3 Juan 1 - Kashibo-Kakataibo Biblia

Gayo upí oquin ñuia Juan quia

¹ ꞌËx axa Jesucristomi catamëcë unicaman cushi ꞌixun cana, axa ꞌëx ꞌicësaribiti asérabi Nucën Papa Diosan uni ꞌaish ꞌë nuibacë Gayo, a ënë quirica buánmin.

² ꞌËn nuibacë xucën, mix Jesucristomi catamëcë ꞌixun upí oquin sinanimi chuámarua ꞌicësaribitimi min namicamaribi chuámarua ꞌinun cana mi Nucën Papa Dios ñucáxunin.

³ Axa Jesucristomi catamëcë uni raírinën ca anumi ꞌicënuax uxun ꞌë caxa, mix ismina asérabi ëníma Nucën Papa Dios cuëëncësabi oi ꞌi quixun. Usaquian cacëxun cuati cana cuëëan.

⁴ Bëtsi bana ñuia cuati ꞌicësamaira oi cana mixmi ꞌicësaribitia axa ꞌën bëchicësa unicamaxribi Nucën Papa Dios cuëëncësabi oi ꞌia ñuia cuati cuëënin.

⁵ ꞌËn nuibacë xucën, min upí oquin axa Jesucristomi catamëcë unicama ꞌaquianan bëtsi ëmanuaxa ucë unicamaribi ꞌaquinquin camina Nucën Papa Dios cuëëncësabi oquin ꞌain.

⁶ Anumi ꞌicë ëmanuax ucë unicaman ca ënu bëbaxun, axa Jesucristomi catamëcë unicamaxa timë́cënuxun, asérabimi nuibaquin usaquin atu ꞌaquincë nu ñuixuanxa. A unicama camina bëtsi ëmanuribi cuainsa tania añu cara cuëënia a ꞌaquinti ꞌain, Nucën Papa Dios cuëëncësabi oquin.

⁷ A unicamax Jesucristomi sináncë ꞌixun ca aín bana ñuixuanan mi isi cuanxa. Usa ꞌaish ca an Nucën Papa Diosmi sináncëma unicaman atu ñu ꞌinánti cuëëncëma ꞌicën.

⁸ Usa ꞌain cananuna nunbi atu ꞌaquinti ꞌain, Nucën Papa Diosan bana upí oquin ñuia ninun.

Diótrefes ax ca ꞌaisama uni ꞌicë quicë bana

⁹ Axa Jesucristomi catamëcë unicama cana atúan timë́xun cuanun quixun quirica buánmia. Buámicëbi ca Diótrefes axëshi a unicaman cushi ꞌiti cuëënquin, nun bana cuaisama tanxa.

¹⁰ Usa ꞌain cana anu cuanxun axa ꞌatimaquin nu ñui cëmëi banacë cupí cati ꞌain. An ca axa Jesucristomi catamëcë uni raíri anua cuania biisama tanan, an biisa tancë unicamaribi bixunma ꞌanun quixun caquin, mitsubëa timë́nun ꞌimima.

¹¹ ꞌËn nuibacë xucë́n, an ñu ꞌatima ꞌacë unían ꞌacësa oquin ꞌaquinma camina an ñu upí ꞌacë unían ꞌacësa oquinshi ñu ꞌati ꞌain. An ñu upí ꞌacë uni ax ca Nucën Papa Diosnan ꞌicën. Usa ꞌaínbi ca an ñu ꞌatima ꞌacë uni an ainanma ꞌixun Nucën Papa Dios ꞌunáncëma ꞌicën.

Demetrio ꞌicësaribiti upí ꞌiti bana

¹² Camabi unin ca —Demetrio ca upí uni ꞌicë —quixun ñuia. An upí ñu ꞌacë cupí ca ax asérabi usa ꞌicë quixun ca camabi unin ꞌunania. Ax ca aín sinan upí ꞌicë quixun cananuna a ñuiquin asérabi mi cain. Nun bana ca asérabi ꞌicë quixun camina ꞌunanin.

Ashiquian Juanën cá bana

¹³ ꞌËn cana ꞌitsa ñu ñuiquin mi caisa tan, ꞌaínbi cana tintan cuënëoquin a ñucama mi ñuixuniman.

¹⁴ Usa ꞌain cana bënëtishi mi isi cuanti sinanin. Cuanxun cuni cana mibë banaquin mi ñuixunti ꞌain.

¹⁵ Mixmi chuámarua ꞌiti cana cuëënin. Axa ënuax nubë nuibanancë unicaman ca bërúanxmi ꞌinun mi ꞌë camiaxa. Usa ꞌain camina anua ꞌicë axa nubë nuibanancë unicama achúshi achúshi, bërúanxa ꞌinun nu caxunti ꞌain. Ashi, Juan.