2 Timoteo 2 - Kashibo-Kakataibo Biblia

Aín cushían cacësabi oi suntáru ꞌicësaribiti Jesucristonan ꞌaish, ꞌiti bana

¹ Timoteo, ꞌën bëchicësa ꞌicë cana mi cain, Jesucristonëan nubë ꞌixun nuibaquin nu ꞌinánti aín cushi a bitsi camina ami cushicë ꞌiti ꞌain.

² Axa timë́cë unicama ꞌën caiami cuacë banacama, a camina, an asérabi uni raíri ꞌunánmiisabi sinánñu uni caístancëxun usaribi oquian ꞌanun ꞌunánmiti ꞌain.

³ Suntárunëan upí ꞌixun aín cushían cacësabi oquin tëmëraquinbi ꞌacësaribi oquin camina mix, Jesucristonën uni ꞌixun, tëmëraquinbi an cacësabi oquin ꞌati ꞌain.

⁴ Suntárunën ca suntáruma unicamabëtan ñu mëëquinma atun ꞌati ñuishi ꞌaia. Usa ꞌixun ca aín comandante cuëënminuxun añu ꞌanun cara caia a ꞌatishi ꞌixun cainia. Usaribi oquin camina min ꞌIbu, Jesucristo, ax cuëëncësa oquinshi ꞌati ꞌain.

⁵ Ënëx ca ësaribi ꞌicën. An pelota ꞌacë unicamax ca usaquin pelota ꞌati ꞌunáncëma ꞌaish ñancábi cuaia. Usai ꞌiquin ca aín cupí bitsima.

⁶ Ësaribi ca. An ñu mëëcë unínribi ca aín naënu ñu ꞌapáxun mëníoquin, ax paían ꞌicëcama a ainan ꞌinun cuëënquin bitsia.

⁷ ꞌËn mi cacë banacama ënë camina upí oquin sinánti ꞌain. Sinania ca Nucën ꞌIbu Jesucristonën upí oquinmi cuanun mi ꞌunánmiti ꞌicën.

⁸ Axa bamaxbi baísquia Jesucristo, Davidnën rëbúnqui, a camina manuquinma sinánti ꞌain. A ñui quicë bana anun uni Nucën Papa Diosnan ꞌinux ië́ti, a ca ꞌën unicama ñuixuncë ënëx ꞌicën.

⁹ A bana ñuixunia oquin ca unin ꞌë sipuaquin tëmëramianan ꞌuchañu uni ꞌacësaira oquin ꞌë manë risin tëcërëcaxa. Usoquin ꞌë ꞌaquinbi ca uinu ꞌicë unínbi Nucën Papa Diosan bana cëñuima. A bana cuati ca ꞌitsa uni Jesúsmi sinania.

¹⁰ An sinánmicëx ca ꞌitsa uni Nucën Papa Diosnan ꞌinux Cristo Jesúsmi sinánti ꞌicën. Acamaxa aín ꞌuchacama tërë́ncë ꞌianan Cristo Jesúsbë ꞌaish xënibua ꞌaínbi Nucën Papa Diosnan ꞌinun cana unían tëmëramicëxunbi tanshiti cuëënquin a bana ñuin.

¹¹ Ësaía quicë bana ënëx ca asérabi ꞌicën: Nun ꞌuchacama ëni Cristobë bamacësa ꞌitancëx abë baísquicësa ꞌaish cananuna abë ꞌiti ꞌain.

¹² Nucën Papa Dios ainan cupí tëmëraquinbi ëncëma ꞌaish cananuna abë ꞌapusa ꞌiti ꞌain. Usa ꞌaínbi ca nuxnu —ꞌëx cana Jesucristonën unima ꞌai —quicëbë axribi nu ñui —ax ca ꞌën unima ꞌicë —quiti ꞌicën.

¹³ Axa quicësabi oquinu ꞌacëbëtanmabi ca ax cëmëma ꞌixun asérabi ax quicësabi oquin Nucën Papa Diosan ꞌaia.

Upí oquin ꞌunáncë ꞌixun Nucën Papa Diosan bana uni ñuixunti

¹⁴ Atúan a bana manuxunma ꞌanun sinanamiquin camina axa bëtsibë cuëbicánani —usama ca, ësaira ca bana ꞌicë —quiax cuamianáncë unicama, a Nucën ꞌIbu Dios cuëëncësabi oi usai ꞌiaxma ꞌinun quixun cati ꞌain. Usai cuamiananti ca ꞌaisama ꞌicën. Usa bana cuaquin ca uni itsin ꞌatimaquin sinánti ꞌicën.

