Amós 1 - Kashibo-Kakataibo Biblia

Nukën ꞌIbun Amós kuëan ñuikë bana

¹ Ënë banax ka Amós kakë uni an ñuina bërúankë Tecoanu ꞌikë uni a Diosan usokin ka Israel kama ꞌati ꞌikë kixun, rabë́ baritia anúan me shaíkiti ꞌisama pain ꞌain ká bana ꞌikën, usa ꞌain ka a barikaman Ozías ax Judá menu ꞌapu ꞌimainun Jeroboam Joásnën bëchikë axribi Israel menu ꞌapu ꞌiakëxa.

² Uínsaran kara Nukën ꞌIbu Dios ax Sión kakë aín bashi anuax banaia anun ka Jerusalénnuax kaná banakësaribi banai kiti ꞌikën, kia kuakëbë ka an ñuina bërúankë unikaman anuxun aín ñuina pimikë pasto ꞌimainun ka Carmelo kakë ain bashi rëbunua ꞌikë xëxá rëbukama axribi ëskiti ꞌikën.

Dios Jerusalén rapasu ꞌikë ëmakama ꞌatima okatsi kia bana

³ Ësai ka Dios kia: “Damasconu ꞌikë unikaman ka ꞌitsaira ꞌatima ñuira ꞌaxa, usa ꞌain kana atu ꞌaimama ꞌikinma ꞌatima oti ꞌain; atun ka Galaadnu ꞌikë ꞌën unikama trigo bimi manë xon tákakin rishkikësa okinra tëmëramiakëxa.

⁴ Usa ꞌain kana Hazael kakë ꞌapu kamabi aín aintsikama ꞌia a ꞌimainun bërí ꞌikë akamaribi ꞌaíma ꞌitánun tsin këñuti ꞌain, usakin ꞌakëxun ka a tsinbi Ben-hadad kakë ꞌapu ain xububi xarokin këñuti ꞌikën.

⁵ ꞌAnan kana atux kuëënkëbëtamabi Damasco ëma masókin ain xëpútikama xëputisama ꞌitánun chánkapati ꞌain; usokin ꞌanan kana Bicat-avén, ꞌikëbi, Bet-edén kakinribi anëkë anu ꞌikë ꞌapu ꞌati ꞌain, usakin ꞌakëbëtan ka sirionu ꞌikë unikaman Quirnu ꞌikë unikama ñatanbiankin buankanti ꞌikën.” Usai ka Dios kiaxa.

⁶ Ësai ka Dios kiaxa: “Gazanu ꞌikë unikaman ka ꞌitsaira ꞌatima ñuira axa, usa ꞌain kana ꞌaimama ꞌikinma atu tëmëramiti ꞌain; atun ka achúshi ëmanu ꞌikë uni kamabi ñatanbiankin buánxun, tëmëramikin ñu mëëmikë unisa ꞌikë Edomnu ꞌikë unikama maruakëxa.

⁷ Usa ꞌain kana anun Gaza kakë ëma kënëara a pain tsin bimiti ꞌain, ꞌakëxun ka a tsinbi ꞌapun xubukama këñukin në́nti ꞌikën.

⁸ Usokin ꞌanan kana Asdodnu ꞌikë unikama ꞌakin, Ascalón ꞌikë aribi masókin ꞌanan kana, ¡Ecrón nu ꞌikëkama aribi masókin këñuti ꞌain, këñukëx ka filisteo unikama ax achirabi bërútima bamati ꞌikën!” Ësai ka Nukën ꞌIbu kiaxa.

⁹ Ësai ka Nukën ꞌIbu kia: “Tironu ꞌikë unikaman ka ꞌitsaira ñu ꞌakin ꞌatima ñuira ꞌaxa, usa ꞌain kana ꞌaimama ꞌikinma atu tëmëramiti ꞌain; atun ka ꞌain ꞌaintsisa ꞌaish abë nuibanankë ꞌixunbi achúshi ñu ꞌá ami manukuainxun Edomnu ꞌikë unikama bëtsi uni ꞌakësokin ꞌinankëxa.

¹⁰ Usa ꞌain kana anun Tiro kënëara kënë a tsin bimiti ꞌain, ꞌakëxun ka a tsiinbi ꞌapun xubukama a këñukin xaroti ꞌikën.”

¹¹ Ësai ka Nukën ꞌIbu kia: “Edomnu ꞌikë unikaman ka ꞌitsaira ꞌaisama ñu axa, usa ꞌikë kana ꞌaimama ꞌikima atu tëmëramiti ꞌain; atun ka nuibakinma aín manë xëtokë tuínxun aín xukë́n Israel unikama nuibianxun ꞌakëxa. Usakin ꞌai ka kana nuibati ꞌai kixun sinanima atumi nishakëxa.

¹² Usa ꞌain kana Temán kakë ëma tsin bimiti ꞌain, usakin ꞌakëxun a tsinbi Bosrá kakë ëmanu ꞌikë ꞌapun xubukama aribi mënukin xaroti ꞌikën.”

¹³ Ësai ka Nukën ꞌIbu kia: Amónnu ꞌikë unikaman ka ꞌatima ñu ꞌakin ꞌitsaira ꞌaisama ñuira ꞌaxa, usa ꞌain kana ꞌaimama ꞌikinma atu tëmëramiti ꞌain; atun ka Galaad menu ꞌikë Israel unibunën xanu tuñukama atun me chaiira a bisatankin, panárabë okin tukapakëxa.

¹⁴ Usa ꞌain kana anun Rabá kakë ëma kënëara kënë a tsin bimiti ꞌain, bimikëxun ka a tsinbi ꞌapun xubukama nënkin xaroti ꞌikën, usakin ꞌakëx ka anun ꞌakánanti nëtë ꞌianan, nëtë masákuatsini kaná banakë usaribiti i amami amamiax unikama ꞌakánanti ꞌikën.

¹⁵ ꞌImainun ka aín ꞌapu aín menua chikínbiankin bëtsi menu buánkin, aín ꞌapu ꞌimainun aín kushibu akëñunbi buánkë ꞌiti ꞌikën. Usai ka Nukën ꞌIbu kia.