2 Tesalonicenses 2 - Kashibo-Kakataibo Biblia

Axa uti cëmëi paránanti ꞌunáinracë uni achúshi ñuicë bana

¹ Nucën xucë́antu, Nucën ꞌIbu Jesucristo uti ꞌimainun nux abë biranani timë́ti ñuiquin cananuna ënë bana mitsu cain.

² Aín uti nëtë ñuiquin ca unin —Nucën Papa Diosan ꞌunánmicëxun cana ꞌunanin, anúan Jesucristo uti nëtë ca uaxa —quixun mitsu cati ꞌicën. Camainun ca raírinënribi —aín uti nëtë ca asérabi sënënia —quixun bana ñuixunquin mitsu cati ꞌicën. Raírinënribishi ca —Pablonën ca nu, anúan Nucën ꞌIbu Jesucristo uti nëtë ca sënënia quixun quirica bëmiaxa —quixun mitsu cati ꞌicën. Usaquian cacëxbi camina bënëti ratuti sináncasmatima ꞌain.

³ Usai quicë bana ñuia cuaquinbi camina —asérabi ca —quixun sinántima ꞌain. Jesucristo uti nëtë ucëma pan ꞌain ca ꞌaisamaira unin Nucën Papa Diosan bana cuaisama tanti ꞌicën. Usaía ꞌicëbë ca aínra unicama paránquin aín bana cuanun quixun ꞌaisama ñu ꞌamiti uni achúshi, axa aín ꞌucha cupí ꞌaisamaira oquin castícancë ꞌiti, ax uti ꞌicën.

⁴ A unin ca camabi uni Nucën Papa Dios ꞌimainun atúan rabiquin, ax ca nun dios ꞌicë quixun cacë, a ñucama ënquin aishi rabinun cati ꞌicën. Canan ca anuxun Nucën Papa Dios rabiti xubunubi atsíanx —ꞌëx cana Dios ꞌai —quixun sinani tsóti ꞌicën.

⁵ ¿Mitsubë ꞌixun ꞌën usai ca ꞌiti ꞌicë quixun mitsu ca, a caina sináncaniman?

⁶ Mitsun camina ꞌunanin uisa cupí cara ꞌaisama uni ax aín uti nëtë sënë́ncëma ꞌaínshi aima quixun.

⁷ A unia ucëma pan ꞌaínbi ca anúan ꞌatima unin uni paránquin ñu ꞌatima ꞌati a cushínribi unin bërí nëtë́nbi ñu ꞌatima ꞌaia. An aín uti bëaracë axa nëtë́cëbë cuni ca uti ꞌicën.

⁸ Usoquin ëncëx pain aia cëmën tapun ꞌatima uni a camabi unin isiabi ca Nucën ꞌIbu Jesusan axira uquin aín cuëbitan uíncënëinshi ꞌaquin aín cushían pëcabëtsincë anúinshi cëñuti ꞌicën.

⁹ Cëmëi paránanti ꞌunáinra uni ax ca ñunshin ꞌatimanën ꞌapu, Satanás, an ꞌimicëx aín cushibë uti ꞌicën. Uquin ca cushiira ꞌixun unían ꞌacëma ñu ꞌitsaira aín cushínbi ꞌaquin uni paránti ꞌicën.

¹⁰ Usonan ca Jesucristomi catamëisama tancë cupía xënibua ꞌaínbi Nucën Papa Diosnan ꞌitima unicama, a atun ꞌucha cupíbi paránuxun uisa ñu cara ꞌaisama ꞌicë abi ꞌati ꞌicën.

¹¹ Nucën Papa Diosanbi ca a unían paráncë unicama a —asérabi ca a bana usa ꞌicë —quixun sinánun usoquin ꞌimiti ꞌicën.

¹² An Jesucristo ñuicë bana cuatíbi ainan ꞌiisama tancë ꞌixun atun cuëëncë ñuishi ꞌaquin ꞌatima ñu ꞌacë unicama, axa atun ꞌucha cupíbi castícancë ꞌinun ca usai ꞌiti ꞌicën.

Nucën Papa Diosan ainan cupía ië́nun caíscë unicama

¹³ Nucën xucë́antu, usa ꞌaínbia Nucën ꞌIbu Jesucristonën nuibaquin mitsu ainan ꞌimicë cupí cananuna Nucën Papa Dios —asábi ca —ënquinma cati ꞌain. Mecama unioisama pain ꞌixunbi ca Nucën Papa Diosan ainan ꞌinux ië́ti mitsu sinánxuancëxa. Usa ꞌaish camina aín Bëru Ñunshin Upí an ax cuëëncësa oíshi ꞌinun mitsu sinánmicë, a cupí ꞌianan asérabi Jesucristo ñuicë bana sináncë cupí, ainan ꞌain.

¹⁴ Nucën Papa Diosan ca nun nu —Jesucristomi catamëti ca uni ainan ꞌiti ꞌicë —quixun aín bana ñuixuncëxmi ami catamëti, asaribi upí ꞌaish aín nëtënu abë ꞌinun mitsu caísaxa.

¹⁵ Nucën xucë́antu, usa ꞌain camina, mitsun Jesucristomi catamëti ëntima ꞌain. Ëníma ꞌianan camina nun nu mitsu ñuixuncë banacama ꞌimainun nun nu mitsu buánmicë quiricanu ꞌicë banacamaribi cuaquin manuima a banacama quicësabi oi ꞌiti ꞌain.

¹⁶ Usa ꞌain cana Nucën ꞌIbu Jesucristo ꞌimainun Nucën Papa Dios an nuibaquin nux chuámashi tani cuëënun ꞌimianan xënibua ꞌaínbi abë ꞌinun nu ꞌimicë,

¹⁷ anbia, mitsu upí oquin sinánmianan Jesucristomi catamëti ënquinma ax cuëëncësabi oquin upí banaishi ñuianan ñu upíshi ꞌanun ꞌaquinti cuëënin.