¹⁵ Nucën Papa Diosan iscëxun camina aín bana upí oquin ꞌunáncë ꞌixun rabínquinma unicama ñuixunti ꞌain.

¹⁶ Ënë nëtënu ꞌicë ñuishi ñuia, ax ꞌaisamairai banacë unicamasaribi camina ꞌitima ꞌain. Usai ax banacë unicamax ca Nucën Papa Diosmi sinanima camabi nëtën ꞌuchaia.

¹⁷ Nunu ꞌirutancëx chaaquin ca cun, nucën nami tsitsiaráquin paë oia. Usaribi oquian upíma unicaman ꞌaisama bana chanioquin ñuia ca ꞌaisamaira unin cuatia. Usa uni ca Himeneo ꞌimainun Fileto ꞌicën.

¹⁸ A uni rabëtax ca Nucën Papa Diosan banamabi cëmë bana ñui, anun baísquiti nëtë isa inúacëxa. Usa ꞌaínsa uni bama ꞌaish baísquitima ꞌicë quixun caquin, uni raíri uisa cara ꞌiti ꞌicë quixun sináncasmamia.

¹⁹ Unían bëtsi bëtsi ñu sináncë ꞌaínbi ca sinanatëcë́ntima oquian, xënibua ꞌaínbi usabi ꞌiti oquin, Nucën Papa Diosan ꞌinan bana, ënëx ësai quia: “Uicamax cara asérabi ainan ꞌicë quixun ca Nucën ꞌIbu Diosan ꞌunania”. Quianan ca ësairibi quia: “Uicamax cara —ꞌëx cana Cristonan ꞌai —quia, an ca ñu ꞌaisama ꞌati ënti ꞌicën”.

²⁰ Ñuñu unin xubu chanu ca curi ꞌacë xanpa ꞌimainun uxu manë ꞌacë xanpa ꞌimainun i ꞌacë xanparibi ꞌimainun mapú ꞌacë xanparibi ꞌicën. Usa ꞌain ca curi ꞌacë ꞌimainun uxu manë ꞌacë upíira anúinshi aín ꞌibun piti ꞌicën. Usa ꞌaínbi ca i ꞌacë ꞌimainun mapú ꞌacë ñu ax anun ñu ꞌarutishi ꞌicën.

²¹ Usaribiti ca an Nucën ꞌIbu Diosbëtan upí ñu mëëti ꞌacë uni ax añu ñu ꞌatimabi ꞌati sináncëma ꞌiti ꞌicën. Usa ꞌaish ca uisa ñu upía ꞌanun cara Nucën ꞌIbu Dios cuëënia, a cuëënquin ꞌanuxun caínti ꞌicën.

²² Bëná unicaman ñunshínquin ñu ꞌacë, usaribi oquin ꞌati sinántima cupí camina atumi ꞌunánti ꞌain. Usai ꞌi camina axa aín nuitu upí ꞌaish Nucën ꞌIbu Diosbë banacë unicamabëtan upí ñuishi ꞌanan Jesucristomi catamëti, abë nuibanani pëcananíma chuámashi ꞌiti ꞌain.

²³ Sinánñuma unían ꞌacësa oquin camina unia cuëbicanáncë bana a cuatima ꞌain. Usai cuëbicánani ca unicama bëtsibë nishánani upitax ꞌima.

²⁴ An Nucën ꞌIbu Dios ñu ꞌaxuncë unicaman ca abë cuëbicanánquinma camabi uni upíoti ꞌicën. Nucën Papa Diosan bana ꞌunáncë ꞌixun ca bëtsi uniribi anribia ꞌunánun ꞌunánmiti ꞌicën. ꞌIanan ca ami uni nishcë́xbi axribi unimi nishtima ꞌicën.

²⁵ Usa ꞌixun ca ami nishquinma an Nucën Papa Diosan bana cuaisama tancë unicama munu upí oquin ꞌësëquin ꞌunánmiti ꞌicën. ꞌUnánmiquin ca —Nucën Papa Diosan ꞌimicëx ca sinanati Jesucristomi catamëti ꞌicë —quixun sinánti ꞌicën.

²⁶ Usaquian ꞌaquincëxa sinanacëbëtan ca ñunshin ꞌatimanën ꞌapun ax cuëëncësabi oquian ñu ꞌatima ꞌanun ꞌimicë ꞌixunbi a uni ënti ꞌicën.