Apocalipsis 10 - Kashibo-Kakataibo Biblia

Quiricaratsuñu ángel ꞌia

¹ Bëtsi ángel cushiira, axribia naínuax aia cana isan. Ax ca nëtë cuin mëu nicësa ꞌianan aín maxcá manámi nónbai ꞌimainun aín bëmánan bari pëquicësa ꞌiaxa. ꞌIanan ca aín quisi rabë́ tsi rëquiruia iscësa ꞌiaxa.

² Aín mëcënan ca bacacë quiricaratsu tuíanxa. Usai ꞌiquin ca aín taë mëqueunën parúnpapa amánan aín taë mëmiunën me amáxa.

³ Usai ꞌitancëx ca ꞌinúan munuma banacësari banaxa. Banacëbë ca mëcën achúshi ꞌimainun rabë́ canacamëꞌëoribi banaxa.

⁴ Caná banacëbëtan a banacama cuënëoti ꞌixunbi cana naínuaxa ësai banaia cuan: —Canacaxa quicëcama camina uisai quicë cara quixun unin ꞌunánun cuënëotima ꞌain.

⁵ Angel an aín taë itsin parúnpapa amánan aín taë itsin me amácë, an ca aín mëcën mëqueu ꞌicë manámi oxa.

⁶ Manámi oquin ca caxa: —Axa bamatimoi tsócë, an naí, me, parúnpapa, acama ꞌimainun anu ꞌicë ñucamaribi unio Nucën Papa Dios, an cuamainun cana cain: Ax quiasabi oi ca bërí ꞌiti ꞌicën.

⁷ Bëtsi ángelnën aín manë banañu banocëbë ca an Nucën Papa Dios quicë bana uni ñuixuncë unicamaxa, usai ca ꞌiti ꞌicë quiásabi oi ꞌiti ꞌicën. A bana uisai quicë cara quixun unin ꞌunánma ꞌaínbi ca a bana quicësabi oi ꞌiti ꞌicën, manë banañu banocëbë.

⁸ A ángelnëxa quicëbëtan cana naíucüax banaia cuatëcëan, ësai qui: —A ángel, axa parúnpapa ꞌimainun menuribi nixun aín mëcënan bacanuxun tuíncë quiricaratsu a ca bitsi cuan.

⁹ Usaquian ꞌë cacëx, ángelnu cuanquin cana —quiricaratsu camina ꞌë ꞌinánti ꞌai —quixun can. Cacëxun ca ꞌë caxa: —A cënë ꞌicë, ca bit. Bixun ca pit. Picëx ca min cuëbínuax bataira ꞌaish buna rëpasaribi ꞌiti ꞌicën. Usa ꞌaíshbi ca min pucu ꞌucë mëucüax mucaira ꞌiti ꞌicën.

¹⁰ Usaquin caquian ꞌë ꞌináncëxun, aín mëcë́nua bixun cana a quiricaratsu pian. Picëx ca ꞌën cuëbínuax bataira ꞌaish buna rëpasa ꞌiaxa. Bata ꞌaíshbi ca ꞌën ꞌecëx ꞌën pucunuax mucaxa.

¹¹ Usai ꞌicëbëtan cana ënë banaribi cuan: —Bëtsi bëtsi unibu, bëtsi bëtsi nëtënu ꞌianan bëtsi bëtsi banan banacë, a unicama ñuia Nucën Papa Dios quicë bana camina unicama ñuixuntëcënti ꞌain.