2 Samuel 7 - Kashibo-Kakataibo Biblia

Diosan David upiokin sinánxunkin ꞌakinxun ka bana

¹ A ꞌurama ꞌikë amia nishkë unikama Diosanbi ꞌamikëxun kamabi ꞌatankëx ka anua ꞌiti ꞌapun xubunu kuanx anu ꞌixun ka Davidnën,

² an Dios kikë bana uni ñuixunkë Natán kakëxa: —Uisa ꞌixun karana ꞌën anu ꞌapu ꞌiti xubu kunxan tukapaxun upíokin ꞌakënu ꞌixun, Dios bunántisa okin ꞌaxunkë axa chupaishi ꞌakë xubu ꞌukëmëu nankë ꞌikë isti ꞌain, ax ka ꞌën iskëx upíma ꞌikën.

³ Kakëxun ka Natánën kakëxa: —Uisakin ꞌakatsi kixun kaina sinani usakin kamina ꞌati ꞌain, ꞌaia ka Diosan mi ꞌakinti ꞌikën.

⁴ ꞌAínbi ka a imë́bi ami mërakin Diosan Natán kakëxa:

⁵ “Anu kuanxun kamina ꞌën uni David abë banakin ësokin kati ꞌain, ꞌëx Dios ꞌixun kana ësakin kan: Mix kamina an, ꞌë anuxun Dios rabiti xubu ꞌaxúnti uni ama ꞌain.

⁶ Anun ꞌën Egipto menua Israel unibu chikía, a nëtëkamanbi ꞌiama ꞌaish kana bëríbi usabi ꞌaish, uínsarabi anuxun ꞌë rabiti xubunu ꞌikëma ꞌain, usa ꞌain kana xubusa okin chupaishi ꞌakë anu kuanx ꞌën unibëshi banakën.

⁷ Kamabi nëtën anun atubë ꞌëx ꞌikë anun kana, uisaxunbi ꞌën unibu Israelkama ꞌakinun ꞌapu anëxun, atun kushi achúshibi ꞌë kamina anuxun Dios rabiti xubu achúshi kunxan tukapaxun ꞌaxúnti ꞌai kixun káma ꞌain.

⁸ Usa ꞌain kamina, ꞌën uni David ësokin kati ꞌain, ꞌëx Dios kamabi kushiñu ꞌaish kana ësai kin: ꞌËn kana anuxun bërúanti ꞌakë anuxua aín ñuina bëruaiabi a ëmikin chikían ꞌën chikixun kana a unikaman ꞌapu ꞌinun ꞌimiakën;

⁹ ꞌimixun kana uinu kara kuania anubi abë ꞌixun bërúan. Bërúanan kana kamabi ami nishkë unikama këñukin ꞌanun ꞌamia, ꞌamianan kana usakin ñu chaiira ꞌaia iskian, ënë menu ꞌikë an ñu upíokin ꞌakë ꞌapukama ꞌakësaribi okin, nuibanan an ñu ꞌaia isi kuëënun ꞌimian.

¹⁰ Usakin ꞌanan kana achúshi me anua ꞌën unibu Israel ꞌiti bian, bixun kana atunabi ꞌain anu ꞌinun ꞌinan, anu ꞌiaka uínbi ubioima ꞌimainun an bëtsi ñu ꞌatima ꞌakë unikamabi, bëráma ꞌakansa okin ubiotima ꞌikën,

¹¹ axa ꞌën uni Israel unikaman ꞌapu ꞌinun uni ꞌimikin kana. ꞌËn amia nishkë unikamabë ꞌakanantëkënima nuibananishi tsónun atu ꞌimiakën. ꞌImainun kana aín rëbúnkikama kana uínbi ubiotima oia tsónun ꞌiminuxun ꞌai kixun ꞌunámikin kakën,

¹² usa ꞌain kana anúnmi ñuti nëtë ꞌikëbëtan min bakë bëchikë achúshi nëtë́timokin mëramikin axa ꞌapu ꞌinun ꞌimiti ꞌain.

¹³ ꞌImikëxun ka an anuxun ꞌë rabiti xubu achúshi ꞌë ꞌaxúnti ꞌikën. ꞌImainun kana ꞌën ꞌapu ꞌimikin nëtë́timoia xënibua ꞌaínbi ax ꞌapu ꞌinun ꞌimiti ꞌain.

¹⁴ ꞌËx aín papasa ꞌimainun ka, ax ꞌën bakë bëchikësa ꞌiti ꞌikën, ꞌën kana ñu ꞌatima ꞌaia i pëñan bixun anun rishkikin, tëmëramiti ꞌain. Kamabi unían aín bakë bëchikë ꞌatima ñu ꞌaia ꞌakësaribi okin,

¹⁵ ꞌaínbi kana ꞌën nuibakin Saúl ꞌakinkin ëansa okin a ꞌatima ꞌain, usakin ꞌaxun kana Saúl chikíanan mixmi ꞌapu ꞌinun mi ꞌimiasa okin a ꞌatima ꞌain.

