Apocalipsis 13 - Kashibo-Kakataibo Biblia

Ñuinacanꞌëo rabë́ ñui quicë bana

¹ Usai ꞌicëbëtan cana parúnpapa masinu nixun ñuinacanꞌëo parúnpapanuax uax ꞌiruia isan. A ñuinacanꞌëo ax ca aín matúxcanëx mëcën rabë́ ꞌimainun aín matúxcanu ꞌicë mañutiribi mëcën rabë́ ꞌiaxa. Usa ꞌaish ca aín maxcataxribi mëcën achúshi ꞌimainun rabë́ ꞌimainun, aín maxcácamanuribi Nucën Papa Dios ꞌatimaquin ñui quicë bana cuënëocë ꞌiaxa.

² A parúnpapanuax uax ꞌirucë ñuinacanꞌëox ca paru ꞌinúansa ꞌianan aín taë xaë́on taësa ꞌianan aín cuëbitax ꞌinúan cuëbísa ꞌiaxa. A parúnpapanuax uax ꞌirucë ñuinacanꞌëo ca capë́sa ñuinacan aín cushi ꞌinánan, aín bana cuacësaribi oquin aín bana cuanan unicaman an sinánmicësa oquin ꞌanun ꞌimiaxa.

³ ꞌËn iscëx ca a parúnpapanuax uax ꞌirucë ñuinacanꞌëo aín maxcá achúshi, unin motisama oquin tëacësa ꞌaíshbi mooxa. Mocëbë ratúquin ca camabi menu ꞌicë unin —cushiira ca ax ꞌicë —quixun sinánxa. Usaquin sinánquin ca aín bana cuaxa.

⁴ Parúnpapanuax uax ꞌirucë ñuinacanꞌëo a, aín cushi ꞌináncë cupí, ca capë́sa ñuina chaira a camabi menu ꞌicë unicaman rabiaxa. Rabianan ca parúnpapanuax uax ꞌirucë ñuinacanꞌëoribi rabi —asaribi ñu ca ꞌaíma ꞌicë —quianan ca —axa abë ꞌacananti ca ꞌaíma ꞌicë —quiaxa.

⁵ Usai quicëbëtan ca parúnpapanuax uax ꞌirucë ñuinacanꞌëo, ax a cërúai ami ꞌatimati bananun Nucën Papa Diosan ëanxa. Usaquin ca cuarenta y dos ꞌuxë́an unicaman aín bana cuanun ëanxa.

⁶ Usaquian ëncëxun ca aín cuëbitan Nucën Papa Dios ꞌimainun anua ax ꞌicë ꞌatimaquin ñui bananan, aín nëtënu abë ꞌicë aín unicamaribi ꞌatimati banaquin ñuiaxa.

⁷ Usaquian ëncëxun ca camabi menu ꞌicë unicama, axa Nucën Papa Diosmi catamëcë, abë ꞌacananquin ñusmoxa. Ñusmoxun ca camabi menu ꞌicë unicama, bëtsi bëtsi unibu, bëtsi bëtsi banan banacëcama, aín bana cuanun ꞌimiaxa.

⁸ Ënë menu bucucë, ui unicamax cara me uniotabacë ꞌain, Carnero ꞌicësaribitia unin ꞌucha cupí bama, aín quiricanu aín anë cuënëoma ꞌicë, a unicaman ca axa parúnpapanuax uax ꞌirucë ñuinacanꞌëo aín bana cuanan rabiaxa.

⁹ Uicaman cara upí oquin ꞌunántisa tania an ca aín pabitan ënë bana cuaquin aín nuitunënbi sinánquin cuati ꞌicën, ësai quicë:

¹⁰ Uicaman cara uni itsi sipuanun ꞌinania, acamaxribi ca sipuacë ꞌiti ꞌicën. An uni itsi manë xëtocën ꞌacë uni, a ca bëtsi unínribi usaribi oquin ꞌati ꞌicën. Usa ꞌaínbi ca axa Nucën Papa Diosmi catamëcë unicaman uisai cara ñu ꞌicëbëtanbi Nucën Papa Diosmi sinánti ëntima ꞌicën.

¹¹ Bëtsi ñuinacanꞌëoribi cana me mëucüaxa aia isan. Aín matúxca rabëtax ca carneronën matúxcasaribi ꞌiaxa. Ax ca capë́sa ñuina chaira ax banacësaribi banaxa.

¹² A ñuinacanꞌëo me mëucüax ucë, aín cushi ca parúnpapanuax uax ꞌirucë ñuinacanꞌëo abë ꞌaish aín cushisaribi ꞌiaxa. Usa ꞌixun ca camabi menu ꞌicë unicaman parúnpapanuax uax ꞌirucë ñuinacanꞌëo, axa motisama oquin tëacë ꞌaíshbi mocë, a rabinun me mëucüaxa ucë ñuinacanꞌëon rabimiaxa.

¹³ Me mëucüaxa ucë ñuinacanꞌëo an ca unían iscëma ñu ꞌanan unin ꞌacëma ñu ꞌaxa. Usaquin ꞌanan ca unicaman ismainunbi tsi naínua menu ꞌibúmiaxa.

¹⁴ Parúnpapanuax uaxa ꞌirucë ñuinacanꞌëon ismainun, usoquin ꞌanúan Nucën Papa Diosan ëncëxun ca unían iscëma ñu ꞌanan acëma ñuribi ꞌaquin, ënë menu ꞌicë unicama paránxa. Paránan ca a ñuinacanꞌëo parúnpapanuax uaxa ꞌirucë axa manë xëtocën motisama oquin tëacë ꞌaíshbi mocë, abi tanquin a iscësaribi ꞌitánun ꞌanun uni ꞌamiaxa.

¹⁵ ꞌAmitancëxun ca parúnpapanuax uax ꞌirucë ñuinacanꞌëo a tanquin ꞌacë ñu a banamiaxa. Banamiquin ca uicaman cara a ñu ax isa dios ꞌicë quixun rabicëma ꞌicë, acama ꞌanun quixun uni ꞌamiaxa.

¹⁶ Usaquin ꞌanan ca camabi uni, ꞌapu unicama ꞌimainun ꞌapuma unicamaribi, ñuñu unicama ꞌimainun ñuñuma unicamaribi, an uni ñu mëëxuncëma unicama ꞌimainun an uni ñu mëëxuncë unicamaribi, camabi aín mëcën mëqueu parúnpapanuax uax ꞌirucë ñuinacanꞌëonan ꞌinun ꞌunántioquin cuënëocë ꞌinun ꞌamiaxa. ꞌAmianan ca aín mëcën mëqueu ꞌunántiocëma ꞌicë, aín bëmánanu ꞌunántioquin cuënëomiaxa.

¹⁷ ꞌUnántioquin cuënëocë bana ax ca parúnpapanuax uax ꞌirucë ñuinacanꞌëo aín anë ꞌiaxa. Aín anë ꞌacëma ꞌain ca aín número cuënëocë ꞌiaxa. Ui unicamax cara ꞌunántioquin cuënëocëma ꞌicë an ñu maruanan ñu biti ca ꞌaíma ꞌiaxa.

¹⁸ An ñu ꞌunáncë unin ca parúnpapanuax uaxa ꞌirucë ñuinacanꞌëo uisai quicë cara aín número ꞌicë quixun ꞌunánti ꞌicën. Aín númeronëx ca, seiscientos sesenta y seis (666) ꞌicën. Anëñu ꞌaíshbia númeroñu unisaribi ca a ñuinacanꞌëon número ꞌicën.