Apocalipsis 16 - Kashibo-Kakataibo Biblia

Anun uni paë tanmiti xanpanu ꞌicë ñucama ñui quicë bana

¹ Usai ꞌicëbëtan cana anuxun Nucën Papa Dios rabiti xubu ꞌucë mëúcüax munuma banaquin a ángelcama caía ësai quia cuan: —Mitsun xanpa buani camina anu ꞌicë ñucama, anun Nucën Papa Diosan an ñu ꞌatima ꞌacë unicama castícanti, acama menu tutucai cuanti ꞌain.

² Cacëx cuanxun ca achúshi ángelnën pain aín xanpanua ꞌicë ñu menu tutucaxa. Tutucacëbë ca uicamax cara axa parúnpapanuax uax ꞌirucë ñuinacanꞌëonan ꞌicë ꞌunántioquin cuënëocë, ꞌianan a tanquian a iscësa oquin unin ꞌacë ñu rabicë unicamanu ꞌaisamaira chancu ꞌiruaxa. Usai ꞌiquin ca aín nami chëquimiquin ꞌaisamaira oquin paëoxa.

³ Usai ꞌicëbëtan ca bëtsi ángelnën aín xanpanu ꞌicë ñu parúnpapanu tutucaxa. Tutucacëbë ca parúnpapa, uni bamacënën imisa ꞌiaxa. Parúnpapa axa imi ꞌain ca anu ꞌicë ñuinacama bamaxa.

⁴ Usai ꞌicëbëtan bëtsi ángelnënribi aín xanpanu ꞌicë ñu bacacamanu ꞌanan xëxácamanu tutucacëbë ca a ꞌunpáxcamaribi imi ꞌiaxa.

⁵ Usaía ꞌunpáxcama ꞌicëbëtan cana an bacacama iscë ángel ësai quia cuan: —Nucën ꞌIbu Dios ꞌaish ca min sinan usabi asérabi upíira upí ꞌicën. Mix camina usabi ꞌiá ꞌaish usabi ꞌain. A ꞌunpáxcamami usoquin imi ꞌimia isquin cana ꞌunan, min sinan upí ꞌixúnmi ñu ꞌaisama cuëëncëma cupí camina usoquin ꞌan.

⁶ Minmi usoquin tëmëramicë unicama an ca min uni ꞌitsaira ꞌanan an mixmi quicë bana uni ñuixuncë uni ꞌitsaira bamamiaxa. Usaquian ꞌacë cupí camina a xëanun imi ꞌinan. Atun ꞌucha cupíbi ca usai ꞌia.

⁷ Usaquin cuanan cana anuxun tsëpasa ñu sanutanun nëënti, anuax ësai qui banaia cuan: —Usa ca. Nucën ꞌIbu Dios ꞌaish camina min cushi chaira ꞌaish, bëtsi cushisama ꞌain. Min sinan upíira ꞌixun camina uisa caramina oti ꞌai usoquin ꞌan. Mixmi ñu ꞌatima cuëëncëma cupí camina usoquin ꞌan.

⁸ Usai ꞌicëbëtan ca bëtsi ángelnënribi aín xanpanu ꞌicë ñu tutucaquin barinu anpë́ncaxa. Anpë́ncacëbëtan ca cushiira pëquiquin, barin ꞌitsisan unicama xaronun Nucën Papa Diosan ꞌimiaxa.

⁹ Usoquian ꞌaisamaira oquin ꞌitsis oquin xarocëxunbi ca unicaman sinanaquin atun ñu ꞌaisama ꞌacëcama ëncëma ꞌicën. Ëníma ꞌianan ca Nucën Papa Dios rabicëma ꞌicën. Nucën Papa Diosan ca anúan atu castícancë ñucama nëtë́ntsianxa. Usaquian ꞌati ꞌaíshbi ca sinanatíma ami xuamati nishi Nucën Papa Diosmi ꞌatimati banaxa.

¹⁰ Usai ꞌicëbëtan ca bëtsi ángelnënribi aín xanpanu ꞌicë ñu, anua parúnpapanuax uax ꞌirucë ñuinacanꞌëo ꞌicë, anu tutucaxa. Tutucacëbë ca anua an ꞌibuacë unicama ꞌicë ax bëánquiaxa. Usai ꞌicëbëtan ꞌaisamaira oquin paë tani ca aín unicama bënë́axa.

