Amós 4 - Kashibo-Kakataibo Biblia

¹ Samarianu ꞌikë xanukama ësokin mitsu kamainun kamina kuati ꞌain: Mitsux kamina Basán menu ꞌikë vaca ain xanu xuabu usaribi ꞌaish xubairabu ꞌain, usa ꞌixun kamina uni ñuñuma ꞌatima onan, an ñu kuëënkin bisatankë a ꞌianan, mitsun bënëkamaribi a xëati uvas baka paëokin ꞌakë bëxunun kixun kain.

² ꞌAínbi ka Dios upíira kamabi kushiñu ax ësai sinanatëkëntima oi kiakëxa: “Anun ꞌën mitsu kuëkinan bikësa obiankin uanan, mitsun bakë bëchikëkamaribi mishkitinën bëmë́ti nëtë ka ꞌiti ꞌikën.

³ Usakin ꞌakëx kuani ka anun kënëara kënë pëánkakë anun chikiti sënë́nbi puntëkiani kuani ka ain bashi Hermón kakë anu niti ꞌikën.” Usai ka Dios kiaxa.

Diosan ꞌatima okëxunbi Israel unikaman ꞌunántisama tan ñuikë bana

⁴ “Mitsux kamina Betelnu kuanan Guilganuribi kuankan ꞌain, ¡anuax ꞌuchakani kamina mitsux bana kuatima ꞌikësairai ꞌikanti ꞌain! Usai ꞌikin kamina ami pë́karakëma ꞌaínshi xaroti, ꞌimainun mapai rabë́ ꞌikëbi achúshi bikë aribi rabë́ ꞌimainun achúshi nëtë ꞌikëbë ꞌikëbëtan ꞌaíbi kamina ꞌuchakanin.

⁵ Mitsun kamina anun chamiti ñukëñunma ꞌakë pankama akamina asábika kakin xaroxunkanin usakin ꞌaibi kamina ꞌuchakanin, ꞌimainun kamina kamabi unin ꞌunántanun a ꞌináishiti bikë akama chaniokanin, usokin ñu ꞌati kamina mitsun kuëënkanin. Usai ka Nukën ꞌIbu asérabi kiaxa.

ꞌAtima ñu ꞌai tëmëraibi ka Israel kama sinanatima kixun ñuikë bana

⁶ ꞌËn kana mitsun ëmakanuaxmi panani tsónun mitsu ꞌimiakën; ꞌimianan kana kamabi uníxa pitiñuma ꞌinun ꞌimiakën, ¡usa ꞌaínbi kamina mitsux ꞌëmi sinanatëkëinsama tankën!” Usai ka Dios kiaxa.

⁷ ꞌImainun kana mitsun ñu ꞌapákë pëkë́misa tankëbëtanbi ꞌuí ꞌibúnun ꞌimiama ꞌain. “ꞌImianan kana bëtsi ëmanu ꞌuí ꞌibúmianan bëtsinu uí ꞌibúnun ꞌimiama ꞌain; usokin ꞌakëbë ka anua ꞌuñe ꞌibúkë ni ax chabá ꞌimainun anua ꞌibúkëma ni ax ꞌumpax ꞌaíma ꞌain me ë́skiakëxa;

⁸ usai ꞌikëbë ka unikama ëmaitsi ëmaitsinu ꞌumpax bari kuankëxa; usai nikinbi ka ꞌumpax cha shimaxun xëatisabi mërakama ꞌikën, ¡usa ꞌaínbi kamina mitsux ꞌëmi sinanatëkëinsama tankankën!” Usai ka Dios kiaxa.

⁹ “Usa ꞌain kana amiaxa bari urukë amiax suñu kushiira ukian, mitsun ñu ꞌapákëkama masómainun, ñu ꞌatimakama aribi ꞌanun ꞌamiakën, ꞌamianan kana mitsun ꞌapákë ñukama ꞌimainun uvas ꞌapákë akama chushitanun ꞌimiakën, usai ꞌimainun ka champun mitsun higuera ꞌimainun olivos akama ain pëi pinun ꞌamiakën, ¡ꞌaínbi kamina mitsux ꞌëmi sinanatëkëinsama tankankën!” Usai ka Dios kiaxa.

¹⁰ “Usa ꞌain kana ñu ꞌatima Egipto menu ꞌimiasaribi okin atunu ꞌimiakën; uni bënábukama anuax ꞌakanankë me anuax bamanun ꞌimiakën, usakin ꞌanan kana atun caballokama axa ami nishkë unikama atunan ꞌinun ꞌibuanun ꞌamiakën, ꞌamianan kana anua atux ꞌikë anuaxa ñukë unin ꞌisha xënun xëmiakën, ¡usa ꞌaínbi kamina mitsux ꞌëmi sinántëkëntisama tankankën!” Usai ka Dios kiaxa.

¹¹ “ꞌAnan kana atu ꞌatimaira okin achúshi ñun Sodoma ꞌimainun Gomorra ꞌasaribiokin ꞌakën; ax ka tsi ënxaira anua aín ëxku ënxaira bikësa ꞌiakëxa, ¡usa ꞌaínbi kamina mitsux ꞌëmi sinanatëkëinsama tankankën!” Usai ka Dios kiaxa.

¹² “Usa ꞌain kana Israel unikama mitsu usaribi okin ꞌati ꞌain; ꞌën kana ꞌai usa ꞌain, ¡usa ꞌain kamina mitsux Diosbë mërananux mëníokakanti ꞌain!”

¹³ Nukën ꞌIbu Dios an bashikama unionan suñu bëkinun ꞌimikë, ꞌimainun uisa ñukama kara ꞌakatsia akama uni ꞌunánmikë, ꞌianan an bë́anbëankikë anubi nëtë xabá ꞌimianan, kamabi menu ꞌikë bashi manankama a manami anubi ꞌikë ax ka kamabi kushiñuira Dios a ꞌikën, ax ka ain anë ꞌikën.