Apocalipsis 17 - Kashibo-Kakataibo Biblia

ꞌAtima xanu ñuibi Babilonia ꞌatimoti ñui quia bana

¹ Usai ꞌicëbëtan ca xanpañu mëcën achúshi ꞌimainun rabë́ ángelcama, a achúshinëx ꞌënu uquin, xanu ñuicësoquinbi Babilonia ñuiquin ësaquin ꞌë caxa: —ꞌAisama ꞌaish ca Babilonia ëmanu ꞌicë unicamax ënë xanusa ꞌicën. Ca ut. Mi cana xanu ꞌatima, axa parúnpapa camánan tsócë, a cara aín ꞌucha cupí uisoquin Nucën Papa Diosan castícanti ꞌicë quixun mi ismiti ꞌain.

² A ëmanu ꞌicë unicaman ca bëtsi menu ꞌicë unicamacëñun atun ꞌapuburibi, atun ꞌacësaribi oquian ñunshínquin ꞌatima ñu ꞌanun ꞌamiaxa.

³ Usaquin catancëxuan ángelnën, namáquin iscësa oquin isnun anu uni ꞌicëma menu ꞌë buáncëxun cana xanu achúshi ñuinacanꞌëo ushían a camánan tsócë ꞌisan. A ñuinacanꞌëo anu ca ꞌitsa anë cuënëocë ꞌiaxa, anë ꞌaisama, Nucën Papa Diosmi ꞌatimati banacë ca a anëcamax ꞌiaxa. Usa ꞌaish ca aín maxcácama mëcën achúshi ꞌimainun rabë́ ꞌaish aín matúxcacama mëcën rabë́ ꞌiaxa.

⁴ A xanu anu tsócë ax ca aín chupa minanën pucucësa ꞌimainun ushían ꞌiaxa. ꞌImainun ca ñun curánan curi ꞌacë ꞌianan maxax upíira upí ꞌacë ꞌianan perla pañucë ꞌixun curi ꞌacë xanpa tuíncë ꞌiaxa. A xanpanu ca aín ñu ꞌaisama ꞌacëcama purucësa ꞌiaxa.

⁵ Usa ꞌaish ca aín bëmánanu achúshi anë unin ꞌunáncëma ꞌaíshbi ësai quicë ꞌiaxa: “Ënë ëma cha, Babilonia, ax ca ꞌaisama xanusaribi ꞌicën. Usa ꞌaish ca a an ꞌunánmicë ꞌaish camabi uni ꞌimainun xanu, an nu ꞌaisama ꞌacë aín titasa ꞌicën”.

⁶ A xanúxa, Nucën Papa Diosan uni ꞌicëa unin ꞌacë ꞌimainun an Jesucristo ñuiquin uni bana ñuixuncë cupía unin ꞌacëx bamacë unicaman imi xëax, anun paë́anx cuëëinra cuëënia cana isan. Isi, cana ratúira ratúan.

⁷ Ratutiabi ca xanpa tuíncë ángelnën ꞌë caxa: —¿Uisacatsi caramina ratutin? A xanu ꞌimainun ñuinacanꞌëo anu a xanu tsócë, axa aín maxcá mëcën achúshi ꞌimainun rabë́ ꞌianan aín matúxca mëcën rabë́, a rabëtax cara uisa ꞌicë quixuan unin ꞌunáncëbëtanmabi cana mi ꞌunánmiti ꞌain.

⁸ A ñuinacanꞌëo a min iscë, ax ca ꞌiacëxa, ꞌaíshbi ca bërí ꞌaíma ꞌicën. Ca quini cha nëmíinra anu ꞌicën. Anu ꞌaíshbi ca anu xënibua ꞌaínbi paëira tani tëmërati anu cuanux, quini cha nëmíinra anuax chiquíti ꞌicën. A ñuinacanꞌëo anua xanu tsócë, axa parúnpapanu ꞌia, axa anu ꞌiá, ꞌaíshbi nëtë́a ꞌaish utëcënia isi ca a Nucën Papa Diosan nëtënu ꞌiti oquin nëtë ióñubi aín anë cuënëoma unicama, ax ratúira ratúti ꞌicën.