¹¹ Paë tani bënë́quin ca aín paë ꞌimainun aín chancu ꞌaisamaira ꞌain, axa naínu ꞌicë Nucën Papa Dios, ami nishi ꞌatimati banaquin ñuiaxa. Usai ꞌi ca ñu ꞌatima ꞌati ëni sinanacëma ꞌicën.

¹² Usai ꞌicëbëtan ca bëtsi ángelnënribi aín xanpanu ꞌicë ñu Eufrates bacanu tutucaxa. Tutucacëbë ca aín ꞌunpax ësquiaxa, aucüaxa bari urucë menu ꞌicë ꞌapucamaxa anun unun.

¹³ Ësaquin isanan cana capë́sa ñuina chaira, ꞌimainun parúnpapanuax uax ꞌirucë ñuinacanꞌëo, ꞌimainun an Nucën Papa Dios rabiquinma ñuinacanꞌëo rabinun quixun unicama paráncë, acaman cuëbínuaxa ñunshin ꞌatima, tuan tita iscësa ñu rabë́ ꞌimainun achúshi chiquitia isan.

¹⁴ A ñunshin ꞌatimacama tuan tita iscësa, acaman ca unicama paránuxun unin ꞌacëma ñu ꞌaxa. Usoquin ꞌanan ca camabi menu cuanquin, anu ꞌicë ꞌapucama aín suntárucamaxa bëtsi menu ꞌicë suntárubë ꞌacananux tsuáquirunun sinánmiaxa. Usa ꞌixun ca camabi uni timëaxa, axa aín cushi chaira ꞌaish bëtsi cushisamaira Nucën Papa Dios, an anun ꞌaisamaira oquin atu castícanti nëtë sënë́ncëbëtan.

¹⁵ “Ësai ca ꞌiti ꞌicën: An ñu mëcamacë uníxa unin sináncëma ꞌaínbi ꞌicësaribicuatsini cana ꞌëx uti ꞌain. ꞌËx ucëbë ca an upí ñu ꞌaquin ꞌëx uti caíncë uni, ax cuëënti ꞌicën. Ax ca chupa upí pañucësa ꞌaish rabíntima ꞌicën. Usa ꞌaish ca chupañuma ꞌicëa uni raírinën iscë́xa uni rabíncësaribi ꞌitima ꞌicën”.

¹⁶ Ñunshin ꞌatimacama tuan tita iscësa, an sinánmicëx ca camabi menu ꞌicë ꞌapucama ꞌimainun aín suntárucamax Armagedón cacë me anu timë́axa. A mex ca hebreo banan Armagedón cacë ꞌicën.

¹⁷ Usai ꞌicëbëtan ca anuxun Nucën Papa Dios rabiti xubunuax chiquícë ángel itsínribi aín xanpanu ꞌicë ñu tutucaxa. Tutucacëbëa naínu ꞌicë anuxun Nucën Papa Dios rabiti xubu anua Nucën Papa Dios ꞌicë anuax ësai banaia cana cuan: —Anuishi sënë́nquin cana ꞌan.

¹⁸ Usai ꞌicëbë ca caná mëriti banacëbë bëtsi ñuribi sharámainun mecama shaíquiaxa, uisa nëtë́nbia unin tansamaira oi.

¹⁹ ꞌIcëbë ca Babilonia cacë ëma, ax achúshi ꞌaíshbi rabë́ ꞌimainun achúshisa ꞌitánun tuquimainun camabi menu ꞌicë ëma chanu ꞌicë xubucamax rurucubuaxa. Usaribi oquin ca Nucën Papa Diosan Babilonianu ꞌicë unicamami nishquin, atun ñu ꞌatima ꞌacë a manucëma ꞌixun paë tanía tëmëratanun castícanxa.

²⁰ Mecama shaíquicëbë ca nasícama ꞌimainun matá me ꞌimainun aín bashicamaribi ꞌaíma ꞌinun nëtë́axa.

²¹ ꞌImainun ca ꞌuí ꞌaíshbi matsiira ꞌaish iru, acamax naínuax achúshi achúshinëx cuarenta (40) kilosa ꞌaish rëucubuaxa. Rëucubucëbëtan ꞌaisamaira oquin paë tani ca ami nishi a unicamax Nucën Papa Diosmi ꞌatimati banaxa.