Apocalipsis 18 - Kashibo-Kakataibo Biblia

Babilonianu ꞌicë unicama ñusmo

¹ Usai ꞌicëbëtan cana bëtsi ángel naínuax aia isan. Ax cushiira ꞌixun ca aín pëcacën mecama pëcaxa.

^2-3 Ai ca munuma banai quiaxa: —Babilonianu ꞌicë unicaman ꞌaisamaira oquin ñu ꞌatima ꞌacë ꞌixun ca bëtsi mecamanu ꞌicë unicamanribia usaquin ꞌanun sinánmiaxa. Camabi nëtënu ꞌicë ꞌapucamaxribi ca Babilonianu ꞌicë unicaman ꞌaia isi aín unicamabë usaribiti ꞌi cuëëanxa. Babilonianu ꞌicë an ñu marucë unicamax ca ꞌitsa ñu upíira ꞌimainun cupíira bianan maruanan aín nuitunën upí oquin sinanima ꞌitsa curíquiñuishi ꞌiti sinánxa. Atúxa usai ꞌia isi ca camabi menu ꞌicë an ñu marucë uni, Babilonianu ꞌicë ñu biquin marui ꞌitsa curíquiñu ꞌiaxa. A ëmanu ꞌicë unicamaxa usai ꞌi ꞌaisama ꞌicë ca Nucën Papa Diosan ñusmoxa. Ñusmocëbë ca anu ꞌicë xubucama rurucubuaxa. Usa ꞌain ca ñunshin ꞌatimacama anu bërí ꞌia, uisaira ñunshin ꞌatimacama cara, ax ca anu ꞌia, ꞌimainun ca uisa ñu pëchiu ꞌatima cara unin cuëëncëma, axribi anu ꞌia.

⁴ Usai naínuax ucë ángel quicëbëtan cana naínuaxa bëtsi banan banaia cuan, ësai quicë: —ꞌËn unicamax, mina anu ꞌicë unicama ꞌicësaribiti ꞌuchain camina a ëmanuax cuanti ꞌain, a unicama atun ꞌucha cupí tëmëramicësaribi oquin mitsuribi tëmëramiti rabanan.

⁵ Atun ꞌucha ca ꞌaisamaira ꞌicën, ñu manámi chaioruquin bucúncësa ca ax ꞌicën. Usa ꞌicë ca Nucën Papa Diosan atun ꞌuchacama manuquinma sinánxa.

⁶ Anu ꞌicë unicaman uni raíri tëmëramicësaribi oquin camina mitsun atu tëmëramiti ꞌain. Atúan uni raíri tëmëramicësamaira oquin camina aturibi tëmëramiti ꞌain.

⁷ Anu ꞌicë unicaman rabíquin, —nux cananuna bëtsi unicamabëtan sënë́nmaira ꞌai —quixun sinánan atux cuëëncësabi oquinshi ꞌaiabi camina acama ꞌaisamairai tëmëranun ꞌimiti ꞌain. Atun ca “ꞌën cana casunamëcë xanun ꞌacësoquin tëmëratima ꞌai” quixun sinania.

⁸ Usaquian sináncëbëbi ca anúan atu tëmëramiti nëtë uti ꞌicën. A nëtën ca ꞌitsa uni bamati ꞌicën. ꞌImainun ca raíricamax rarumati tëmëranan ꞌacëñuma ꞌaish bamatisa tanti ꞌicën. A nëtën ca a ëmacamax tsin picë ꞌiti ꞌicën. Usaquin ca Nucën ꞌIbu Diosan ax cushiira ꞌixun atun ꞌuchacama cupí atu ꞌuchoquin castícanti ꞌicën. Usai náinuaxa banaia cana cuan.

⁹ Bëtsi ꞌapucama, an aín unicamaribia Babilonianu ꞌicë unicaman ñu ꞌatima ꞌacësaribi oquin ꞌanun ꞌamicë, ax ca Babilonia tsin piquin cëñucëbëa, aín cuin tëxë́ruia isi, munuma rarumati inti ꞌicën.

¹⁰ Ianan ca racuëti ꞌuracëox quiti icën: —Usai ꞌimari ꞌitibi camina ꞌin. Babilonia chaira, mix bëtsi ëmasama ꞌiá ꞌaíshbi camina bënëtishi Nucën Papa Diosan ꞌuchoquin castícancë ꞌain. Usai ca ꞌapucama quiti ꞌicën.

¹¹ A ëmanu ꞌicë unicamaxa cëñúcë ꞌain ca camabi menu ꞌicë an ñu marucë unicama rarumati inti ꞌicën, bëría an atun ñu maruti ꞌaíma ꞌain.

¹² Ñu curi ꞌacë, manë uxua ꞌacë, maxax upíira upí ichúcësa, perlas, chupa xapu ꞌacësa upí oquin xëocë, bëtsi chupa minanën pucucësa, chupa ushían, acama ꞌimainun bëtsi bëtsi sanu i, elefante xëta ꞌacë ñu, cupíira cupí ñu, i ꞌacë, ꞌimainun cashtá manë ꞌacë ꞌimainun bëtsi manë ꞌacë ꞌimainun upíira maxax uxua ꞌacë acama,

¹³ ꞌimainun sanu ro, i baca sanuira oquin ꞌacë, tsëpasa ꞌaíshbi nëëncëx sanuira ñu, vino, xëni, trigo, trigo rëncë, acama ꞌimainun a ñu papimiti ꞌaracacë ñuina ꞌimainun carnero, caballo, caballonëan niquincë auto, ꞌimainun uni, an uni itsi ñu ꞌaxúnun maruti, a ñucama bëia —an biti ca bërí ꞌaíma ꞌicë —quixun sinani ca an usa ñu marunuxun bëcë unicamax rarumati inti ꞌicën.