⁹ Sinánñu ꞌixun camina ꞌën mi cacë bana upí oquin cuati ꞌain. Ënëx ca ësa ꞌicën: Anua xanu tsócë ñuinacanꞌëo, aín maxcácama mëcën achúshi ꞌimainun rabë́, acamax ca matá me mëcën achúshi ꞌimainun rabë́, anu a xanu tsócë, asaribi ꞌicën.

¹⁰ Usa ꞌaish ca mëcën achúshi ꞌimainun rabë́ ꞌapucama asaribi ꞌicën. A ꞌapucamax ca mëcën amo ꞌicë sënën, axira paían cushi ꞌicë axa bamacëbë bamacëbë ꞌapu ꞌiacëxa. Achúshinëx ca bërí usaribi ꞌapu ꞌicën, bëtsi ca ꞌicëma pain ꞌicën. Ax ca ꞌapu ꞌaíshbi xënibunuxunma ꞌaia.

¹¹ Acamax achúshi achúshinëx ꞌicëbë ca acama ꞌicësaribi ꞌaíshbi bëtsi axribi ꞌapu ꞌiti ꞌicën. Ax ca ñuinacanꞌëo, anu a xanu tsócë, axa ꞌiá ꞌaíshbi nëtë́cë, a ꞌiti ꞌicën. ꞌApu ꞌitancëx ca anu ax xënibua ꞌaínbi paëira tani tëmërati anu cuanti ꞌicën.

¹² A ñuinacanꞌëon matúxca mëcën rabë́ isquin camina mëcën rabë́ ꞌapu sinánti ꞌain. Ax ꞌapu ꞌaíshbi ca ꞌapu ꞌicëma pain ꞌicën. Atux ca a ñuinacanꞌëo abë ꞌapu ꞌiti ꞌicën, ꞌaíshbi ca xënibuti ꞌima achúshi horaishi ꞌapu ꞌiti ꞌicën.

¹³ A mëcën rabë́ ꞌapucaman ca raírinën sináncësaribi oquin sinania. Acaman ca a ñuinacanꞌëon cacësabi oquin ꞌanan atúan ꞌibuacë unicama usaribi oquin ꞌanun ꞌamiti ꞌicën.

¹⁴ Acamax ca Carnero ꞌicësaribitia unin ꞌucha cupí bama abë ꞌacananti ꞌicën. ꞌAcananquin ca Carnero ꞌicësaribitia unin ꞌucha cupí bama, ax cushiira ꞌaish, ꞌibucaman ꞌIbu ꞌianan ꞌapucaman ꞌApu ꞌixun axa abë ꞌacanancëcama ñusmoti ꞌicën. Axa abë ꞌicëcaman ca a amia catamënun caísquin Nucën Papa Diosan sinánmicë ꞌixun uisai cara ñu ꞌicëbëtanbi a ëncëma ꞌicën. Usa ꞌixun ca Carnero ꞌicësaribitia unin ꞌucha cupí bama abë ꞌicëcaman axa abë ꞌacanancëcama ñusmoti ꞌicën.

¹⁵ Usaquin catancëxun ca ángelnën ësaquin ꞌë catëcëanxa: —Parúnpapacama, anua ꞌatima xanu tsócë, a isquin camina ꞌaisamaira uni, camabi menu ꞌicë unibu ꞌianan camabi banan banacë unibu acama sinánti ꞌain.

¹⁶ A mëcën rabë́ matúxca a isquinmi mëcën rabë́ ꞌapu sináncë, acaman ca ami nishquin a xanu ñusmoti ꞌicën. Ñusmonan ca chupañuma ꞌimianan aín nami pianan tsin nëënti ꞌicën.

¹⁷ Usaía ꞌinun ca Nucën Papa Diosan a mëcën rabë́ ꞌapucama bëtsin sináncësaribi oquían sinánun ꞌimiaxa. Nucën Papa Diosan ꞌimicëxun ca atun, anua a xanu tsócë ñuinacanꞌëon cacësabi oquin ꞌanan atúan ꞌibuacë unicama usaribi oquin ꞌanun ꞌamiaxa. Aín banacama sënë́ntamainun usai ꞌinun ca Nucën Papa Diosan ꞌimiaxa.

¹⁸ Ami iscë xanu a sinánquin camina ëma cha, anu ꞌicë unicama ꞌaisama ꞌixun camabi menu ꞌicë ꞌapucama ꞌimainun atun unicama, asaribia ꞌinun ꞌunánmicë, a sinánti ꞌain.