2 Samuel 9 - Kashibo-Kakataibo Biblia

Davidtan Mefi-bóset kakë uni upiokin ꞌakian ñuikë bana

¹ Achúshi nëtën ka Davidtan aín unikama ñukákëxa: “¿ꞌAima kara Saúlnën aintsikama achirabi ꞌik? ꞌën Jonatán a sinánkin ꞌakinun.”

² Kia ka bëtsi unin kakëxa, anu ka an mi ñu mëëxunti uni achúshi Saúlnën aintsi Sibá kakë ꞌikën, kakëxun ka anu ꞌikënua unun Davidnën kamiakëxa. Kamikëxa aia ka Sibá kakë a ꞌapun ñukákëxa: —¿Mix karamina Sibá kakë uni a ꞌain? —ꞌËx kana an mi ñu ꞌaxúnti a ꞌain —kixun ka kakëxa.

³ Kakëxun ka ꞌapun ñukákin kakëxa: —¿Anu kara Saúlnën aintsi ꞌën nuibakin Diosan anën ñu ꞌaxúntisa ꞌitima ꞌik? Kakëxun ka Sibánën kakëxa: —Anu ka Jonatánnën bëchikë achúshi aín taë amorabë́bi ꞌatimakë ꞌaish nikëma ax ꞌikën.

⁴ Kakëxun ka —¿Uinu kara ax ꞌik? —Kixun ꞌapun ñukákëxa. Ñukákëxun ka kakëxa, —ax ka Lodebar ëmanu ꞌikë Maquir Amiel kakë uni aín bëchikënën xubunu ꞌia —kixun ka Sibánën kakëxa.

⁵ Ësakin kakëxun ka Davidtan anua ꞌikënua bitánun bëtsi uni xunun kixun kakëxa;

⁶ kakëxuan kamikëx ka Mefi-bóset Jonatánnën bëchikë Saúlnën xuta uakëxa, ꞌai ka Davidnën ꞌikënu bëbakuatsini ami ñanati ꞌain bëmánanën me tikai ꞌiakëxa. ¡ꞌIkëbë ka munuma banai Mefi-bóset kai! —David kiakëxa. Kia ka Mefi-bósetnën David kakëxa: —Añu mi ꞌaxúnti kaina kuëënin a kana mi ꞌaxúnti ꞌai kixun kakëxa.

⁷ Kakëxun ka Davidtan kakëxa: —Rakuëama kamina ꞌiti ꞌain, ꞌën kana mi upíokin ꞌakinti ꞌain, min papa Jonatánnën ka bana a sinánkin. Usa ꞌain kana kamabi me min xuta Saúlnan ꞌia a mi ꞌinántëkënun ꞌamiti ꞌain, ꞌimainun kamina ꞌën xubunuxunbi pinun mi ꞌimiti ꞌain.

⁸ Ësokin kakëx Mefi-bósetnën ami ñanati ꞌikin kakëxa: —ꞌËx kana an mi ñu ꞌaxúnti ꞌain, ꞌaínbi kana ꞌëx añubima ꞌain, usa ꞌain kana ꞌëx mix ꞌapu ꞌixun usakin kaisama ꞌain, ꞌëx kana achúshi kamun bamakësa ꞌain.

⁹ Usa ꞌain ka ꞌapun Sibá ax irapaian Saúlnën ñu bërúankë ꞌia a kuënxun kakëxa: —ꞌËn kana ꞌunan ami ñu mëëxuan Saúl aín xutan ñukama a kana kamabi ꞌunan ꞌimainun kana aín aintsikamanan ꞌia aribi ꞌunan.

¹⁰ Usa ꞌain kamina min bakë bëchikë bëbukama ꞌimainun an mi ñu mëëxunkë unikamabëtan aín menu ñu ꞌapákëxa bimia bitankëxun bukunxunti ꞌain, usakin ꞌaxunkëx ka a piti ꞌain aintsikaman ꞌiti ꞌikën, ꞌaínbi ka Mefi-bóset aín xuta ꞌën xubunuxunbi pi ꞌinuxun ꞌaia. Kakëxun ka Sibá quince bëchikëñu ꞌimainun veinte uni an ñu mëëxunkëñu,

¹¹ an ꞌapu kakëxa: —Kamabi min kakë ñukama ka an mi ñu mëëxunti uni ënën ꞌati ꞌikën. Usa ꞌain ka Mefi-bósetnën Davidtan bëchikësa ꞌixun ꞌapun xubunuxunbi pi anubi ꞌiakëxa.

¹² ꞌImainun ka achúshi bëchikë chukúma Micaías kakin anëkëñu ꞌiakëxa, usa ꞌain ka kamabi unikama Sibá aín xubunu ꞌikë atux Mefi-bóset ñu mëëxuni ꞌiakëxa.

¹³ ꞌAínbi ka Mefi-bóset ax amorabë́bi ꞌain taë ꞌatimakë ꞌaish Jerusalén ëmanu tsóakëxa, usa ꞌixun ka ꞌapun xubunuxun pi anubi ꞌiakëxa.