Amós 5 - Kashibo-Kakataibo Biblia

Israel unikama ka amiribishi Dios mi sinanatëkënti ꞌikë kia bana

¹ Israelkaman ka ꞌën bana kuati ꞌikën; ꞌëx kana usaími mitsux ñu inuti masá nuituti a ñui kin.

² Israel unikama asérabi upíira, upí ax ka xu xanu unibë ꞌikin tankëma axa bënuax kuëëni tsókëma a ꞌunánkëma ꞌaíshbi ꞌakë usairibi ꞌiaxa; usai ꞌika uínsaranbi nirutëkëntima oi pakëakëxa. Usai ꞌika aín menubi rakabuti ñukankëxa, usa ꞌaínbi ka an birutëkënti ꞌaíma ꞌikën.

³ Ësokin ka Diosan Israel unikama kaia: “Achúshi ëmanuxun mil uni ꞌakanania kuantanun xukë ax ka upí ꞌitima ꞌikën, ꞌaínbi ka cien uníxëshi uisaibi ꞌikëma asábi utëkënti ꞌikën; ꞌimainun ka bëtsi ëmanuxunribi cien uni ꞌakanania kuantanun xuti ꞌikën, ꞌaínbi ka diez uníxëshi uisaibi ꞌikëma asábi utëkënti ꞌikën.”

⁴ Ësakin ka aín ꞌIbu Diosan Israel unikama kaia: “Abi xënibuax tsótisa tani, kamina ꞌëmi sinánkanti ꞌain.

⁵ Betel kakë anu kuanxma ꞌianan kamina, Guilgal kakë anu ꞌikë anuribi kuankantima ꞌain usai ꞌi kamina Beerseba anu ꞌikë anunribi inútima ꞌain, Guilgalnu ꞌikë unikama ka ñatanbiankin uankë ꞌiti ꞌikën, ꞌimainun ka Betel ax uniñuma ñankáishi bërúti ꞌikën.”

⁶ Israel unikama mitsux kamina Diosmi sinanatëkënti ꞌain, usai ami sinánkëbëtama ka Israel unikaman ëma axa ami nishkë unikaman tsin mënuti ꞌikën. Usakin akëbë ka an tsi rëkirukë a Betelnua bënánti ꞌaíma ꞌiti ꞌikën.

⁷ ¡Mitsun kamina bëtsin ꞌatima okë unikama upíokin ꞌakinkëma ꞌain ꞌianan kamina ꞌakinsa ꞌikëbi ꞌakinkëma ꞌain!

^8-9 Diosan ka naínu ꞌikë ꞌispakama ꞌimainun, ꞌispónkama ꞌakëxa, an ka imë́ nëtë ꞌinun ꞌimianan, nëtë aribi imë́ ꞌinun ꞌimia këxa; an ka parúmpapa ꞌumpax timëtankëxun chabóia menu ꞌibúnun ꞌimia; uin kara anun ëma kënëara a rurupatia. Ax ka kamabi kushiñu Dios a ꞌikën.

¹⁰ ¡Mitsun kamina an asérabi ñu ꞌakë ꞌimainun, axa asérabi banakë unikama a kuëënkaniman!

¹¹ Mitsun kamina kuríkiñu ꞌixun ñuñuma unikama a ꞌatima okin atun trigo kupísa mitsu kupíonun kixun ꞌamin, usa ꞌain kamina mitsun xubu maxá upíokin ꞌakë anubi ꞌima ꞌianan, mitsun ꞌapákë uvas baka abi xëakantima ꞌain.

¹² ꞌËn kana bëtsi bëtsi ñu ꞌaia ꞌitsaira nëtë́tisamaira ꞌinun atux ꞌuchakëkama a ꞌunan: Usa ꞌixun ka uni upíbu a ꞌatima okin anuxun bana mëníokë anuxun ꞌapukaman kuríki bitsia uni ꞌatimakama anun rabanan në́kin, ka uni upíkama ꞌatima oia, usa ꞌain ka ñuñu unikaman bana mëníokin uni ñuñuma a ñuumasara ꞌikë kanania.

¹³ Usa ꞌain ka uix kara sinánñuira ꞌikë ax banaima nëtë́kë ꞌiti ꞌikën, ënë nëtë ka ꞌaisama ꞌikë usa ꞌain.

