2 Samuel 6 - Kashibo-Kakataibo Biblia

Uisoxun kara bunántisa okin ꞌakë anua Diosan bana kuënëokë nankë a takuti ꞌikë kixun Davidtan sinan ñuikë bana

¹ Achúshi nëtën ka Davidnën amiribishi bëráma kaískë treinta mil suntárukama a timëtëkëankëxa.

² Usokin ꞌabiani ka Baalá ꞌikëbia Quirat-jearim kakinribi anëkë axa Judá menu ꞌikë anuax aín treinta mil suntárukama buani, uisoxun karaisa bunántisa okin ꞌakë anua Diosan bana kuënëokë nankë a buánti ꞌikë kixun tani kuankëxa, ax ka Israel kaman Dios kamabi kushiñuira ꞌianan aín ángel pëchiñukama usamaira ainan ꞌiakëxa.

³ Kuantankëx ka anua Abinadab kakë uni ꞌikë bashi manan anua aín xubu ꞌikë anu bëbakëxa. Anuxun ka raíri unikama bunántisa okin ꞌakë anua Diosan banakama kuënëoxun nankë a biakëxa, bitankëxun ka anun ñu nikintia ꞌakë ióira anu ꞌaruakëxa.

⁴ ꞌArukë ka Abinadab kakë uni aín bakë bëchikë rabë́ Uzá ꞌimainun Ahió an burron anu ñu ꞌaruxun nikinti anu ꞌarukëa nirinbiankëbë Ahió ax rëkuë́nkiankin buánkëbë Uzá ax tsiánkiankin buánkëxa.

⁵ Usokian buánkëbë ka, a kaxú David ꞌimainun abëa kuankë unikamax Dios rabi kuëëni aín kushibëbi ransakin atun sharíkati sharikamainun manë parókë ꞌamainun atun arpa ꞌanan mëkënan mëëkin banamikë akama kuëënkin ꞌakankëxa.

⁶ Usai ꞌikiani kuani ka anuxua Nacónnën aín trigo tákati kakë ꞌikë ꞌunánkë, anu nukutibi an bunántisa okin ꞌakë anu ꞌarukë a nirinbiankë burro ax ñumi tatíki nipakëisari ꞌiaka Uzánën mëshpakin nipakëti rabanan tuinkin biakëxa.

⁷ Usakia bunántisa okin ꞌakë, aín mëkënan Uzánën tuinkin bikë ka Diosan xuamati nishkin anuxunbi bamanun ꞌimikëx Uzá bunántisa okin ꞌakë a tanainbi nipakëti bamakëxa.

⁸ Usokian Diosan Uzá bamanun ꞌimia isi ka David ꞌitsaira masánuituti iankëxa, usakian anuxun ꞌimikëka a me Peres-uzá kakin anëakëxa, usokinbi ka bërí nëtë kamanbi anëkania.

⁹ Usakia ꞌan ka a nëtën David ꞌitsaira Diosmi rakuë́akëxa, rakuë́ti ka ësai kiakëxa: “¡ꞌËn kana asérabi bunántisa okin ꞌakë anua Diosan bana kuënëokë nankë ënë buánti sinaniman!”

¹⁰ Usai kitankëxun ka Davidnën amiribishi bunántisa okin ꞌakë anua Diosan banakama nankë a Jerusalénnu buántisama tankëbëtan ka, achúshi filisteo uni Obed-edom, axa Gat kakë ëmanu ꞌikë aín xubunu nankëxa.

¹¹ Usokian Davidnën anu namikëx ka bunántisa okin ꞌakë anua Diosan banakama kuënëokë nankë ax Obed-edom aín xubunu achúshi ꞌimainun rabë́ ꞌuxë ꞌiakëxa, usakin a unin xubunu nankë ꞌain ka Diosan a uni ꞌitsaira ꞌakianan aín aintsikamaribi ꞌakiankëxa.

Davidnën bunántisa okin ꞌakë anua Diosan bana kuënëokëkama nankë a Jerusalénnu buan ñuikë bana

¹² Usa ꞌain ka unikaman ꞌapu David ñuixunkë ꞌiakëxa, bunántisa okin ꞌakë aín xubunu nankë ꞌain ka Obed-edom aín aintsikama ꞌimainun aín ñukama këñunbi atun ñu upí ꞌinun Diosan ꞌakinia. Usokian kakëx ka David Obed-edom aín xubunu kuëënkiani kuanxun bunántisa okin ꞌakë a bibiankin Davidnën ëma kakë Jerusalénnu buánkëxa.

