Apocalipsis 19 - Kashibo-Kakataibo Biblia

¹ Usaquian ꞌan cana ꞌaisamaira uníxa naínuax munuma sharati banaia cuan, ësai qui: Nucën Papa Dios cananuna munuma banaquin rabin. Axa ꞌApuira ꞌaish cushiira an ca uni ainan ꞌinun ië́miaxa quiquin ca camabi unin a rabiti ꞌicën.

² Ax aín sinan upíira ꞌixun ca uisa cara oti ꞌicë usoquin ꞌaia. Ñu ꞌatima cuëënquinma ca usoquin ꞌaia. Usa ꞌixun ca Babilonia ëmanu ꞌicë unicama, an camabi menu ꞌicë unicama ꞌatima ñu ꞌanun ꞌunánmianan ami sinánxma ꞌinun ꞌunánmicë cupí acama ꞌuchoquin castícanxa. Usaquin ꞌaquin ca an aín unicama ꞌacë unicama cupiaxa.

³ Usai quianan ca ësairibi quitëcëanxa: —Nucën Papa Dios cananuna munuma banaquin rabin. Nëëmëti ca Babilonia bënamëtima ꞌicën. Usa ꞌaish ca xënibua ꞌaínbi aín tsin cuin nëtë́tima ꞌicën.

⁴ Usai ꞌimainun ca mëcën rabë́ ꞌimainun taë rabë́ ꞌimainun rabë́ ꞌimainun rabë́ caniacëcë unicama ꞌimainun axa ꞌitsa bëruñu rabë́ ꞌimainun rabë́ ñu, axribia bamatimoi tsócë, acaman ca aín bëmánon meu bësuquin Nucën Papa Dios, ꞌApuira, a rabi cuëënquin caxa: —Usai ca ꞌiti ꞌicën. Miishi cananuna munuma banaquin rabin.

⁵ Cacë́xa anu Nucën Papa Dios ꞌicë anuax ësai banaia cana cuan: An axa cuëëncësabi oquin ꞌacë unicama, aín cushibu ꞌimainun aín cushimabu, mitsun camina camaxunbi Nucën Papa Dios rabiti ꞌain.

Carnero ꞌicësaribitia unin ꞌucha cupí bama, a unin xanu bicësa isá bana

⁶ Usai quicëbëtan cana ꞌaisamaira uni munuma cushin banacësari banaia cuan. A banax ca baca xuqui cushíinra banarucësari ꞌianan caná munuma banacësaribi ꞌiaxa. Ësai banaia cana cuan: Nucën ꞌIbu Dios axa aín cushi chaira ꞌaish bëtsi cushisama, ax ca ꞌApuira ꞌicën. A cananuna munuma banaquin rabin.

⁷ Cuëëinra cuëënquin a rabinun ca rabican. Anúan a Carnero ꞌicësaribitia unin ꞌucha cupí bama, ax aín unicamabë biránanti nëtë ca uaxa. Aín unicamax ca abë ꞌinux mëníocaxa, unían biti xanúxa aín bënëbë biránanux upiti mëníocacësaribiti.

⁸ Usa ꞌain ca aín unicama chupa chuañuma, uxua upíira pañucësa ꞌicën. Banaia ësai quia cana cuan. Axa Jesucristomi catamëcë unicaman pañucë chupa, ax ca aín nuitu upí ꞌixun upí ñu ꞌacë a ꞌunántiocë ꞌicën.

⁹ Usai quicëbëtan ca ángelnën ꞌë caxa: —Ësaquinribi ca cuënëot: “Uicamax cara Carnero ꞌicësaribitia unin ꞌucha cupí bama, anúan aín unicama abë ꞌiti nëtë́an abë ꞌinun camicë ꞌicë, acamax ca cuëëinra cuëënti ꞌicën, unían xanu biquin abëtan pi unun camicë unicamax cuëëncësamaira oi”. Ësaquinribi ca ꞌë caxa: —Ënë bana a ꞌën mi cacë ax ca Nucën Papa Diosaxa quicë ꞌicën. Ca asérabi ꞌicën.

¹⁰ Quicëbë cana a rabinux a ángel tanáin rantin purúan. Usai ꞌiabi ca ꞌë caxa: —Usai ꞌiáxma ca ꞌit. Uicaman cara Nucën Papa Dios quicë bana unicama ñuixunia an ca Jesús ñuiquin an ꞌunánmicë banacama uni ñuixunia. Mibëtan ax Jesús quicë banacama quicësabi oi ꞌicë unicaman ꞌacësaribi oquin cana ꞌënribi ax quicësaribi oquin ꞌaquin Nucën Papa Dios rabin. Usa ꞌain ca ꞌë rabixunma Nucën Papa Diosëshi rabit.

