Apocalipsis 14 - Kashibo-Kakataibo Biblia

Ciento cuarenta y cuatro mil uníxa cantati bana

¹ Usaquin istancëxun istëcënquin cana Carnero ꞌicësaribitia unin ꞌucha cupí bama, a matá me Sión cacë, anua Jerusalén ꞌicë, anu nicë isan. ꞌËn iscëx ca abë ꞌaisamaira uni, ciento cuarenta y cuatro mil (144,000) unicama, axa aín bëmánanu Cristonën anë ꞌimainun Nucën Papa Diosan anënribi cuënëocë, a unicamax ꞌiaxa.

² A isanan cana naínuaxa banaia cuan. A banax ca baca xuqui cushíinra banaruia cuacësa ꞌianan caná munuma banacësaribi ꞌaish ꞌitsa unían aín arpa ꞌaia cuacësaribi ꞌiaxa.

³ Acama ciento cuarenta y cuatro mil unicamax ca anun cantacëma, canta iotan cantaxa. A cantax ca anu Nucën Papa Dios ꞌicë a bëmánon ꞌimainun axa bamatimoi tsócë ꞌitsa bëruñu rabë́ ꞌimainun rabë́ ñu, acama ꞌimainun anu ꞌicë caniacëcë unicama mëcën rabë́ ꞌimainun taë rabë́ ꞌimainun rabë́ ꞌimainun rabë́, acaman bëmánauncüaxa cantacë ꞌiaxa. Uinu ꞌicë unínbi ca a canta ꞌunántima ꞌicën, unicama ciento cuarenta y cuatro mil (144,000) a Nucën Papa Diosan ainan ꞌinun ië́micë, acaman cuni ca a canta ꞌunánxa.

⁴ A unicamax ca xanubë ꞌuchacëma ꞌianan ñu ꞌatima ꞌati cuëënima Carnero ꞌicësaribitia unin ꞌucha cupí bama ainanshi ꞌaish, ax quicësabi oi ꞌia. Acamax ca Nucën Papa Diosan ainan ꞌinun ië́micë ꞌianan Carnero ꞌicësaribitia unin ꞌucha cupí bama, ainanribi ꞌinun aín ꞌuchacama tërë́ncë a ꞌicën.

⁵ Ënë unicamax ca aín nuitu asérabi upí ꞌaish cëmëi banacëma ꞌaish anu Nucën Papa Dios ꞌicë aín bëmánon ꞌia.

Rabë́ ꞌimainun achúshi ángelnëxa bana

⁶ Usa ꞌain cana bëtsi ángelribi isan. Camabi unin cuanun ca naínu nuani munuma banai, Cristo cupí ca unicamax xëníbua ꞌaínbi Nucën Papa Diosnan ꞌiti ꞌicë quiaxa. Camabi menu ꞌicë unicama bëtsi bëtsi unibu, bëtsi bëtsi menu ꞌicë, bëtsi bëtsi banan banacë an cuanun,

⁷ ca ësai munuma banaquin caxa: —Anun Nucën Papa Diosan camabi uni aín ñu ꞌacësabi oquin, uisa cara oti ꞌicë usoquin ꞌati nëtë ca uaxa. Usa ꞌain camina ami racuë́quin a rabiti ꞌain. An naícama, mecama, parúnpapacama, xëxácama unio, a camina rabiti ꞌain.

⁸ Usai quicëbë ca bëtsi ángelribi a caxu ai quiaxa: —Babilonia, a ëma chaira, anu ꞌicë unicaman ca aín xanuma ꞌaínbi xanu itsin ñunshini cuëënti, ꞌimainun ꞌaisamaira ñu ꞌatima, an ꞌacësaribi oquian ꞌanun quixun camabi menu ꞌicë unicama ꞌunánmiaxa. A ëma ꞌimainun anu ꞌicë unicamax ca bërí cëñúaxa, ca ꞌaíma ꞌicën.

⁹ Usai ꞌicëbë ai ca bëtsi ángelribi munuma banai ësai quiaxa: —Uicaman cara parúnpapanuax uax ꞌirucë ñuinacanꞌëo ꞌimainun a tanquian a iscësa oquin unin ꞌacë ñu a rabicë cupí aín bëmánanu cuënëocë unicama, ꞌimainun aín bëmánanu cuënëocëma ꞌaish aín mëcë́nu cuënëocë ꞌicë

¹⁰ a unicama ca Nucën Papa Diosan ꞌaisamairai ami nishquin castícanti ꞌicën. Acaman ca anuaxa manë tsi ꞌimainun azufre rëquirucë, anuxun ꞌaisamaira oquin paë tanti ꞌicën. Nucën Papa Diosan ángelcama ꞌimainun Carnero ꞌicësaribitia unin ꞌucha cupí bama, acaman ca atúxa usai ꞌia isti ꞌicën.