¹⁴ Usa ꞌain ka uisa ñux kara upí ꞌikë ashi ꞌanan uisa ñux kara ꞌatima ꞌikë a ënë upiti tsókanti ꞌikën; usai ꞌikëbë ka mitsúxmi kikë bana ax asérabi ꞌiti ꞌikën: usa ꞌain ka Dios, kamabi kushiñu ax mitsubë ꞌikën.

¹⁵ ¡ꞌAtima ñu a timakin kamina! ¡Upí ñuishi ꞌati ꞌain! anuxun bana mëníoti anuxun kamabi upíokin ꞌakinkëbë; sapi ka Dios, kamabi kushiñu ax mitsubë ꞌiti ꞌikën, usai ꞌikin ka axa raíri këñumainun tsókëpan Israel unikama a nuibati ꞌikën.

¹⁶ Ësai ka Dios kamabi kushiñuira ax kia: “Kamabi ëmanu anu bukuti mëníokë anuax bëunan mëskuti ꞌimainun ka anun ëmanu niti baikamanuax kuënkëni paëtani ꞌiti ꞌikën. ꞌImainun ka axa naënu tëëkë unikama atux anuaxbi inkanti ꞌikën, inkëbë ka inkëntapunkama axribi anua inkë anuaxbi inti ꞌikën.

¹⁷ Kamabi uvas ꞌapákë naëkamanuax ka ꞌën atu tëmëramiti ukëbë inkanti ꞌikën.” Usai ka Dios kiaxa.

¹⁸ ¡An Diosan nëtë ꞌiti ꞌitsaira kainkë unikama! ¿Uisa kara a nëtë mitsunan ꞌiti ꞌikë kixun kaina ꞌunánkanin? A nëtëx ka ami rakuë́kë ꞌianan bëánkibukë ꞌiti ꞌikën, kara xabá ꞌitima ꞌikën.

¹⁹ ꞌIanan kara achúshi uníxa paru ꞌinúanën nuikëx abatibi xaëón manan ꞌirukë usaribi, ꞌianan ka achúshi uni abákuatsini uax tanti ñu sinanimaishi aín xubunu atsíntankëx, këpiti tsóbutiabi achúshi runun ꞌakë usaribiti abáti katamëtima ꞌikën.

²⁰ Asérabi ka anun ꞌëx uti nëtë ax bëan bëánkibukë ꞌianan xabá ꞌitima ꞌikën; usa ꞌaish ka a nëtë anun kuëënima ꞌitsaira masá nuituti nëtë ꞌiti ꞌikën.

²¹ ꞌËn kana mitsunmi timë́xun fiesta ꞌakë a asérabi kuëëniman; ꞌimainun kana ñu rabi timëkankë abi istisama tankin timain.

²² ꞌËn kana mitsunmi ñuina ꞌaímai xarátanun ꞌë xaroxunkë abi kuëëniman, ꞌimainun kana ꞌë ꞌinaínshiti bikë ñu bimikama abi istisama tanin; ꞌianan kana vaca bakë xuairabu anúnmi mitsux ꞌuchakë mëníokakanti ꞌë ꞌaxunti mi bëkankë akamabi istisama tanin.

²³ ¡ꞌËn kana kantai shárakankë abi kuaisamatankin timain! ¡ꞌIanan kana mitsun arpa banamikin mëëkë abi kuëëniman!

²⁴ ꞌAínbi ka bëtsi uni ꞌatima oima upiti tsóanan nuibanankë ax kuni ꞌumpax shióbukë usaribi ꞌiti ꞌikën, ꞌimainun ka nuibanankë ax kuni ꞌumpax upíira këñúkëma usaribi ꞌiti ꞌikën.

²⁵ “Israel unikama, ¿mitsun chaitiokëkaman kara cuarenta baritia anu uni ꞌikëma menu nikin ñuina xaroxuanan, ꞌë ꞌinánti bikë ñu a ꞌë ꞌinankankëx?

²⁶ Bërí kamina mitsun ꞌapu Sicut kakë tankin ꞌakë ꞌianan aín ꞌispa Quiiún kakë a ꞌë ꞌaxunkima ñuina xaroxunkanin, usa ꞌain kamina mitsun dioskama tankinmi akan a ꞌiax abëbi kuankanti ꞌain.

²⁷ Usa ꞌain kana ñatanbiankin mitsu axa mimi nishkë unikaman Damasco ëma inumibiankin buántanun ꞌamiti ꞌain. Usai ka Dios kamabi kushiñuira ax kia. Usa ka aín anë ꞌikën.