana a anu lamparín nanti mitsu ꞌunántioquin nancë, a raíri ꞌura ꞌinun nanti ꞌain.

⁶ Mitsúnmi bëráma ꞌiásaribiti ꞌëmi sináncëma ꞌaínbi cana ꞌunanin, ꞌëx ꞌicësaribiti camina nicolaítas cacë unicaman ñu ꞌatima ꞌacë cuëëniman.

⁷ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën. An ꞌëmi catamëquin ꞌëx cuëëncësabi oi ꞌiti ëncëma uni, a cana Nucën Papa Diosan nëtënu ꞌicë i, aín bimi a cüax bamatima, a cunun ꞌinánti ꞌain.

Esmirnanu ꞌicë unicama quirica buánmia

⁸ Usaquin catancëxun ca ësaquinribi cuënëonun ꞌë caxa: —An axa Esmiranuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: Axa ñu ꞌaíma pan ꞌain ꞌiá ꞌaish camabi ñu cëñúcëbë usabi ꞌiti, axa bamaxbi bamatëcëntimoi baísquicë, Jesús, an ca ësaquin mi caia:

⁹ Mitsúnmi ñu ꞌacëcama cana ꞌunanin. ꞌËn cana ꞌunanin, mitsux ꞌëmi catamëcë cupí camina tëmëranan ñuñuma unisa ꞌain. Ñuñuma ꞌaíshbi camina ꞌën nëtënu ꞌëbë ꞌaish ñuñu unicamax ꞌicësamaira oi anu ꞌicë ñuñu ꞌaish cuëëinra cuëënti ꞌain. Ësaquin cana ꞌunanin, bëtsi bëtsi uni, —nux cananuna judíos uni ꞌai —quibi judíosma ꞌaish, ñunshin ꞌatimanën ꞌapu, Satanásnën unishi ꞌixun ca ꞌatimati banaquin mitsu ñuia.

¹⁰ Unían bëtsi bëtsi oquin ꞌatimocëxbi camina racuë́tima ꞌain. Ñunshin ꞌatimanën ꞌamicëxun ca raíri unin mitsu sipuati ꞌicën, caramina ꞌëmi sinánti ënti ꞌai quixun isnuxun. Mëcën rabë́ nëtën camina paë tani tëmërati ꞌain. Uisai cara ñu ꞌicëbëtanbi camina anúnmi mitsux bamati nëtë utámainun ꞌëmi sinánti ëntima ꞌain. Usaími ꞌia cana mitsu ꞌën nëtënuaxmi nëtë́timoi ꞌëbë cuëënun ꞌimiti ꞌain.

¹¹ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana ënë aín nuitunënbi sinánquin upí oquin cuati ꞌicën. An ꞌëmi catamëquin ꞌëx cuëëncësabi oi ꞌiti ëncëma uni, ax ca bama ꞌaíshbi baísquitancëx Nucën Papa Diosan nëtënu bamatëcëntimoi ꞌiti ꞌicën. A unicamax ca anu axa ꞌëmi catamëcëma unicama bamatëcëncësa ꞌiti anu ꞌitima ꞌicën.

Pérgamonu ꞌicë unicama quirica buánmia

¹² Usaquin catancëxun ca ësaquinribi cuënëonun Jesusan ꞌë caxa: —An axa Pérgamonuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: Axa machitusa manë xëtocë amo rabë́bi cuënucëñu an ca ësaquin mi caia:

¹³ ꞌËn cana ꞌunanin, anumi mitsux ꞌicë anu ca ñunshin ꞌatimanën ꞌapu, Satanás, ax cushi ꞌicën. Anu ꞌicë unicama an sinánmicëxun ꞌatima ñu ꞌacëbëtanbi camina mitsun ꞌëmi sinánti ëncëma ꞌain. Micama achúshi, Antipas cacë, ax ꞌëmi sinánti ëncëma ꞌixun ꞌë ñuiquin bana ñuixuncë cupía axa ꞌëmi sináncëma unicaman ꞌacë́xa bamacëbëtanbi camina mitsun ꞌëmi sinánti ëncëma ꞌain.