¹¹ Manë tsi anuxuan atun xënibua ꞌaínbi paë tanti, anuax ca aín cuin nëtëtima tëxëquiruia. Usai ca an parúnpapanuax uax ꞌirucë ñuinacanꞌëo, ꞌimainun a tanquian a iscësa oquin unin ꞌacë ñu a rabicë unicama, ꞌimainun ñuinacanꞌëon anë anu cuënëocë unicaman nëtë́timoquin nëtë́nbi imë́bi paë tanti ꞌicën.

¹² Usa ꞌain ca Nucën Papa Diosan unicama, an aín bana quicësabi oquin ꞌanan Jesúsmi catamëcë, acaman uisai cara ñu ꞌicëbë tëmëraquinbi asérabi ami sinánti ëntima ꞌicën.

¹³ Usai ángel banaia cuatancëxun cana naínuaxa ësaquin ꞌë cai banaia cuan: —Ënë bana ca cuënëot: Ax Nucën ꞌIbu Jesucristomi catamëcë unicamax ca bamatancëx chuámarua tani cuëënti ꞌicën. Naínuaxa banai quicësaribi oi ca Nucën Papa Diosan Bëru Ñunshin Upí ësai quia: Usa unicaman ca bamatancëxun tëmëratëcënquin paë tantëcëntima ꞌicën. Añu ñucama cara Jesucristonan ꞌixun a ꞌaxuanxa, acama ca Nucën Papa Diosan manuquinma sinania. Usa ꞌain ca a unicama chuámarua tani cuëënti ꞌicën.

Uva bimi bicësaribi oquin uni biti bana

¹⁴ Usaquin istancëxun istëcënquin cana nëtë cuin uxuanua unisa ꞌaish tsócë isan. Aín maxcánu curi ꞌacë mañuti ꞌimainun ca aín mëcënan machítusa ꞌaíshbi tëntúñu manë cuënucë tuíncë ꞌiaxa.

¹⁵ Usai ꞌimainun ca anuxun Nucën Papa Dios rabiti xubu anuax bëtsi ángel chiquíaxa. Chiquiti munuma banaquin ca axa nëtë cuínu tsócë a caxa: —Bimicama ca pëcëti sënë́anxa, anun a biti nëtë ca uaxa. Min manë cuënucë, anun camina bimicama biti ꞌain, bixun camina timëti ꞌain. Usai bimi biti ñui quíbi ca ángel, uni biti ñui quiaxa.

¹⁶ Quicëbëtainshi ca axa nëtë cuínu tsócë an, unían manën tëaquin bimi upíbu bicësaribi oquin, camabi uni upíbu biaxa.

¹⁷ Usoquian axa nëtë cuínu tsócë uni an upí unibu bicëbë ca bëtsi ángel naínu ꞌicë anuxun Nucën Papa Dios rabiti xubunuax chiquíaxa. Chiquíquiani ca anribi machítusa ꞌaíshbi tëntúñu manë cuënucë buánxa.

¹⁸ Buania chiquícëbë ca ángel itsi, an ñu tsi nëënmianan tsi bënánti cushiñu, ax anuxun sanutanun tsëpasa ñu nëënti anuan chiquíaxa. Chiquítancëxun ca munuma banaquin axa manë cuënucëñu ángel caxa: —Uvas bimicama ca pëcëti sënë́anxa. Usa ꞌain camina min manë cuënucë, anun tëaquin uvas bimicama biti ꞌain, bixun camina timëti ꞌain.

¹⁹ Quicëbëtan ca ángelcaman aín manë cuënucë, anun tëaquin biquin timëtancëxun, anuxun chinínti anu buánxun bucúanxa. Usoquin ꞌacë, ax ca an aín bana cuaisama tanquin Nucën Papa Dios nishmia unicama a ñui quicë ꞌicën. Ax ca uisaira oquinshi cara Nucën Papa Diosan a unicama castícanti ꞌicë qui quicë ꞌicën.

²⁰ Usoquian anuxun uvas bimi chinínti anu bucunia cana isan. Iscëx ca ëmanuax anuxuan chiníncancëx ꞌaisamaira imi ëbánquianxa. A imi ëbanquianxa racácë, aín nëmin ca caballo nicë aín cuëbí sënën ꞌiaxa. Usa ꞌaish ca a imia me mapubiani ëbánquiancë, ax trescientos kilómetros sënën ꞌiaxa.