¹³ Usokin buani kuankia bunántisa okin ꞌakë anua Diosan bana kuënëokëkama nankë a buani kuania mapai achúshi ꞌimainun achúshiti nikiani men unikama kuankëbëtan ka Davidnën achúshi vaca bënë ꞌimainun achúshi carnero xuaira rëxun Dios rabikin xarokëxa.

¹⁴ Usa ꞌain ka David chupa efod lino ꞌakë a pañuax kuani ꞌain kushibëbi kuëëni ransakiankëxa,

¹⁵ usai David ꞌikëbë ka abëa kuankë raíri Israel unikamax an bunántisa okin ꞌakë buánkëkama a rëkuë́nbiania kuankë akamaxribi kuëëni sharákiani kuankin, atun a banoti ꞌakë banobiankëxa.

¹⁶ Usakin bunántisa okin ꞌakë anua Diosan banakama kuënëokë nankë, a buani anua David ꞌikë ëma anu bëbakania ka Saúlnën ꞌini bëchikë Micalnën aín xubu xëkuë chukúma manámi ꞌikë anun isakëxa; iskëxbi ka aín bënë David ax kuëëni chirinkin ransakia Dios rabikë ax ainan ꞌaisama ꞌiakëxa, usa ꞌain ka ami ꞌatimakin sinánkëxa.

¹⁷ Usokin buánxun ka anu nantia aín unikama xubusa okin chupa ꞌamikë a mëu nanun ꞌamiakëxa. Usokin anu nantankëxun ka Davidnën ñuina rëtankëxun ꞌaímai këñutanun Dios xaroxuanan anun mëníonanti aribi xarokëxa,

¹⁸ usokin ñuina xarokin sënë́ontankëxun ka Davidnën kamabi Israel unikama ësokin kakëxa, kamabi mitsun ꞌakë ñukamax ka Nukën ꞌIbu Dios kamabi kushiñuira an ꞌakinkëx upí ꞌiti ꞌikën,

¹⁹ usai kia David sënë́nkëbëtan ka kamabi israel uni bëbu ꞌimainun xanukamanribi pán harina akë a ꞌimainun cha okían batokin ꞌakë akama këñun nami xuikë tëxëkë akama ꞌimainun uvas ëskakë akamabi mëtikanankëxa. Usakin ꞌatankëx ka kamáxbi atun xubunu rikiankëxa.

²⁰ Usai kuankantámainun ka David aín xubunu aín xanu isi kuankëxa; kuankin aín xubunu nukúkin iskëxbi ka aín xanu Mical Saúlnën ꞌini bëchikë, ax kuania isbëtsini ukin kakëxa: —¡Bërí kamina mix Israelkaman ꞌapu ꞌaíshbi usai ꞌiax asábi bërúan, min kamina an ꞌë ñu ꞌaxunkë xanukaman ka isia kixun sinanimaishi uni nishkë ꞌikësaira rabinima usai ꞌian!

²¹ Kixuan kakëxunbi ka Davidnën kakëxa: —Asérabi kana ꞌëx unin ismainun ransan ax ka ꞌëbi usai ꞌisatani ꞌikëma ꞌikën. ꞌËx kana Dios an ꞌë kaisa a rabi usai ꞌian, an ka min papa ꞌianan min aintsikama ꞌakinma Israel kaman ꞌapu ꞌinun ꞌë ꞌimiakëxa. Usa ꞌain kana a rabi usai ransai ꞌian.

²² Usa ꞌain kana ꞌëx bërí ñuma ꞌiti ꞌain; min kuëënxumi usai ꞌinun ꞌë kakëx, ꞌaínbi ka a ñuikimi ꞌë kakë xanukaman uisa uni karana ꞌëx ꞌai kixun ꞌunánkin ꞌitsaira ꞌë nuibati ꞌikën.

²³ Usa ꞌain ka Mical ax Diosan usai ꞌiti ꞌimikëx, aín ñuti nëtë ꞌitámainun tuakëma xanu ꞌiakëxa.