2 Timoteo 3 - Kashibo-Kakataibo Biblia

Jesucristo utëcënti nëtëa ꞌurama ꞌain usai uni ꞌiti bana

¹ Ësaquinribi camina ꞌunánti ꞌain, anúan Jesucristo utëcënti nëtëa ꞌurama ꞌain ca aín unicamax ꞌaisamaira tëmëranuxun ꞌaia.

² Usaía ꞌicëbë ca ësa uniribi ꞌiti ꞌicën: an ainanshia ꞌinun ñu cuëëncë, curíquishi biti cuëëncë, axa rabiacati —ꞌëx cana uni itsisama ꞌai —quicë, Nucën Papa Diosmi ꞌatimati banacë, an aín tita aín papan banabi cuacëma, axa ñu ꞌináncëxbi —asábi ca —canancëma, axa Nucën Papa Diosmi sinántisama tancë.

³ Usa ꞌaish ca bëtsibë nuibanainsama tanan aín ami nishcë uniribi abë mëníonantëcëinsama tanti ꞌicën. Usai ꞌiquin ca cëmëi bëtsimi manánan ñunshinacëquin aín sináncë ñuishi ꞌati ꞌicën. ꞌAnan ca sinánñuma ꞌixun raíri uni tëmëramiti ꞌicën. Usai ꞌiquin ca uisa ñux cara upí ꞌicë a ꞌaisama tanti ꞌicën.

⁴ Aín quicësabi oquin ca ñu ꞌatima ꞌicën. Nuituñuma ꞌixun ca ax cuëëncësabi oquinshi ñu ꞌati ꞌicën. Usai ꞌi cërúquin ca añu cara Nucën Papa Dios cuëënti ꞌicë quixun sinánquinma ax cuëëncësoquinshi ñu ꞌati ꞌicën.

⁵ —Uni raírinëxa ꞌicësaribiti cana ꞌëx Nucën Papa Diosmi sinani nitsi —quiquinbi ca an sinánmicëxunma aín bana quicësabi oquin ꞌatima ꞌicën. Usaía ax ꞌicë unicamami ꞌunani camina bërúancati ꞌain.

⁶ A unicama raírinëan xubu itsi xubu itsinu atsínbëquinquin, bana ñuixunquin paráncëxun ca anua ꞌicë an ñu ꞌatima ꞌacë xanucaman sinánñumasa ꞌixun, aín bana cuatia. Upí oquin sinánquinma ca a xanucaman bëtsi bëtsi oquin sinania.

⁷ Usa ꞌixun ca bëtsi bëtsi bana cuaquinbi uisai cara Jesucristomi catamëti ꞌicë quixun ꞌunanima.

⁸ Usa unicaman ca Janesbëtan Jambresnën Moisésnën ꞌacë ñu ax ca cëmë ꞌicë quixun uni sinánmiasaribi oquin Nucën Papa Diosan bana ax ca cuatima ꞌicë quixun unicama sinánmia. Aín sinan upíma ꞌaish ca Nucën Papa Diosan iscëx ainanma ꞌicën.

⁹ Usa ꞌaínbi ca —cëmë́ntapun ꞌaish ca sinánñuma uni ꞌicë —quixun sinánquin unin aín bana ꞌuran sinánquinma manuti ꞌicën, bëráma unin Jannes ꞌimainun Jambresnën bana manuasaribi oquin.

Ashiquin usai ꞌinun Pablonën Timoteo cá bana

¹⁰ Min camina ꞌën bana ñuia upí oquin cuanan uisai carana ꞌëx ꞌi abi ꞌunánan añu carana ꞌaisa tani quixun ꞌunan. ꞌUnánan camina ꞌunan, ꞌën cana Nucën Papa Diosmi catamëquin, aín bana cuaisama taniabi ami nishquinma uni upí oxuinshi bana ñuixuan quixun. Camina ꞌunan, tëmëraquinbi ënquinma cana atu nuibaquin Nucën Papa Diosan banaishi sinánquin unicama ñuixuan.

¹¹ Min camina ꞌunan, axa ꞌëmi nishcë unicaman ca bëtsi bëtsi oquin ꞌaisamaira ꞌë tëmëramiaxa. Uisai carana ꞌëx Antioquía, Iconio, Listra, a ëmacamanuax ꞌia quixun camina ꞌunan. Anuax tëmërai bamati ꞌicëbia Nucën ꞌIbu Jesusan ꞌaquincëx cana ië́an.

¹² Asérabi ca axa Cristo Jesús quicësabi oi ꞌiisa tancë unicama unin bëtsi bëtsiocëx tëmërati ꞌicën.

¹³ Usaía ꞌimainun ca ꞌaisama unicama ꞌimainun an uni paráncë unicama, ax bëtsi unían paráncë ꞌixun atúnribi usaribi oquin uni paráncë ꞌaish axa ꞌiásamaira ꞌiti ꞌicën.

¹⁴ Usa ꞌaínbi camina a ëníma mínmi ꞌunáncë bana quicësabi oi ꞌiti ꞌain. —Asérabi ca —quixun sinánquin camina a bana ꞌunan. Uicaman cara mi ꞌunánmiaxa quixun camina ꞌunanin.

¹⁵ Chamará ꞌixunbi ꞌá ꞌixun camina Nucën Papa Diosan bana ꞌunanin. A banacama ꞌunánquin camina uisai caramina ꞌiti ꞌai quixun ꞌunánan, uisari caramina Jesucristomi catamëti Nucën Papa Diosnan ꞌinux ië́ti ꞌai quixun ꞌunánti ꞌain.

¹⁶ Camabi Nucën Papa Diosan banax ca anbia sinánmicëxuan aín unicaman cuënëo ꞌicën. Usa ꞌain cananuna a bana isquin ꞌunánti ꞌain, uisaira oquin cara Nucën Papa Diosan nu ainan ꞌimia quixun ꞌunánan, uisaira ꞌi caranuna ꞌuchai quixun ꞌunánan, uisax caranuna ꞌuchatancëxbi Nucën Papa Diosbë upí ꞌitëcënti ꞌai quixun ꞌunánan, uisai ꞌi caranuna asérabi Nucën Papa Diosan iscëx upí ꞌiti ꞌai quixun.

¹⁷ Usaquin ꞌunani ami catamëcë ꞌixuan aín unicaman bëtsi unicamaribi ꞌunánminun ca Nucën Papa Diosan aín bana aín unicama cuënëomiacëxa.