Apocalipsis 1 - Kashibo-Kakataibo Biblia

¹ Nucën Papa Diosan ca ënë quiricanu cuënëocë ñucama Jesucristo ismiaxa, xënibuiracëma ꞌaínshi ca ësai ꞌiti ꞌicë quixuan aín unicama isminun. Nucën Papa Diosan a ismicë ñucama aín unicaman ꞌunánun ca Jesucristonën aín ángel achúshi Juan isminun xuaxa.

² Xucëxuan ismicëxun ca Juanën uisa ñu cara isaxa quixun cëmëquinma a ñucama cuënëoxa. Usaquin ca Juanën Nucën Papa Dios quicësabi oquian Jesucristonën a ismianan a ñuiquin cacë banacama cuënëoxa.

³ Anun cuënëo banacama quicësabi oi ꞌiti nëtë ca xënibuiracëma ꞌaínshi uti ꞌicën. A nëtën ca an ënë bana iscë unicama ꞌimainun an uni itsían ñuia cuacë unicama ꞌimainun a bana cuaquin —asérabi ca usaía quicësabi oi ꞌiti ꞌicë —quixun sinánquin a bana quicësabi oquin ꞌacë unicama cuëëinra cuëënti ꞌicën.

Axa mëcën achúshi ꞌimainun rabë́ ëmanuax Jesucristomi catamëcë unicama Juanën quirica cuënëoxuan

⁴ ꞌËx Juan ꞌixun cana Asia menu ꞌicë mëcën achúshi ꞌimainun rabë́ ëmanuax timë́cë axa Jesucristomi catamëcë unicama, mitsu ësaquin cain: Nucën Papa Dios axa usabi ꞌiá ꞌaish usabi ꞌicë, an nuibaquin ꞌaquincëxmi mitsux chuámarua bucuti cana cuëënin. Cuëëanan cana anua Nucën Papa Dios ꞌicë aín Bëru Ñunshin Upí anribi aín bana upí oquin cuanun ꞌaquianan, a bana quicësabi oi ꞌinun ꞌaquincëxmi mitsux chuámarua bucuti cuëënin.

⁵ An uisaira cara Nucën Papa Dios ꞌicë quixun uni ꞌunánmicë, Jesucristonënribia nuibaquin ꞌaquincëxmi mitsux chuámarua ꞌiti cana cuëënin. Ax utëcëncëbë aín unicamaxribi bama ꞌaíshbi baísquinun, ca ax pain bamatancëx baísquiacëxa. Ax ca ënë nëtënu ꞌicë ꞌapucaman ꞌapu a ꞌicën. An ca nu nuibanan nun ꞌucha cupí aín imi ꞌapati bama ꞌixun nun ꞌuchacama tërë́anan,

⁶ nuxnu ainan ꞌaish ax ꞌApu ꞌain nuxribi ꞌapu ꞌinun nu ꞌimianan, nux sacerdote an uni itsi a ñucáxuncë ꞌixun aín Papa Dios rabinun nu ꞌimiaxa. A ca camabi unin rabiquin —mixëshi cushi ꞌaish camina mixira cëñútimoi ꞌApu ꞌin —quixun caquin rabiti ꞌicën. Usaquin ca ꞌati ꞌicën.

⁷ Ca is, Cristo, ax ca naí cuin mëu bëbacuatsini unuxun ꞌaia. Aia ca camabi unicaman isti ꞌicën, an manë xëtocën taro, acamánbi ca aia isti ꞌicën. Ax ucëbë ca camabi menu ꞌicë unicama ami sináncëma ꞌaish masá nuituti inti ꞌicën. Asérabi ca usai ꞌiti ꞌicën.

⁸ Nucën ꞌIbu Dios, axa usabi ꞌiá ꞌaish usabi ꞌicë, ax ca cushiira ꞌaish, uisa cushi cara, aín cushibëtanbi sënë́nmaira ꞌicën. Usa ꞌaish ca ax ësai quia: —ꞌËx cana uisa ñubia ꞌaíma ꞌaínbi ꞌiacën, usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain.

Upíira ꞌaish cushiira ꞌicëa Cristo Juanën isa

⁹ ꞌËx Juan ꞌaish cana mitsúxmi ꞌicësaribiti Jesúsnan ꞌaish mitsun xucë́nsa ꞌain. Mitsúxmi ꞌicësaribiti cana Jesucristonan cupí, unin ꞌatimocë ꞌaíshbi asérabi Nucën Papa Diosan uni ꞌain. Mitsu ꞌacësaribi oquian an cushiocëxun cana uisa ñu cara ꞌicëbëbi bënë́quin ami catamëti ëniman. Usa ꞌixun Nucën Papa Diosan bana ñuixuanan, Jesús ñui quicë banaribi uni ñuixuncë cupí cana Patmos cacë nasínu sipuacësa ꞌinun unin ëncë ꞌain.

