2 Timoteo 1 - Kashibo-Kakataibo Biblia

Pablonëan Timoteo quirica cuënëoxuan

¹ ꞌËx cana Pablo, aín bana ñuixunuan Jesucristonën caísa ꞌain, Nucën Papa Dios cuëëncësabi oquin. —Jesucristomi catamëtíshi ca uni Nucën Papa Diosnan ꞌiti ꞌicë —quixun unicama canun ca Jesucristonën ꞌë ꞌimiacëxa.

² Timoteo, ꞌën bëchicësa ꞌicë nuibaquin cana ënë quirica mi buánmin. Nucën Papa Dios ꞌimainun Nucën ꞌIbu Jesucristo, an nu ainan ꞌinun ië́micë, an nuibaquin min ꞌuchacama tërë́ncë cupími ainan ꞌaish chuámashirua ꞌiti cana cuëënin.

Cristo ñuiquin uni cati bana

³ Nucën raracaman ꞌasaribi oquin ꞌënribi asérabi a ꞌinamëcë ꞌixun rabicë, Nucën Papa Dios, a cana imë́bi nëtë́nbi abë banaquin mi ñucáxunquin —asábi ca —quixun cain.

⁴ Mixmi bëunan mëscúcë aribi manucëma ꞌixun cana chuámarua tani cuëëinra cuëënuxun mi istëcëinsa tanin.

⁵ ꞌImainun cana mixmi asérabi Jesucristomi sinania ꞌën mi iscë a manuiman. Min chichi, Loida, ꞌimainun min tita, Eunice, axa ꞌicësaribiti camina mix asérabi Jesucristomi sináncë ꞌai quixun cana ꞌunanin.

⁶ Usa ꞌain cana manúaxmami ꞌinun mi cain, ꞌën mëcën minu nancëbëtan ca Nucën Papa Diosan aín bana ñuixunun aín cushi mi ꞌináncëxa. A cushia minuax nëtë́nunma camina bënamëbutibia tsi rëquirutëcëncësa ꞌinuxun, ami catamëquin aín bana ñuixunti ꞌain.

⁷ Ainan ꞌaíshnu racuë́ ꞌinun ca Nucën Papa Diosan nu ꞌimiama ꞌicën. An ca nu ainan ꞌimiacëxa, aín cushiñu ꞌixúnu nuibaquin unicama ꞌaquianan upí oquin sinánquin ñu ꞌanun.

⁸ Mix ainan ꞌaish camina —ꞌëx cana Nucën ꞌIbu Jesucristonan ꞌai —quixun uni catimi rabíntima ꞌain. ꞌImainun camina Jesucristonën bana uni ñuixunia ꞌë sipuacancë cupí rabíntima ꞌain. Usai ꞌiquinma camina miribia uni Nucën Papa Diosan bana ñuixuncë cupí, unin tëmëramicëxunbi rabínquinma tanshiti ꞌain, Nucën Papa Diosan ax cuëëncësabi oquin mi cushiomainun.

⁹ Nucën Papa Diosan ca nu ië́miquin ainan ꞌimiacëxa, nuxnu ax cuëëncësabi oíshi upí ꞌinun. Nun ñu upí ꞌacë cupíma, axbi nuxnu ainan ꞌiti cuëënquinshi, ca nu nuibaquin Jesucristo cupí nu ainan ꞌimiacëxa. Camabi ñu uniocëma pain ꞌixun ca Nucën Papa Diosan nuibaquin, Cristo Jesusan nu ië́minun mëníocëxa.

¹⁰ Mënío ꞌixun ca camabi unían —an ca nu nuibatia —quixun ꞌunánuan nu ië́miti Jesucristo xuacëxa. Xuá ꞌaish ca axa ami catamëcë unicamaxa ax utëcëncëbë usaribiti ꞌiti oi bamatancëxbi baísquiacëxa. Usa ꞌain cananuna ꞌunanin, ainan ꞌaish ca uni aín nëtënu cëñútimoi abë ꞌiti ꞌicë quixun.

¹¹ Usaía Jesucristo ñui quicë banacama camabi judíosma unicama ñuixuanan aín bana quicësabi oía ꞌinun ꞌunánminun ca Nucën Papa Diosan ꞌë ꞌimiacëxa.

¹² An ꞌimicëxun usoquin ꞌacë cupía bëtsi bëtsi ocancëxbi cana rabiniman. Ami catamëquin cana ꞌunanin, ax cushiira ꞌixun ca Nucën Papa Diosan, ꞌëx a ꞌinamëcë ꞌicë bërúanquin aín bana bëtsi oquin ñuiquinma upí oquinshi unicama ꞌunánminun ꞌë ꞌaquinti ꞌicën. ꞌAquianan ca anúan ax utëcënti nëtën uquin an ꞌën ꞌacë ñucama upí isti ꞌicën.

¹³ ꞌËn mi ñuixuncë banacama quicësabi oquin camina manuquinma ꞌati ꞌain. ꞌAnan camina ainan ꞌicëa Cristo Jesusan mibë ꞌixun cushiocëx ami catamëti camabi uni nuibacë ꞌiti ꞌain.

¹⁴ Aín Bëru Ñunshin Upí an nubë ꞌixun nu sinánmicë, an ꞌaquincëxun camina Nucën Papa Dios cuëëncësabi oíshi ꞌianan Jesucristo ñuicë banaishi ñuixunti ꞌain.

¹⁵ Camina ꞌunan, Asia menuax ucë unicamabëtan ca Figelo ꞌimainun Hermógenes, axribi anuax ucë ꞌixun, anribi ꞌë ëbianxa.

^16-17 Usa ꞌaínbi ca Onesíforonën ꞌëx masá nuitucasíabi ꞌë ꞌësëquin ꞌë cuëënmiaxa. Romanu ax bërí ucë ꞌixun mëracatsi bënë́quin bariquinbi ꞌacasmapantancëxun ꞌë mërax ca ꞌëx sipunu ꞌaínbi rabinima ꞌitsai ꞌë isi uaxa. Usa ꞌain cana Nucën ꞌIbu Diosan Onesíforonën xubunu ꞌicëcama nuibaquin ꞌaquinti cuëënin.

¹⁸ ꞌImainun camina ꞌunanin, Efeso ëmanuxunribi ca Onesíforonën ñu nu ꞌitsa oquin ꞌaxuanxa. Usa ꞌaían Nucën ꞌIbu Jesucristo utëcëncëbëtan Nucën ꞌIbu Diosan a upí isti cana cuëënin.