¹⁴ Inquin ca ësaquin a ëmanu ꞌicë unicama cati ꞌicën: —Anúnmi cuëëan bimiñuma camina ꞌain. Mitsun ñu upícama ꞌimainun mitsun ñun curánacama ca cëñuti nëtë́axa, camina acama istëcëntima ꞌain.

¹⁵ Usa ꞌain ca an axa Babilonianu ꞌicë unicama ñu ꞌinánquin ꞌitsa curíqui bicë unicama racuëti ꞌura sëtëtax rarumati inti ꞌicën.

¹⁶ Iní ca ësai quiti ꞌicën: —ꞌImari ꞌitibi ca ꞌiaxa. A ëma cha anu ꞌicë unicamax ca xanun atun chupa upíira upí minanën pucucësa ꞌimainun ushíanën pucucë pañucësa ꞌiaxa. ꞌIanan ca xanu ñu cupíira cupí, curi ꞌacë, maxax upí ꞌacë, ꞌimainun perla, po namë́ iscësa, usa ñucaman mëníocacësa ꞌiaxa.

¹⁷ Usa ꞌaínbi ca bënëtishi a ñu cupíira cupí ax cëñúaxa. Usai quicëbë ca ax manë nuntiñu ꞌicë unicama, ꞌimainun an a nunticama niquincë unicama, ꞌimainun axa a nunticaman cuancë unicama ꞌimainun parúnpapan bëtsi bëtsi nëtënua maruti ñu bënux cuancë unicamaxribi ꞌura sëtë́axa.

¹⁸ Sëtëtax ca a ëma usoquin nëëncë́xa aín tsin cuin tëxë́ruia isi cuëëncëni ësai quiaxa: —Uinu ꞌicë ëmáxbi ca ënë ëmasama ꞌiaxa.

¹⁹ Quianan ca masá nuitucë uníxa ꞌicësaribiti me cupúcë bitancëx aín maxcánu mapucuti rarumati ini quiaxa: —Usai ꞌimari ꞌitibi ca ꞌia. A ëmanu ꞌicë unicamax ꞌaisamaira curíquiñu ꞌixun ca an aín manë nuntin maruti ñu bëcë unicaman ñu biaxa. Bicëbë ca a unicamaxribi ꞌaisamaira curíquiñu ꞌiaxa. Usa ꞌaínbi ca bënëtishi a ëmanu ꞌicë unicamax cëñúaxa.

²⁰ Usai quianan ca ësairibi quiaxa: —Aín unicama paë tanmiquin tëmëramicë, a cupíquin ca Nucën Papa Diosan Babilonianu ꞌicë unicama cëñuaxa. Usaquin ꞌan ca naínu ꞌicëcama, ꞌimainun an aín bana ñuixunun Jesusan caíscë unicama, ꞌimainun an Nucën Papa Diosan bana uni ñuixuncë unicama, ꞌimainun axa ami catamëcë aín unicama, camáxbi cuëënti ꞌicën.

²¹ Usai a unicamax quicëbëtan ca anun ñu bacati cushiñu ángel achúshinën maxax chaira, anun ñu rënti maxáxsa, a biquin parúnpapanu niaxa. Ni ca quiaxa: —A maxax istëcëntimoquin nicë usaribi ca Babilonia, a ëma chaira, ꞌimainun anu ꞌicë unicamaxribi unin a istëcëntimoquin cëñucë ꞌiti ꞌicën.

^22-23 Anu ꞌicë, an ñu marucë unicama bëtsi menu ꞌicë an ñu marucë unicamasama ꞌaish, ñubë́ ꞌixun ca camabi menu ꞌicë unicama paránquin ꞌatima ñu ꞌamiaxa. Usa ꞌaínbi ca Babilonia ëma cha anuxun arpa cacë ñua raírinën ꞌamainun raírinënribi pacon banomainun bëtsi bëtsi ñucamaribi ꞌai cuëëni sharatia unin cuatëcëntima ꞌicën. An i ꞌanan manë uniocë unían anuxun ꞌatëcënti ca ꞌaíma ꞌiti ꞌicën. An ñu rëncë xanúan ñu rënquin tarúncaia ca unin cuatëcëntima ꞌicën. Anun xubucama pëcati lamparín ca ꞌaíma ꞌiti ꞌicën. Unin xanu biti nëtë ca ꞌitëcëntima ꞌicën.

²⁴ An Nucën Papa Dios quicë bana uni ñuixuncë unicama ꞌimainun axa ami sináncë unicama ꞌimainun camabi menu ꞌicë unia unin ꞌacë, ax ca Babilonianu ꞌicë unicaman ꞌucha ꞌiaxa. Usa ꞌain ca Babilonianu ꞌicë unicama Nucën Papa Diosan cëñuaxa.