Axa caballo uxuanu tsócë

¹¹ Usaquin ángelnën cacëxun cana naí panárabëcë isan. Anuaxa caballo uxua chiquitia cana isan. Ax a caballonu tsócë, ax ca Aín Quicësabi Oquin ꞌAcë caquin anëcë ꞌianan ca An Uni Paráncëma caquin anëcë ꞌiaxa. Usa ax ꞌixun ca ꞌatima unicama a uisoquin cara ꞌaisa tania usoquin castícanan axa upí sinánñucama a upí oia.

¹² Aín bëru rabë́ ca tsi rëquirucë ënxáira iscësa ꞌiaxa. Axa asérabi ꞌapuira ꞌain ca ꞌapun mañuti ꞌitsaira aín maxcánu ꞌiaxa. Aín anë cuënëocë ꞌicë ca uinu ꞌicë unínbi uisai quicë cara a ꞌicë quixun ꞌunántima ꞌicën, ainshi ca ꞌunania.

¹³ Aín chupa ca imin pucucë ꞌiaxa. Ax ca aín anë Nucën Papa Diosan Bana caquin anëcë ꞌiaxa.

¹⁴ Axa naínu ꞌicë caballo uxuanu tsócë ax chiquitia ca aín caballo uxuanu tsotax naínuax chiquíquin axa abë ꞌicë unicaman a nuibianxa. An nuibiancëcamax ca chupa uxua upíira upí chuañuma pañucë ꞌiaxa.

¹⁵ Ax pain chiquícë aín cuëbínuaxa machítusa manë xëtocë chiquitia cana isan. A manë xëtocë ax ca camabi menu ꞌicë axa ami sináncëma unicama anun ꞌati ꞌiaxa. Ax cushi ꞌixun ca camabi menu ꞌicë unían aín bana cuanun ꞌimiti ꞌicën. ꞌImainun ca ax cushiira ꞌixun axa ami nishcë unicama Nucën Papa Diosan mëníosabi oquin castícanti ꞌicën, uvas bimia taën chacacëx cëñúcësaribi ꞌinun.

¹⁶ Aín chupanu ꞌimainun ca aín quisinuribi ësaquin cuënëocë ꞌiaxa: “ꞌApucaman ꞌApu ꞌianan ꞌibucaman ꞌIbu”.

¹⁷ Usaquin istancëxun cana ángel achúshi barinu nicë isan. An ca munuma banaquin axa me manámi nuáncë ñu pëchiucama ësaquin cuëanxa: —Ca ut, Nucën Papa Diosan mitsúnmi pinun mëníocësabi oquin nami pinux ca timëti ut.

¹⁸ ꞌApucama ꞌimainun suntárunën capitáncama, ꞌimainun aín cushi unicama, ꞌimainun axa caballonu tsócë unicama a ꞌimainun atun caballocamaribi, ꞌimainun an uni ñu mëëxuncëma unicama, ꞌimainun an uni ñu mëëxuncë unicama, ꞌimainun aín cushima unibu, ꞌimainun aín cushi unibu acama bamacë pi ca ut.

¹⁹ Usaquin caia cuatancëxun cana ñuinacanꞌëo, ꞌimainun camabi menu ꞌicë ꞌapucamacëñun aín suntárucama ꞌacananuxa tsuáquirui timë́cë isan. Acamax ca aín suntárucamabë axa caballo uxuanu tsócë abë ꞌacananuxa timë́cë ꞌiaxa.

²⁰ ꞌAcanánia ca ñuinacanꞌëo acëñun a rabiquian Nucën Papa Dios rabixunma ꞌanun quixun an unicama paráncë ñuinacanꞌëo aribi bicanxa. An usoquin unicama paráncë ñuinacanꞌëo ax ca an bëtsi ñuinacanꞌëo ꞌitsa maxcáñu an ismainun unin ꞌacëma ñu ꞌaquin uni paran a ꞌiaxa. Ax ca an ꞌitsa maxcáñu ñuinacanꞌëonan ꞌicë ꞌunántioquin cuënëocë unicama, ꞌimainun an a tanquin ꞌacë ñu rabicë, acama paran a ꞌiaxa. ꞌAcananquin bitancëxun ca a ñuinacanꞌëo rabë́ ꞌianëmëꞌëosa manë tsi anuaxa azufre ꞌimainun manë tsi rëquirucë anu ꞌinun niaxa.

²¹ A rabë́a anu ꞌinun nicë ꞌain ca axa caballo uxuanu tsócë an aín cuëbínuaxa chiquícë manë xëtocë anun axa ꞌacananux timë́cëcama cëñuquin ꞌaxa. Usaquian ꞌacë aín nami pi ca camabi ñuina pëchiucamax pucháxa.