¹⁶ Min rëbunki ꞌimainun mix ꞌapu ꞌikë ax ka ꞌën bëruankëx uisaibi ꞌikëma ꞌiti ꞌikën, ꞌimainun ka mix anu tsóti ax anubi ꞌitiokin nankë ꞌiti ꞌikën.”

¹⁷ Usokin ka Natánnën kamabi ënë banakama David ñuixuankëxa, upíokin ka an namákian kuakësabi okin ñuiakëxa.

¹⁸ Usakian ñuixunkë anu atsíanx abë banati ꞌakë anu atsíanx abë banakin ka, Davidtan Dios kakëxa: ꞌËn ꞌIbu Dios kushiira, ¿ui karana ꞌëx ꞌain, ꞌën aintsi ꞌibukamaribi ka ñuma ꞌikë unin isia, usa ꞌaínbi kaina uisaxun ꞌë ꞌapu ꞌinun ꞌimian?

¹⁹ ¡ꞌImainun ka min ñuikë banaxa chamara ꞌaínbi min ꞌati ñukama chaiira ꞌikën, ꞌËn ꞌIbu Dios ꞌëx kana min uni ꞌain, min kamina ꞌën aintsi ꞌibukaman rëbúnki ñui usakin ismina ꞌapu ꞌiminuxun ꞌai kiakën! ¡Uinu ꞌikë achúshi unixi ka mix Dios ꞌixun upíokin sinani kikësai banati ꞌaíma ꞌikën!

²⁰ ¿ꞌËn ꞌIbu Dios min uni ꞌixun karana uisa banaribi mi kati ꞌain?

²¹ Kamabi a ꞌakatsi mi kia ñu a kamina asérabi, bëtsi ñukamasamaira ꞌitánun, upíokin min ꞌain ꞌën aintsikaman isti kuëënkin, ꞌën ꞌunánun;

²² usa ꞌain kana mishi rabikin kai ꞌËn ꞌIbu Dios, ¡min ꞌakë ñukama ka chaiira ꞌikën! Usa ꞌain ka bëtsi uni misaribi ꞌaíma ꞌikën, ꞌimainun ka uinubi bëtsi ñukama a unin rabikë misaribi ꞌaíma ꞌikën.

²³ Min uni Israel unibu ñuikin kana mi kain, ¡bëtsi menu ꞌikë ëmanu ꞌikë unikama atusaribi ka ꞌaíma ꞌikën, atux ka ënë menu ꞌikë bëtsi unikabëtan sënë́nma ꞌikën! ꞌËn ꞌIbu Dios min kamina min uni ꞌinun atu chikiankën. ꞌImainun kamina ꞌaisamaira ꞌixun bana sinankian upíokin ñu ꞌanun atu ꞌamian, min kamina min unikama Egipto menua chikínbëtsinkin atun ismainunbi bëtsi menu ꞌikë unikama ꞌimainun atun rabikë dioskama këñunbi këñuakën,

²⁴ Min kamina Israel unibunëxa xënibua ꞌaínbi min uni ꞌiti kuëënxun usakin ꞌakën, ꞌanan kamina mix Dios ꞌixun usakin ꞌakë ꞌaish nun Diosribi ꞌiti ꞌain.

²⁵ “Usa ꞌain kamina mix Dios ꞌianan dioskaman Dios ira ꞌixun min uni ꞌikëmi ꞌë kakë banakama, manukinma sinánkin ꞌën rëbúnkinën babakama, mixmi kiásabiokin ꞌakinti ꞌain.

²⁶ ¡ꞌËn kana usakinmi kakëxa atux mi sinani mimi katamëti ënima xënibua ꞌaínbi mi rabianan min anë ñui kamabi menu ꞌikë unikaman kuatanun, min kamina upíokin ñu ꞌai kixun ñuiti kuëënin, ꞌimainun kana min uni David ꞌën rëbúkinkama upíokin sinánkë unibu ꞌikëmi, min upíokin ꞌakinti kuëënin!

²⁷ Dios min kamina mix kamabi kushiñu ꞌixun uisakin kaina ꞌën rëbúnkinën babakama xënibua ꞌain, ꞌati ꞌai kixun ꞌunámikin ꞌë kan; usa ꞌain kana ꞌën min uni ꞌixunbi sinánkimaishi mi kain.

²⁸ Mix kamina Dios ꞌianan dioskaman Dios ira ꞌain, mix kamina asérabi këmëima banain. ꞌImainun kamina min uni ꞌikë ꞌitsaira nuibakin mimi katamëtia ꞌë ënkëma ꞌain,

²⁹ usa ꞌain kamina, kuëënkin upíokin sinánxunkin, ꞌëx min uni ꞌain xënibua ꞌaínbi ꞌën rëbúnkikama bërúanti ꞌain. Nun ꞌIbu Dios min kamina kan, min upíokin sinánxunkëx ka ꞌën rëbúnkikama atux xënibua ꞌaínbi upitax tsóti ꞌikën.”