Amós 3 - Kashibo-Kakataibo Biblia

Diosan Israel unikama atun ꞌucha kupín ꞌatima oti bana

¹ Israel unikama mikaman kamina ësai ka Dios kia kuati ꞌain, an ka aín uni ꞌikë Egipto menua chikíankëxa:

² “ꞌËn kana kamabi menu ꞌikë unikama ꞌakima mitsuishi kaisakën. Usa ꞌikë kana uisa ñu ꞌatimakama kaina ꞌakan usakinbi a kupín mitsu tëmëramiti ꞌain.”

³ Achúshi achúshi ñu ꞌikë ax ka an ꞌimiti anu aia ꞌikë ꞌikën, ¿Rabë́ uníxa ënananima nikë ax kara usakin kananuna ñu ꞌati ꞌai kiax kanamaxa ꞌikë ꞌik? Usama kat;

⁴ paru ꞌinuánëxa ninuax kuëërukë ax kara aín piti ñuina biaxa ꞌikë ꞌiti ꞌikën. Usa kat; paru ꞌinuán tuá axa kininuax kurukikë ax kara aín piti ñuina biaxa ꞌikë ik usa kat;

⁵ ¿achúshi ꞌisá menu pakëkë ax kara ami ꞌiti ñu nankë ꞌaia ami ꞌikë ꞌik? Usa kat; ¿anu ñu ꞌiti nankë axa menuax tarishkikë ax kara amia ñu ꞌikëxa ꞌikë ꞌik? Usa kat;

⁶ ¿manë banañu ëmanuxun banókë ax kara, anua unikama mëníokati ꞌakë ꞌik? Usa kat; ¿ñu ꞌaisama ëmanu inúkë ax ka Dios usai ꞌiti kuëënkëbëa ꞌikë ꞌiti ꞌik? Usa kat.

⁷ Usa ꞌain ka uinsaranbi Nukën ꞌIbun aín bana ñuikë unikama a usakin kana ñu ꞌai kixun ꞌunánmixuma ñu ꞌaima.

⁸ Uínsaran kara paru ꞌinúan kuëruia anun kara ¿uix rakuë́ti bërëima ꞌiti ꞌik? Ka rakuë́ti ꞌikën. ¿Uin kara Dios kamabi kushiñu axa kuërukësa ꞌinun banakëbëtan tënëti ꞌik? Uínbi ka ꞌatima ꞌikën.

Dios Samaria ëma ka ꞌaisama okin këñúkë ꞌiti ꞌikë kia ñuikë bana

⁹ An bana ñuikë mitsun kamina anu kuantankëxun, Asdodnu ꞌikë unikama ꞌimainun: Egiptonu ꞌikë unikama mikaman kamina; “Samarianu ꞌikë unikama kara Diosan uisa oia isi unun kati ꞌain anuxun ka suntárukama aín bashi manan bukuxun aín aintsibi tëmëramianan ꞌatima okë a isi uti ꞌikën.”

¹⁰ Ësai ka Dios kia: “Atun ka upíokin ñu ꞌati ꞌunanima; usa ꞌixun ka ꞌapun xubukamanu bënë́kinshia mëkamakin bikë ñukama bukunruaxa.”

¹¹ Usa ꞌain ka ësai Nukën ꞌIbu Dios kia: “Axa ami nishkë Samaria ëmanu ꞌikë suntárukama me tsitsiru bëtsini amami amamiax ukin ka anun ëma bëararakë a rurupabiani atsínxun ꞌapun xubukamanu ꞌikë ñukama biti ꞌikën.”

¹² Ësai ka Nukën ꞌIbu kia: “An ñuina bërúankë unían paru ꞌinúanën pikëbi aín, taë rabë́ bianan aín pabí rëbura bikë usaribiti ka Israel unikama axa Samaria menu tsókë akamax ꞌitsamashi abáti ꞌikën, ꞌianan ka an xubu upíirakama anu tsóti ꞌanan, ami tëpi rakati Damasconu ꞌikë xubukama anu ꞌakë atúxribi abáti ꞌikën.”

¹³ Nukën ꞌIbu Dios kamabi kushiñuira ax ka ësai kia: “Mitsun kuakin kamina uisai kara Jacobnën rëbúnkikama ꞌiakëxa kixun a ñuiti ꞌain,

¹⁴ uisa nëtën karana ꞌën Israel unikama atun ꞌucha kupín tëmërami anun kana, anuxua atun dios rabikin ñuina xarokë Betelnu; ꞌikë a ꞌaisama onan masókin; ain mancha akamaribi tukapakëxa menu rëukubutanun ꞌimiti ꞌain. (Manchan kikë ax ka aín kushi ki kikë ꞌikën.)

¹⁵ ꞌAnan kana anuxun mita inúmiti ꞌanan, anu baritia inúmi tantiti xubukamaribi ꞌati ꞌain, ꞌanan kana xubukama ñuina xëtakëñun mëskukin, kuríkiñu unikaman ꞌamikë akamaribi ꞌimainun ꞌapu chaiirabu akamaribi këñuti ꞌain.” Kiax ka Dios kiaxa. (Xubu kuríki.)