¹⁴ Mitsúxmi usa ꞌicëbi cana ësaquin mitsu cain: Micama raírinën camina unían Balaanën cacëxun ꞌatima ñu ꞌásaribi oquin ꞌain. Balaanën ca an Israel unicama ñusmoisa tancë capitán, Balac cacë, a ësaquin cacëxa: Min menu ꞌicë bënëñuma xanucama camina Israel uni parania atubë ꞌinun cati ꞌain. Usai abë ꞌiquin ca ax isa dios ꞌicë quixuan min unicaman rabicë ñu a rabiquian ñu pinun ꞌimiti ꞌicën. Balaanëan usoquin sinánmia ꞌaían usaribi oquin axa mitsubë ꞌicë uni raírinënribi sinánmicëxun camina mitsu raírinën usaribi oquin ñu ꞌatima ꞌain.

¹⁵ ꞌImainun camina micama rarírinën nicolaítas cacë unicaman ꞌunánmicësaribi oquin ꞌati ëinsama tanin, atúan a ꞌunánmicë bana ꞌëx cuëëncëbëtanmabi.

¹⁶ Usaquin ꞌaquinbi camina sinanaquin acama ënti ꞌain. Usaquinmi ëncëbëtanma cana xënibuiracëma ꞌaínshi mitsunu cuanquin, manë xëtocë ꞌën cuëbínuax chiquícë, anun usa unicama ꞌatimoti ꞌain.

¹⁷ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën. An ꞌëmi catamëquin ꞌëx cuëëncësabi oi ꞌiti ëncëma unicama cana anúan masá nuitutíma upitax ꞌiti a ꞌinánti ꞌain. Bëráma Nucën Papa Diosan camabi nëtën maná cacë piti judíos unicama ꞌinánsaribi oquin cana maná, ꞌën nëtënu unëcë, a unicama ꞌinánti ꞌain. ꞌInánan cana maxax uxua, a unicama achúshi achúshi, anu aín anë itsi cuënëocë, a ꞌinánti ꞌain. Uni itsían ꞌunaniamabi ca acama achúshi achúshinënshi aín anë ꞌunánti ꞌicën.

Tiatíranu ꞌicë unicama quirica buánmia

¹⁸ Usaquin catancëxun ca ësaquinribi cuënëonun Jesusan ꞌë caxa: —An axa Tiatíranuax ꞌëmi catamëcë unicama ꞌë ñui quicë bana ñuixuncë uni, a buánminuxun camina ësoquin cuënëoti ꞌain: Nucën Papa Diosan Bëchicë, axa cushiira ꞌaish aín bëru rabë́ tsi rëquirucë ënxáira iscësa ꞌianan aín taëx cashtá manë́xa niba nibaquicë ꞌaish ichúcësa, an ca ësaquin mi caia:

¹⁹ Mitsúnmi ñu ꞌacëcama cana ꞌunanin, camina ꞌëmi catamëti bëtsibë nuibanani ꞌëx cuëëncësabi oi ꞌin. Uisai cara ñu ꞌicëbëtanbi camina ꞌëmi sinánti ëncëma ꞌain. ꞌËmi catamëtabaquinmi ꞌacësamaira oquin camina bërí mitsun ꞌëx cuëëncësabi oquin ñu ꞌain.

²⁰ Mitsúxmi usa ꞌicëbi cana ësaquin mitsu cain. Bëráma ca Jezabal ax ꞌatima xanu ꞌaíshbi judíos unicaman ꞌapu ꞌiacëxa. Usaribi oquin ca micamáxmi timë́cëbëtan achúshi xanu ꞌatimanën bana ñuixunia. An isa Nucën Papa Dios quicë bana unicama ñuixunia quiquinbi ca axa ꞌëmi sináncë unicama parania. Paránquin ca aín xanuma ꞌaínbia uni xanu itsibë ꞌiti ca asábi ꞌicë quixun ꞌunánmianan ñu ax isa dios ꞌicë quixuan unin cacë a rabiquin ñuina rëcë piti isa asábi ꞌicë quixun unicama ꞌunánmia. An usaquin ꞌatima ñu ꞌanun uni ꞌunánmiabi camina isëshitin.

