Amós 8 - Kashibo-Kakataibo Biblia

Amósnën namákësokin ñu bimi pëkë́kë tasánu purukë isa ñuikë bana

¹ Ënë ka Diosan namákësokin ꞌë ismiakëxa: Anu ka tasá achúshi anu ñu bimi pëkë́kë purukë ꞌiakëxa,

² usa ꞌain ka an ꞌë ñukákëxa: —¿Amós añu kaina isin? —Achúshi tasánu ñu bimi pëkë́kë purukë —kana isi kixun kana ꞌën kakën. Kakëxun ka Diosan ësokin ꞌë kakëxa: —Israel unikamax ka ñu bimi pëkë́kë usaribi ꞌikën usa ꞌain ka anun ꞌën ꞌatimoti nëtë ꞌiaxa.

³ Usa ꞌain ka a nëtë ꞌikëbë ꞌapun xubunuaxa kantakë a nëtë́ti ꞌitsaira uni bamakë ain inkë ꞌiti ꞌikën. Usa ꞌain ka ꞌitsaira uni bamakëbë bana nëtë́këbëtan bamakë unikama an maínti aíma ꞌain ëman pukë ꞌiti ꞌikën. Usai ka Dios kiaxa.

Anun Israel unikama ꞌatimoti nëtë ka ꞌuramatia kikë bana

⁴ An ñu kuëënkin bisatankë ꞌimainun uni ñuñumakama an me masókë mitsun kamina ënë bana kuati ꞌain;

⁵ Mitsux kamina ësai kikanin: “¿Uínsaran kara nun trigo marunun ꞌuxë ió ꞌikëbëtan fiesta ꞌati nëtë ax inuti ꞌik? ¿Uínsaran kara anun ñu mëëtima nëtë sábado ax anun nun trigo bimi kupíira marukinbi anun tupúnti anun tupunkinbi mëkamanun a nëtë inuti ꞌik?

⁶ ¡Usa ꞌain kananuna ñuñuma unikama an nu ribinkë kupíoi nunubi tënun ꞌimiti ꞌain, usokin ꞌakëxun ka rabë́ taxakara kupínbi nu ñu mëëxunti ꞌikën! ¡Usai ꞌia kananuna trigo ꞌaisama abi atu maruti ꞌain!”

⁷ ꞌËx kana Israel unikaman Dios ꞌain: “usa ꞌixun kana atun ꞌatima ñu ꞌakëkama uínsaranbi manutima ꞌain.”

⁸ ¿Ënë ñukama kupín kara me shaíkitima ꞌik? ¿Kamabi aín unikamax kara intima ꞌik? ¡Mex ka kuarutankëxbi ubutëkënti ꞌikën, Nilo kakë baka ꞌëi chaakin maputankëxbi kuabútëkënkë usaribiti!

⁹ “A nëtë́an ꞌiti ñui ka Dios ësai kiaxa, ꞌën kana maníti xamánruibia bë́ankinun bari ꞌimiti ꞌain, ꞌimianan kana nëtë xabá ꞌikëbia bë́ankikin me mapunun ꞌimiti ꞌain.

¹⁰ Usokin ꞌanan kana fiesta ꞌaia kuëënkankë aribi uni bamakë ꞌain nitë́xëkë usaribi ꞌinun ꞌimiti ꞌain, ꞌimainun ka atúxa kantakë axribi maínnuxun bamaia uni bënini rarumakë usaribi ꞌiti ꞌikën; usakin ꞌimikëx kamina uni ñukëbëtan pañukë chupa a pañuanan mitsux, ka nitë́xëtia kixun unin istánun anun paëi ꞌën ꞌimikëx nikin mitsun bu tëai maxkúkanti ꞌain, usai ꞌika aín bakë bëchikë achúshira ñumiaxa uni masá nuituti inkë usai ꞌikanti ꞌikën, usai ꞌika kamaxi aín sinan nishkëoi ꞌikanti ꞌikën.

¹¹ Ësai ka Dios kiaxa —anun usai ñu ꞌiti nëtë ka aia, usa ꞌain ka ꞌën bana a piti ꞌaíma ꞌain numin ꞌikësa ꞌimainun a xëati ꞌumpax ꞌaíma ꞌain shimakësa ꞌën bana kuati ax ꞌiti ꞌikën; usai ꞌika ꞌën bana kuati bari mekama oi uni niti ꞌikën.

¹² Usa ꞌaish ka uni amami kikësa ꞌixun, An Diosan bana ñuixunti uni bari, parúmpapa itsinuax bëtsi parúmpapanu kuani nianan aín tsipúmiax amiaxa bari urukë ami kikiani kuanti ꞌikën, ꞌaínbi ka usai nikinbi ꞌën bana mëratima ꞌikën.

¹³ ꞌImainun ka xanu xuntaku upíirabu ꞌimainun uni bënábu aín sinan kushibu akamax ꞌën bana kuatima shimax ꞌikësai bënánkanti ꞌikën.

¹⁴ Usai ꞌimainun ka numi ꞌain ꞌikësai an Samarianu ꞌikë ñu tankin ꞌakë dios rabikë unikama ꞌianan, an Dannu ꞌikë dios rabikë, ꞌimainun Beersebanu ꞌikë dioskama ax isa dios bamakëma a ꞌikë kixun aín anë ñui bana akamax, uínsaranbi nirutëkënuxma pakëkë ꞌiti ꞌikën.”