Apocalipsis 12 - Kashibo-Kakataibo Biblia

Xanu ꞌimainun pianancë ñuina chaira capë́sa ꞌaíshbi ushíainra ñui quicë bana

¹ Usai ꞌicëbëtan cana achúshi ñu naínu ꞌicë isan, ax ca xanu ꞌiaxa. Xanu ꞌaíshbi bari mëu nicësa ꞌianan ca aín taë shimú ꞌuxë ꞌiaxa. Aín maxcánu ca mëcën rabë́ ꞌimainun rabë́ ꞌispa mañutiocë ꞌiaxa.

² Tuñu ꞌaish ca a xanu bacë́nux paë tani bënëti cuëncë́anxa.

³ A istancëxun cana bëtsi ñuribi naínua isan, ax ca pianancë ñuina chaira, maxë capë́sa ꞌiaxa. Aín maxcá ca mëcën achúshi ꞌimainun rabë́ ꞌiaxa. Usa ꞌaish ca aín maxcá achúshi achúshinu mañuti ꞌiaxa. Aín matúxcacama ca mëcën rabë́ ꞌiaxa.

⁴ Aín ina chaira anun ca maë́ncësoquin ꞌispacama nëbë́tsi, rabë́ ꞌimainun achúshi oquin tëacësa ꞌaíshbi amo ꞌicë achúshi menua nipacënun rëupaxa. Usoquin ꞌispa rëupatancëx ca bacënia aín tuá ꞌenux, tuñu xanu bëmánon niracëaxa.

⁵ Niracëxuan caínmainun ca a xanu bëbu tuá bacë́anxa, ax canitancëx cushi ꞌixun ca camabi menu ꞌicë unían aín bana cuanun ꞌimiti ꞌicën. Usa ꞌain ca aín tita bacë́ncë ꞌicë, anua ax ꞌicë anu abë ꞌApu ꞌinun Nucën Papa Diosan buánxa.

⁶ Bacë́ntancëx ca a xanu anu uni ꞌicëma menu cuanxa, anua ax ꞌiti Nucën Papa Diosan mënío anu. Mil doscientos sesenta nëtën ꞌi anu ꞌia ca an mëníosabi oquin Nucën Papa Diosan anúan ax upitax tsónun piti ꞌinánti ꞌicën.

⁷ Usaía ꞌian ca Nucën Papa Diosan nëtënuax, ángelcaman cushi, Miguel, a ꞌimainun aín ángelcamax, pianancë ñuina chaira maxë capë́sa a ꞌimainun aín ángelcamabë ꞌacananxa.

⁸ ꞌAcananquin ca Miguel ꞌimainun aín ángelcaman, pianancë ñuina chaira maxë capë́sacëñun aín ángelcama ñusmoxa. Ñusmocëbë ca Nucën Papa Diosan nëtënu anua atux ꞌiti ꞌaíma ꞌiaxa.

⁹ Anua atux ꞌiti ꞌaíma ꞌain ca pianancë ñuina chaira maxë capë́sa a aín ángelcamacëñunbi Nucën Papa Diosan chiquínxun menu niaxa. A capë́sa ñuina ax ca an bëráma Nucën Papa Diosan uniotabatia uni paran ꞌaish ñunshin ꞌatimanën ꞌapu, Satanás, an camabi menu ꞌicë unicama paráncë a ꞌicën.

¹⁰ Usaía ꞌicëbëtan cana Nucën Papa Diosan nëtënuaxa ësai munuma banaia cuan: —An ami catamëcë unicama, nucën xucë́antu, ꞌatimaquin ñuiquin nëtë́quinma nëtë́nbi ꞌimë́bi Nucën Papa Dios manóncë, ax ca ënua chiquíncë ꞌicën. Usa ꞌain ca bërí an aín cushínbi ainan ꞌinun uni ië́micë, Nucën Papa Dios, ainshi asérabi aín ꞌApu ꞌixun, aín unicama bërúanan Cristo atun ꞌIbu ꞌinun ꞌimiaxa.

¹¹ Aín unicama, nucën xucë́antu, ax ca Carnero ꞌicësaribitia unin ꞌucha cupí bama, ami catamëcë cupí atun ꞌucha tërë́ncë ꞌianan aín bana ënquinma sináncë ꞌaish, ñunshin ꞌatimanën ꞌapúan ꞌatima ñu ꞌamicëma ꞌiaxa. Atun ca axa ami nishcë unin bëtsi bëtsi ocëx bamatisa ꞌixunbi Nucën Papa Diosmi sinánti ëncëma ꞌicën.

¹² Ñunshin ꞌatimanën ꞌapu a Nucën Papa Diosan aín nëtënua chiquíncë ꞌain, camina a nëtënu ꞌicëcama, mitsux cuëënti ꞌain. Mitsu usaquin canan cana axa menu ꞌicëcama ꞌimainun axa parúnpapanu ꞌicëcama ësaquin cain: Nucën Papa Diosan aín nëtënua chiquíncë ꞌaish ca ñunshin ꞌatimanën ꞌapu ꞌaisamairai nishaxa, anun an ñu ꞌati nëtë ca ꞌitsama ꞌicë quixun ꞌunani. Nishquian ñu ꞌacëbëtan camina ꞌaisamaira masá nuituquin tëmërati ꞌain.

¹³ Usaía naínuax banaia ꞌën cuacëbëtan ca pianancë ñuina chaira maxë capë́sa an —naínua chiquínxun ca ꞌë menu niaxa —quixun ꞌunánquin, xanu axa bëbu tuá bacë́ncë, a ꞌatimonuxun nuiaxa.

¹⁴ Nuicëxbi ca a xanux Nucën Papa Diosan ꞌimicëx, tëtëcamëꞌëon pëchisa rabë́ ꞌaish aín pëchi chaira ꞌiaxa. Anun anu uni ꞌicëma me, anu a ñuina chaira capë́sa ax cuantima, anu nuánti cupí ca usaquin Nucën Papa Diosan ꞌimiaxa, anuxun an mëníosabi oquin rabë́ ꞌimainun achúshi baritia ꞌimainun mëcën achúshi ꞌimainun achúshi ꞌuxën piti ꞌinánuxun.

¹⁵ Ñuina chaira capë́sa an ca a xanua bacan buántanun quixun aín cuëbitan ꞌunpax chaira, a caxuxun xucaxa.

¹⁶ Usocëbë ca me amo rabë́ tuqui baquicëbë, a ñuinacan xucacë ꞌunpax me ꞌucë mëu atsini nëtë́axa. Usai ꞌiá ꞌunpax me ꞌucë mëu atsíncëbëtan ca a xanu bacan buáncëma ꞌicën.

^17-18 Usai ꞌia isi ca ñuina chaira capë́sa ax ꞌaisamairai xuamati xanumi nishaxa. Nishi ca a xanun rëbúnqui raíri, an Nucën Papa Diosan bana quicësabi oquin ꞌacë ꞌianan an Jesucristomi sinánti ëncëma, a unicamabë ꞌacanani cuanxa.