²¹ Axa usai ꞌiabi cana usa ñu ënía ꞌëmi sinánun caían. Caíncëxunbi ca ëmi catamëquin sinanaquin aín ñu ꞌatima ꞌacë ëncëma ꞌicën.

²² An a xanúan ꞌunánmicësa oquin ꞌacë unicaman usai ꞌiti ëncëma ꞌain cana anua ꞌuxcë anubia ꞌinun a xanu ꞌinsínmiti ꞌain. ꞌAnan cana axa a xanubë ꞌicë unicamaribi ꞌaisamairaia tëmëranun ꞌimiti ꞌain.

²³ ꞌAnan cana a xanun ꞌunánmicë ꞌixuan an ꞌatima ñu ꞌacë unicamaribi aín tuása ꞌicë acama bamamiti ꞌain. ꞌËn usaquin ꞌacëbëtan ca camabi ëmanu ꞌicë axa ꞌëmi catamëcë unicaman ꞌunánti ꞌicën, ꞌën cana camabi unían sináncë ñu ꞌunanin, uisaquin cara aín nuitu mëu sinania quixunribi cana ꞌunanin. ꞌUnánquin cana an upí oquin sinánquin ñu ꞌacë uni axa upitax ꞌinun ꞌimianan, an ꞌatima ñu ꞌacë uni a aín ꞌucha cupí uisoquin carana ꞌati ꞌai usoquin ꞌati ꞌain.

²⁴ ꞌItsa uníxa usai ꞌicëbëtanbi camina Tiatíranu ꞌicë mitsu raírinën aín bana ca cëmë ꞌicë quixun ꞌunánquin a xanun bana cuacëma ꞌain. Bëtsi bëtsi uníxa, nun cananuna mitsun ꞌunáncëma ñu, ñunshin ꞌatimanën ꞌapúan nu ꞌunánmicë, a mitsu ꞌunánmiti ꞌai quiabi camina a ꞌunántisama tan. Mitsúxmi usai ꞌiti ca asábi ꞌicën. Usaíbi camina ꞌiti ꞌain. Bëtsi ñumi ꞌanun cana mitsu caiman.

²⁵ ꞌËx utëcëntámainun camina usabii ꞌiti ꞌain.

²⁶ Axa aín bamati nëtë utámainun ꞌëmi catamëquin ꞌëx cuëëncësabi oi ꞌiti ëncëma uni, acama cana ꞌëx utëcënquin aín cushi ꞌixun camabi menu ꞌicë unicaman aín bana cuaquin aín quicësabi oquin ꞌanun ꞌaminun ꞌimiti ꞌain.

²⁷ ꞌËn Papa Diosan aín cushi ꞌë ꞌináncësabi oquin cana a unicama ꞌën cushi ꞌinánquin unían aín bana cuanun ꞌimiti ꞌain. ꞌËn usaquin ꞌimicëxun ca atun, camabi unían aín bana cuanun ꞌimiti ꞌicën, uni itsían uni itsi aín bana cuanun quixun aín manë xo tuínxun racuë́ocësaribi oquin.

²⁸ Pëcaracëbëtan ca ꞌisponën pëcaia. A ꞌispon cana axa ꞌëmi catamëquin ꞌëx cuëëncësabi oi ꞌiti ëncëma unicama ꞌinánti ꞌain.

²⁹ An cuaisa tancë unicaman ca axa ꞌëmi catamëcë unicama Nucën Papa Diosan Bëru Ñunshin Upitan ꞌináncë bana, ënë aín nuitunënbi sinánquin upí oquin cuati ꞌicën.