Apocalipsis 15 - Kashibo-Kakataibo Biblia

Ashiquian ángelnën, mëcën achúshi ꞌimainun rabë́ oquin unicama paë tanmia

¹ Usai ꞌicëbëtan cana bëtsi ñuribi naínu ꞌicë isan. A isi cana ratúan. Ratúquin cana ángel mëcën achúshi ꞌimainun rabë́ isan. Acama achúshi achúshinëx ca anun menu ꞌicë unicama aín ꞌucha cupí castícanti ñuñu ꞌiaxa. Usoquin ca anuishi sënë́onquin aín nishcë sënë́ntanun Nucën Papa Diosan ꞌamiaxa.

² Usoquin ángelcama isanan cana parúnpapa upí, bëxnan bëxnánquicë iscësa ꞌaíshbi ꞌunpáxma ꞌaish tsi rëquirucëcëñun mëscucë iscësa isan. Anu ca ꞌaisamaira uni, arpa, anun Nucën Papa Dios rabiti, a ñuñu sëtë́axa. A unicamax ca parúnpapanuax uaxa ꞌirucë ñuinacanꞌëo, a rabicëma, ꞌianan a tanquin unin ꞌacë ñu rabicëma, ꞌianan aín número aín bëmánan ꞌimainun aín mëcë́nu ꞌacëma ꞌiaxa.

³ Anuax ca Nucën Papa Dios rabi cantaxa. Moisés, an Nucën Papa Diosan cacësabi oquin ꞌá, a sinánan Carnero ꞌicësaribitia unin ꞌucha cupí bama, an Nucën Papa Dios cuëëncësabi oquin ꞌá, aribi sinani ca Nucën Papa Dios rabi cantaxa. Ësai quicë ca a canta ꞌiaxa: Minmi ꞌacë ñucamax ca upíira ꞌicën, unin sináncësamaira oquin sinánquin camina ñu ꞌacën. Mix camina Nucën ꞌIbu Dios ꞌain. Min cushix ca chaira ꞌaish bëtsi cushisama ꞌicën. Mix cushiira ꞌaish camina camabi menu ꞌicë unicaman ꞌApu ꞌain. Usa ꞌaish camina sinánñuira ꞌixun paránquinma atúxribia upí ꞌinun ꞌiminux atun ꞌApu ꞌain.

⁴ Nucën ꞌIbu Dios, ¿uix cara mimi racuë́tima ꞌic? ¿Uin cara mi rabitima ꞌic? Mixëshi camina upíira upí sinánñu ꞌain. Mix upí sinánñu ꞌixun ñu upíshi ꞌaia iscë ꞌixun ca camabi menu ꞌicë unicaman mimi sinánquin mi rabiti ꞌicën.

⁵ A unicama cantaia istancëxun istëcënquin cana naínu ꞌicë anuxun Nucën Papa Dios rabiti xubu, aín xëcuëa xëóquia isan. A xubu mëúira ꞌicë ꞌiti anu ca bunánti anua Nucën Papa Diosan cuënëo maxax pará rabë́ nancë ꞌiaxa.

⁶ Xëóquicëbë ca ángel, axa anun menu ꞌicë unicama ꞌaisamaira oquin tëmëramiti ñuñu mëcën achúshi ꞌimainun rabë́, acamax anuax chiquíaxa. Aín chupax ca xapusa ñu uxuira ꞌacë, ꞌianan chuañuma upíira upí ꞌiaxa. Anúan shitëcërëquicë ax ca curi ꞌacë ꞌiaxa.

⁷ Usa ꞌain ca ángelcama chiquitia axa ꞌitsa bëruñu rabë́ ꞌimainun rabë́ ñu acama achúshinën a ángelcama achúshi achúshi, xanpa curi ꞌacë ꞌinánxa. A xanpacamanu ca axa bamatimoi tsócë Nucën Papa Diosan, anun atumi nishquin an ꞌatima ñu ꞌacë unicama castícanti ñu ꞌiaxa.

⁸ Angelcama anuax chiquícëbë ca anuxun Nucën Papa Dios rabiti xubu anua aín cushi ꞌain, tsin cuinan nuturucësa ꞌiaxa. Usai ꞌicë cupí ca a mëcën achúshi ꞌimainun rabë́ ángelcaman ñu ꞌatia sënë́ntamainun uinu ꞌicë uníxbi a xubunu atsíncëma ꞌicën.