Amós 6 - Kashibo-Kakataibo Biblia

Israel unikama Diosan tëmëramia ñuikë bana

¹ ¡Axa Jerusalén ꞌikëbi Sión kakë anu tëmëraima bukukë unikama! ¡ꞌianan Samaria ëmanu uisaibi kananuna ꞌima kixun sinani bukukë ꞌapukama, amia Israel unikama katamëkë atux ka kuanti ꞌikën!

² Calné kakë ëma anu kuanxun kamina isti ꞌain; anuax kamina Hamat kakë ꞌimainun, filisteo unikama anu ꞌikë Gat kakë ëma anu kuabuxun uisa ñu kara anu ꞌia isikuanti ꞌain. ¿Mitsux kaina a ëmakamasamaira upíira ꞌikanin? ¿Mitsun ëma ax kara atun ëmasamaira ꞌik?

³ Mitsun kamina upiti bukukinbi uisa ñu kara inuti ꞌikë a ꞌunánkaniman, usa ꞌain ka a sinanimami bukukë a ñunbi mitsu ꞌatima oti ꞌikën.

⁴ Mitsun kamina anu uxti ñu xëta ꞌakë upíira anu rakáxun nëtë inúmin, usai ꞌikin kamina oveja tuá bërí kanikëkama a ꞌimainun vaca bërí kanikëkama xuairabu a ꞌaxun pikanin;

⁵ usai ꞌikin kamina; Davidtan ꞌasaribiokin flauta ꞌakatsi kixun, uisakin mëëti kara ꞌunánkimabi ꞌakatsi kixun tankanin;

⁶ ꞌanan kamina uvas baka ꞌakë ami xëati chaiira ami xëakanin, ꞌianan kamina sanuira rokama anúnribi ꞌikanin, ¡usai ꞌikin kamina uisai kara ënë ëma ꞌiti ꞌikë kixun abi sinánkaniman!

⁷ Usa ꞌain kamina mitsux irapain ñatanbiankin buánkë ꞌinuxun ꞌain, usakin ꞌakëbë ka mitsumi tsuákiruxun piti ꞌakë ax nëtë́ti ꞌikën.

⁸ Usa ꞌain ka Dios ax asérabi sinanatëkëntima oi ësai kiaxa; Dios kamabi kushiñu ax ka usai kia: ꞌËn kana Jacobnën rëbúnkikamaxa rabiakakë a kuëëniman usa ꞌain kana ꞌapun xubukamanua ꞌikë ñu upíbu; a axa ami nishkë unikaman atun ëmanua buántanun ꞌamiti ꞌain.”

⁹ Usa ꞌain ka mapai rabë́ uni achúshi xubunu bërúti akamaxbi bamakë ꞌiti ꞌikën.

¹⁰ Usa ꞌain ka unin aín aintsi xubu ꞌukëmëu bamakë biruti ax rakuë́ chaiira ꞌiti ꞌikën, usa ꞌain ka aín aintsi an bëtsi ñukáti ꞌikën: ñukákëxun ka bëtsin ꞌukëmëu kamina kuanti ꞌai kixun kati ꞌikën. “¿Anu kara bëtsi uniribi mibë ꞌaíma ꞌik?” Aíma ka kixun ka bëtsi kati ꞌikën. Kakëxun ka ax pain atsínkë an bëtsi kati ꞌikën: “¡Ka nëtët, Diosan anë ñuimina ꞌatimati banai kixun!”

¹¹ Usa ꞌain ka Diosax xubu cha akama ꞌimainun xubu chukúmakama ax ka ꞌatimokëx kamáxbi ꞌaíma ꞌiti ꞌikë kiax kiti ꞌikën.

¹² ¿Caballokamax kara xaxun pobu anun abáti ꞌik? Ka ꞌitima ꞌikën. ¿Parúmpapax kara me ꞌakësaribi okin tukapakin buinaisa ꞌik? Ka ꞌaisama ꞌikën, ꞌaínbi kamina mitsun upíokin ñu ꞌati ꞌikëbi muka ro ꞌakësokin ꞌakan ¡usakin ꞌakin kamina upíokin asérabi bëtsi ꞌatima onux këmëi banatima ꞌain!

¹³ Mitsux kamina këmëishi kikanin: “Nun kushínbi kananuna achúshi ëma biti ꞌain bianan kananuna ëma kushiirakama abi ꞌati ꞌai kiax kikanin.”

¹⁴ Israel unikama mitsun kamina upíokin kuati ꞌain; Nukën ꞌIbu Dios kamabi kushiñu ax ka ësai kia: “ꞌËn kana achúshi ëmanu ꞌikë unikama an mitsu, asérabi tëmëramikin atsanmiti xuti ꞌain, xukëx aín tsipúmiax ukin ka aín rëbumi okin tëokima mitsu atun ꞌati ꞌikën.”