Apocalipsis 11 - Kashibo-Kakataibo Biblia

Jesucristo ñuiquin an cacë ca rabë́ ꞌicë quicë bana

¹ Usai ꞌicëbëtan cana Nucën Papa Diosan ꞌináncëxun i tsatisa biquin ësaia quiaribi cuan: —Tsatisa ënë i bixun camina anun anuxun Nucën Papa Dios rabiti xubu aín chaxcë́ tupúnti ꞌain. Tupúanan camina anuxun ñu sanutanun nëënti, aín chaxcë́ribi tupúnti ꞌain. Tupúanan camina an anuxun Nucën Papa Dios rabicë unicama cara uiti ꞌicë quixun ꞌunánuxun tupúnti ꞌain.

² A xubu rapasu ꞌicë me mëníocë, ashi camina tupúntima ꞌain. Ax ca axa Nucën Papa Diosmi sináncëma unicamaxa anu ꞌinun ëncë ꞌiti ꞌicën. A unicaman ca cuarenta y dos ꞌuxëcama anu a xubu ꞌicë ëma, Jerusalén, a ꞌatimoi niti ꞌicën. Usa ꞌain camina a xubu rapasu ꞌicë me mëníocë, a tupúntima ꞌain.

³ A unicamaxa ꞌatimati anu nimainun cana an ꞌë ñuiquin unicama canun rabë́ uni xuti ꞌain. A uni rabë́ ax ca rabë́ olivos cacë iisa ꞌimainun rabë́ anu lamparín nanti ñusa ꞌicën. An ca ꞌën xucëxun ꞌaisamaira nëtë, mil doscientos sesenta, a nëtëcama ꞌë ñuiquin bana unicama ñuixunti ꞌicën. Atux ca masá nuitucë unían pañucësaribi chupa pañucë ꞌiti ꞌicën.

⁴ An ꞌë ñuiquin unicama cati rabë́ uni axa rabë́ olivos cacë iisa ꞌimainun rabë́ anu lamparín nanti ñusa ꞌicë ax ca anua Nucën ꞌIbu Dios, axa camabi menu ꞌicë unicaman ꞌibu ꞌicë, a bëmánon nitsíncë, a ꞌicën.

⁵ Unían a ꞌatimoisa tancëxun ca atun aín cuëbínua tsi rëquiruia chiquínquin cëñuia. An a ꞌatimoisa tancë unix ca usaquian ꞌacëx bamati ꞌicën.

⁶ A rabëtax ca cushiñu ꞌicën. Usa ꞌixun ca ꞌaisa tanquin atúan Nucën Papa Dios quicësabi oquin bana ñuixunmainuan ꞌuí ꞌibúaxma ꞌinun ꞌimiti ꞌicën. ꞌAisa tanquin ca bacanu ꞌicë ꞌunpax imi ꞌimiti ꞌicën. ꞌAisa tanquin ca bëtsi bëtsi ñu ꞌaquin paë tania tëmëranun unicama ꞌimiti ꞌicën. Uiti oquin cara usoquin ꞌaisa tania usoquin ca ꞌati ꞌicën.

⁷ Atúan unicama bana ñuixuncë nëtëcama inúcëbë ca piánancë ñuinasa ñu, ax quini chaira ꞌaish nëmíinra, anuax chiquíti ꞌicën. Chiquítancëxun ca an unicama bana ñuixuncë rabë́, ami nishi abë ꞌacánanquin ñusmoquin bamamiti ꞌicën.

⁸ Bamamicë ꞌaíshbi maíncëma ꞌaish ca a ëma cha, anu Nucën ꞌIbu Jesús i curúsocënu matása, Jerusalén, anu ꞌicë bainu racáti ꞌicën. A ëmax ca Sodoma ꞌimainun Egipto caquin anëcëribi ꞌicën, anu ꞌicë unicamaxa Sodoma ꞌimainun Egiptonu ꞌicë uníxa ꞌiásaribiti Nucën Papa Diosmi sináncëma ꞌain.

⁹ Rabë́ ꞌimainun achúshi nëtë ꞌimainun nëtë itsi bari xamárutamainun anu racácë ca anu cuancë unicama, bëtsi bëtsi unibu, bëtsi bëtsi menuax ucë ꞌianan bëtsi bëtsi banan banacë, acaman isquin, uni raírinëan maíntisa taniabi ꞌamitima ꞌicën.

