2 Timoteo 4 - Kashibo-Kakataibo Biblia

¹ Nucën Papa Dios ꞌimainun Nucën ꞌIbu Jesucristo, ax ꞌApuira ꞌaish uxuan uni bamacëmacama ꞌimainun uni bamacëcamaribi, uisa cara oti ꞌicë quixun isti, an cuamainun cana mi cain,

² minmi ñuixuncëxuan min bana cuanan, cuatiamabi camina uni bana ñuixunti ꞌain. Ñuixunquin camina Jesucristo ñuicë banax ca asérabi ꞌicë quixun ꞌunánmiquin amia sinánun ꞌaquinti ꞌain. ꞌAquianan camina an ñu ꞌaisama ꞌacë unicamaribi ꞌësëanan camabi uni Jesúsmi catamëcë ꞌaísha upí ꞌinun ꞌësëti ꞌain. Min cacëxun cuacëbëma bënë́quinma camina minmi upí oquin ꞌunáncë bana ñuixunquin uni ꞌësëti ꞌain.

³ Jesucristo utëcënti nëtë ꞌurama ꞌain ca unin Nucën Papa Diosan bana anúan atux upí ꞌiti a cuaisama tanti ꞌicën. A bana cuaisama tanquin ca unin, ainsa atúan cuaisa tancë bana ñuixunun quixun bëtsi unicama bariti ꞌicën.

⁴ Nucën Papa Diosan bana cuaisamaira tanquin ca unían anbi sinánquin ñuicë banaishi cuati ꞌicën.

⁵ Usa ꞌaínbi camina min upí oquinra sinánxun ñu ꞌati ꞌain. Tëmëraquinbi tanshiquin camina ënquinma —Jesucristomi catamëti ca uni Nucën Papa Diosnan ꞌiti ꞌicë —quixun caquin uni bana ñuixunti ꞌain. Nucën Papa Dios cuëëncësabi oquin camina sënë́onuxun ënquinma min ñu mëëti ꞌati ꞌain.

⁶ Nucën Papa Dios cuëënminuxun cana aín ñu mëëti ꞌan. Usa ꞌain ca ꞌën bamati nëtë ꞌurama ꞌicën.

⁷ Uisa ñuishi cara ꞌicëbë tëmëraquinbi cana Nucën Papa Diosan bana ënquinma uni ñuixunquin Jesucristonëan ꞌë cacësabi oquin ꞌaquin sënë́on. Usonan cana asérabi Nucën Papa Diosmi sinánti ëníma aín bana quicësabi oi ꞌian.

⁸ Usa ꞌixun cana Nucën ꞌIbu Jesucristonën utancëxun, upí oquin ax cuëëncësabi oquin ꞌën ꞌacë cupí cara uisaira ꞌë ꞌimiti ꞌicë quixun isti ꞌain. An ca asérabi aín quicësabi oquin ꞌati ꞌicën. Usa ꞌixun ca ꞌëishima, an axa uti cuëënquin caíncë unicamaribi, utancëxun uisaira oquin cara aturibi ꞌimiti ꞌicë usoquin ꞌimiti ꞌicën.

Ësaquinribia Pablonën Timoteo cá bana

⁹ Bënëtishi camina ꞌë isi uti ꞌain.

¹⁰ Demas ax ca ënë menu ꞌicë ñuishi ꞌaisamaira cuëëni, ꞌë ëbiani Tesalónica ëmanu cuanxa. Crescente axribi ca Galacia menu cuanxa. Cuanmainun ca Titoxribishi Dalmacia menu cuanxa.

¹¹ Lucasëshi ca ꞌëbë ꞌicën. Usa ꞌain camina Marcos barixun mërabëtsínquin ꞌëa Nucën Papa Diosan bana ñuiquínun bëti ꞌain.

¹² Tíquico cana Efeso ëmanu xuan.

¹³ Uquin camina Troas ëmanu Carponën xubunu ꞌën nanbëtsíncë tari a ꞌë bëxunti ꞌain. Bëxuanan camina ꞌën quiricacama ꞌë bëxuanan quirica catacama aribi manuxunma ꞌë bëxunti ꞌain, a cana cuëënin.

¹⁴ Alejandro, an manë ñu uniocë uni, an ca ꞌëmi manánxun ꞌitsaira ꞌë tëmëramiaxa. Usa cupí ca uisa cara oti ꞌicë usoquin Nucën ꞌIbu Diosan ꞌati ꞌicën.

¹⁵ Nun nu Nucën Papa Diosan bana ñuixuncëbë ca a bana ñui ꞌatimati banaxa, Usa ꞌain camina mix an ñuicë bana cuati rabanan abë nitima ꞌain.

¹⁶ ꞌË ñuia ami uni manáncëxuan, ꞌatabaquin amia uni manáncë ꞌapun camicëx cuanxun, ꞌën usai cana ꞌi quixun chiquinaquin caiabi ca uinu ꞌicë unínbi ꞌënun rabanan ꞌapu cacëma ꞌicën. Camáxbi ca ꞌë ëbiani cuanxa. Usa ꞌë ocëbi Nucën Papa Diosan uisabi oxunma ꞌatibi ca ꞌiti ꞌicën.

¹⁷ Acaman ëniabia Nucën ꞌIbu Jesucristonën ꞌaquinia ca a ꞌapun ꞌë uisabi ocëma ꞌicën. Usoquin ca ꞌinúan nëëcënëan piisa tancëxbia ñuina abácësaribi oquin, unin ꞌaisa taniabi Nucën ꞌIbu Jesucristonën ꞌë ië́miaxa. Usoquian ië́mitancëxun cushiocëxun cana aín bana ñuitëcëan, judíosma unicamánbia cuanun.

¹⁸ Usaquin ca Nucën ꞌIbu Jesucristonën ꞌë ꞌaquianxa. Usaribi oquin ca ꞌë ꞌaquintëcënquin uisa cara ocaniabi ꞌë ꞌaquinti ꞌicën. ꞌAquintancëxun ca ꞌëx aín nëtënu abë tsónun ꞌë ꞌimiti ꞌicën. Upíira ꞌicë ca cëñútimoquin unin Nucën Papa Dios rabiti ꞌicën. Usai ca ꞌiti ꞌicën.

Upíoquin sinánxunquian ashiquin Pablonën bëruanxa ꞌinun ca

¹⁹ Prisca ꞌimainun Aquila camina bërúanxa ꞌinun ꞌë caxunti ꞌain. ꞌImainun camina Onesíforonën xubunu ꞌicëcamaribi bërúanxa ꞌinun ꞌë caxunti ꞌain.

²⁰ Corinto ëmanu Erasto bërúmainun cana Trófimo aín nami upíma ꞌicë, Mileto ëmanu ëbian.

²¹ Mitabúcëma ꞌaínshi camina bënëtishi uti ꞌain. Eubulo, Pudente, Lino, Claudia, acama ꞌimainun an Nucën Papa Diosan bana ꞌacë unicamanribi ca bërúanxmi ꞌinun quixun mi camia.

²² Mibë ꞌixuan Nucën ꞌIbu Jesucristonën mi cushiomainuan Nucën Papa Diosan mibë ꞌicëcamacëñun mi nuibaquin ꞌaquincëx camina bërúanx ꞌiti ꞌain. Ashi, Pablo.