¹⁰ Anun Nucën ꞌIbu Dios rabiti nëtën ꞌëx ami sinánquin cana ꞌuxúnmabi namácësa oquin, ꞌë caxucüaxa manë banañu banocë́xa banacësari munuma banaia cuan.

¹¹ Banai ësai quia cana cuan: —ꞌËx cana uisa ñubia ꞌaíma ꞌaínbi ꞌiacën, usa ꞌaish cana ënë menu ꞌicë ñucama cëñúcëbë usabi ꞌiti ꞌain. Usa ꞌaish cana a pain ꞌunánti bana “A” ꞌimainun tsiánquinribi ꞌunánti bana “Z” asaribi ꞌain. Ënuxunmi min iscë ñucama ñuiquin camina quiricanu cuënëoti ꞌain. Cuënëotancëxun camina axa ꞌëmi sinani ꞌëmi catamëcë unicama, mëcën achúshi ꞌimainun rabë́ ëmanu ꞌicë, acamami cuënëocë quirica buánmiti ꞌain, Efeso, Esmirna, Pérgamo, Tiatira, Sardis, Filadelfia, Laodicea, a ëmacamanu ꞌicë unicama a.

¹² Banaia cuati, uin cara ꞌë usaquin caia quixun istisa tani cana cuainacëan.

¹³ Cuainacëquin cana mëcën achúshi ꞌimainun rabë́ anu lamparín nanti curi ꞌacë isan. Anu lamparín nanti curi ꞌacë achúshi achúshi sëtë́cë, acama nëbë́tsinua cana uni achúshi isan. Ax ca uni ꞌaíshbi Jesús ꞌiaxa. Aín taria chaxcë́ ꞌimainun ca anúan shitëcërëquicë ax curi ꞌacë ꞌiaxa.

¹⁴ A uni ca aín maxcánu ꞌicë aín bu uxua ꞌaish carnero rani uxuira iscësa ꞌianan matsi uxuira iscësaribi ꞌiaxa. ꞌIanan ca ax cushiira ꞌaish aín bëru rabë́ tsi rëquirucë ënxáira iscësa ꞌiaxa.

¹⁵ Aín taëx ca cashtá manë́xa niba nibaquicë ꞌaish ichúcësa ꞌiaxa. ꞌImainun ca aín banax baca xuqui cushíinra banaruia cuacësa ꞌiaxa.

¹⁶ Aín mëcën mëqueunën mëcën achúshi ꞌimainun rabë́ ꞌispa tuíanan aín cuëbínuax machítusa manë xëtocë, amo rabë́bi cuënucë ꞌaish, chiquitia cana isan. Isanan cana aín bëmánanëxa barin cushíinra pëcacësaribiti pëquia isan.

¹⁷ Usa isi cana racuëtan bamai a tanáin nipacëan. Nipacëtia ca aín mëcën mëqueunën ramëquin ꞌë caxa: —Racuëaxma ca ꞌit. ꞌËx cana ñu ꞌaíma pan ꞌain ꞌiacën. Usa ꞌaish cana camabi ñu cëñúcëbë usabi ꞌiti ꞌain.

¹⁸ ꞌËx cana axa bamatimoi tsócë a ꞌain. Bamatancëx baísquia ꞌaish cana bamatëcëntimoi tsotin. Ui unicamax cara uiti nëtën tsóti ꞌicë, uisa nëtën cara bamati ꞌicë quixun cana ꞌën mëníoin. Bamatancëx cara aín ꞌucha cupí anuax uni tëmëracë anu cuanti ꞌicë, cara anua aín ꞌucha tërë́ncë uni ꞌicë anu cuanti ꞌicë quixun cana mëníoin.

¹⁹ A min iscë ñucama ꞌimainun a min isti ñucama, acama camina usai ca ꞌia quixun ñuianan usai ca ꞌicëma ꞌaíshbi ñu ꞌiti ꞌicë quixun cuënëoti ꞌain.

²⁰ ꞌIspa mëcën achúshi ꞌimainun rabë́mi ꞌën mëcën mëquenua iscë, ꞌimainun anu lamparín nanti mëcën achúshi ꞌimainun rabë́mi iscë, ax cara uisa ꞌicë quixun ꞌunánquinmabi camina ësa ca quixun ꞌunánti ꞌain, anu lamparín nanticama ax ca a mëcën achúshi ꞌimainun rabë́ ëmanuaxa ꞌëmi catamëti unicama ꞌunántioquin nancë ꞌicën. ꞌImainun ca mëcën achúshi ꞌimainun rabë́ ꞌispa ami iscë, ax a ëmacamanuxun an Nucën Papa Diosan bana unicama ñuixunquin ꞌunánmicë a unicama anun ꞌunántiocë ꞌicën.