¹⁰ A rabëtan Nucën Papa Diosan bana ñuixunquin atun ꞌuchacama sinánmicë cupí ca axa Nucën Papa Diosmi sináncëma unicama a rabë́ bamacë isi cuëënti ꞌicën. Cuëëni ca abëa nuibanancë unicamabë ñu ꞌinánanti ꞌicën.

¹¹ Rabë́ ꞌimainun achúshi nëtë ꞌimainun nëtë itsi bari xamárucëbë ca a rabëtax bamaxbi Nucën Papa Diosan ꞌimicëx uinacëtëcëni niruaxa. Nirucëbë ca an atu iscë unicama ratuti racuë́ira racuë́axa.

¹² Racuë́cëbëtan ca a rabëtan ësaquin caía naínuax banaia cuaxa: —Nëri ca ut. Cacëx ca axa atumi nishcë unicaman ismainunbi nëtë cuinan nëbë́tsiocëx naínu cuanxa.

¹³ Usai ꞌicëbë ca me ꞌaisamaira shaíquiaxa. Shaíqui ca Jerusalén ëma nëbë́tsi rabë́, mëcën rabë́ oquin tëacësa ꞌaíshbi amo ꞌicë achúshi rurucubuaxa. Rurucubucëbë ca ꞌaisamaira uni siete mil bamaxa. Acama bamacëbëtan ca bamacëma unicaman racuë́quin, Nucën Papa Dios naínu ꞌicë rabiaxa.

¹⁴ Usaquin ca mëcën achúshi ángelnën aín manë banañu banocëbëtan bëtsi ángelnënribi aín manë banañu banocëbëtan unicaman ꞌaisamaira paë tantëcëanxa. Usocëbëtan ca ángel itsi an tsiánquiira aín manë banañu, unicama paë tanun banocëma pan ꞌixunbi bërí banoti ꞌicën.

Ashiquin manë banañu banoti

¹⁵ Usa ꞌain ca a ángelnënbi aín manë banañu banoxa. Banocëbëtan cana naínuax sharati munuma banaia ësai quia cuan: Bërí ca Nucën ꞌIbu Dios ꞌimainun Cristo, Nucën Papa Dios an uni ië́minun caísa, axëshi ꞌApu ꞌia. Nëtë́timoi usabi ꞌinux ca ꞌia.

¹⁶ Usai banacëbë ca caniacëcë unicama mëcën rabë́ ꞌimainun taë rabë́ ꞌimainun rabë́ ꞌimainun rabë́, axa anu Nucën Papa Dios ꞌicë, a bëmánon tsócë, acaman rantin puruni racábuti meu bësuquin Nucën Papa Dios rabiaxa.

¹⁷ Rabiquin ca caxa: Nucën ꞌIbu Dios, min cushi ca chaira ꞌaish bëtsi cushisama ꞌicën. Camina usabi ꞌiá ꞌianan usabi ꞌaish, usabi ꞌiti ꞌain. Cushiira ꞌixun camina min cuëëncësabi oquin ꞌain. ꞌAi camina bërí mixëshi min unicaman ꞌApu ꞌain. Usa ꞌicë cananuna bërí —asábi ca —quixun caquin mi rabin.

¹⁸ Axa mimi sináncëma unicamax ca mimi xuamati nishaxa. Nishcë ꞌaínbi ca anun min uisoquin caramina atu ꞌati ꞌai, usoquin ꞌati nëtë uaxa. Anun min camabi uni bama ꞌaíshbia baísquicë isti nëtë ca uaxa. An mix quicë bana uni ñuixuncë unicama, ꞌimainun axa min aín ꞌuchacama tërë́nun mimi catamëcë ꞌixun min bana cuacë unicama, aín cushi unicama ꞌimainun cushima unicamaribi, camabi isquinmi anun mibëa ꞌinun biti nëtë ca uaxa. ꞌImainun ca anúan ꞌuchañu unicama anua atun ñu ꞌatima ꞌacë cupí camabi ꞌuchañu uni ꞌiti anu cuanti nëtëribi uaxa.

¹⁹ Usai ꞌicëbë ca naínu ꞌicë anuxun Nucën Papa Dios rabiti xubu aín xëcuë xëoquiaxa. Xëoquicëbëtan cana bunánti, anua Nucën Papa Diosan cuënëo maxax pará rabë́ nancë, a isan. Iscëbëa munuma caná mëriti banacëbë ca bëtsi ñuribi sharámainun mecama shaíquiaxa. ꞌImainun ca ꞌuí ꞌaíshbi matsiira ꞌaish iru ax rëucubuaxa.