Amós 9 - Kashibo-Kakataibo Biblia

Diosan unikama tëmëramikëbë ka uíxbi ië́tima ꞌikë kikë bana

¹ Usokin a ñukama istankëxun kana Dios. Anuxun ñuina xaroti rapasu nikë isan, iskëxun ka ësokin ꞌë kaxa: “Anuxun ꞌë rabiti xubu akamina aín ꞌirakantikama manámi ꞌikë a tinkati ꞌain, usakin ꞌakëbë ka anu nankë ikama ax shaíkiti ꞌikën; ¡shaíki ka ikama ax túukibuti ka unin maxkánu aín sanikama pakëti ꞌikën! Usokin ꞌakëbëa bamakëmakama atux abáti sinanx kuaniabi kana manë xëtokën ꞌakin rëtëti ꞌain: usokin ꞌakëbë ka axa abáti sinanx abákë axbi achúshirabi ië́tima ꞌikën;

² ꞌimainun kana me ꞌukëmëu unë́ti sinanx unëtiabi anuabi chikínti ꞌain; ꞌanan kana naíkamë ꞌëonu kuaruti sinanx kuarukë abi ubunun ꞌimiti ꞌain ënuax ka uíxbi ië́tima ꞌikën.

³ ꞌIanan kana aín bashi Carmelo kakë aín rëbu anu unë́ti sinánkëbi, ꞌënbi anua bari kuanti ꞌain; ꞌianan kana ꞌëmi unë́ti sinanx parúmpapa ꞌukëmëu kuankë ꞌikëbia, anu ꞌikë ñuinakan ꞌëo an masókin këñuanan ꞌatima oti xuti ꞌain;

⁴ ꞌimainun kana axa ami nishkë unikaman ñatanbiankin buánkë ꞌikëbia, anuabi manë xëtokën ꞌakin rëtënun ꞌamiti ꞌain. ¡Usa ꞌain ka ꞌën atu iskë ax upíokin ꞌakinti kupí iskëma ꞌikën!”

⁵ Diosan ka ax kushiira ꞌixun, me axa tukibuti pankabunun ꞌimia usai ꞌikëbë ka kamabi unikama anu ꞌikë ax inia. Usai ꞌikëbë ka mex kuaruanan kuabutia, Nilo kakë baka ax ꞌë tankëx kuabúkë usaribiti ꞌia.

⁶ Diosan ka naíkamë ꞌëonu aín xubu ꞌakëxa ꞌanan ka an me tuinti kamaribi menu ꞌakëxa; an ka parúmpapa ꞌumpax timë́tankëxa me chabói ꞌibúnun ꞌimia. Ax ka Nukën ꞌIbu Dios, kamabi kushiñu kakë a ꞌikën.

⁷ Ësai ka Dios kia: “¿Mitsun kaina upí unibuisamina ꞌai kixun sinánkanin? Israel kama mitsux kamina, etíope unikamasaribi ꞌain. ꞌËn kana Egipto menua mitsu bëakën, usaribi okin kana Creta menua filisteo unikama bëanan, Quir kakë anuaribi arameo unikamaribi bëakën usa ꞌaínbi kamina mitsux atukamasama ꞌain.”

⁸ ꞌËn kana ënë ëmanu ꞌikë unikama ꞌuchañu isan, usa ꞌain kana ësai kin: “ꞌËn kana ënë menua atu këñuti ꞌain, usa ꞌaínbi kana Jacobnën rëbúnkikama kamaira këñutima ꞌain. ꞌËx Dios ꞌaish kana, ësai kin.

⁹ ꞌËn kana ꞌën uni Israelkama bëtsi ëma kamanua bëkin anun tuanti ꞌakë anun ñu tuankëxa ñu bëru pakëkëma usaribi okin uinu ꞌikë ax kara inutia isti ꞌati ꞌain ꞌaínbi ka uinu ꞌikë axbi inútima ꞌikën.

¹⁰ ꞌImainun ka kamabi uni ꞌuchañukama ax ꞌën unikamabë tsókëkama: ax ka manë xëtokën ꞌakëx bamati ꞌikën. ꞌImainun ka axa usa ñuka nunu: inútima kianan, ꞌaisama ñu kananuna nux ꞌinutima ꞌai kikë akamaxribi bamati ꞌikën.

Diosan ka aín uni Israelkama birukin mëníokanun ꞌimitëkënti ꞌikë kikë bana

¹¹ A nëtë ꞌikëbëtan kana ꞌën David ꞌapu ꞌain ꞌasaribiokin Israel unikama ꞌapuñu ꞌinun ꞌimiti ꞌain. ꞌImikin kana kamabi ñukama anu ꞌikë akama ꞌatëkënun ꞌamiti ꞌain,

¹² usa ꞌain ka axa Edom menu bërua ꞌimainun bëtsi ëmakamanu bërua akamax amiribishi Israel menubi kuantëkënti ꞌikën.” Usai ka Dios kiaxa usa ꞌain ka aín bana kikësabi oi ꞌiti ꞌikën.

¹³ “ꞌIanan ka anun trigo bimi bikin këñúkë ꞌaímabi anu ñu ꞌapáti me tukati nëtë ꞌiti ꞌikën, ꞌianan ka anun uvas aín baka biti chakakin sënë́onkë ꞌaímabi anun trigo ꞌapáti nëtëribi ꞌiti ꞌikën. Usai ꞌikëbë ka aín bashikama ꞌimainun matákamanu ꞌumpax chikutia iskësaira uvas baka ꞌiti ꞌikën.

¹⁴ Usai ꞌikëbëtan kana ñatanbiankin ami nishkë unikaman aín menu buan Israel unikama bëtëkënti ꞌain. Bëkëxun ka amiribishi anuax kaikin atun ëmakama birutëkënkin ꞌatankëx anu tsókin; uvakama ꞌapáti ꞌikën ꞌapáxun ka aín baka xëati ꞌikën; ꞌanan ka aín xubu rapasu ñu ꞌapáxun bimia aín bimi piti ꞌikën.

¹⁵ Usokin ꞌimikëx aín menubi tsotia ka uínsaranbi amiribishi axa ami nishkë unikaman aín me ꞌën ꞌinan anua buántëkëntima ꞌikën.” Ësai ka Dios kiaxa.