2 Samuel 5 - Kashibo-Kakataibo Biblia

Israel menu ꞌianan Judá menuribi David ꞌapu ꞌia ñuikë bana

¹ Usakin ꞌakë basikëbë ka kamabi Israel unibu aín ñakánu ñakánu ꞌikë akaman Hebrón ëmanu, kuanxun abë banakin David kakëxa: “Nukamax kananuna min aintsi ꞌibu ꞌain.

² Bërámabi ka Saúlnën ax ꞌapu ꞌixun minmi asérabi Israel kama ꞌakanani kuania buánun ꞌamiakëxa. Usa ꞌikë ka Nukën Ibun mi Israel kaman ꞌapu ꞌixunmi upiokin ꞌakinun ꞌimiaxa.”

³ Ësakian an ꞌaia, ꞌunánxun ka kamabi Israel unibunën Hebrónnua ꞌain anu rikianxun ësakin David kakëxa, kakëxun ka uisakin kara ax ꞌapu ꞌixun ꞌati ꞌikë a ñuixunkin Diosanbi unánun kakëxa. Usakin kakëxun ka atúnbi Israel unibunën ꞌapu ꞌinun anëakëxa.

⁴ Treinta baritiañu ꞌixun ꞌapu ꞌikin pëua ꞌaish, ka David cuarenta baritia ꞌimi ꞌapu ꞌiakëxa:

⁵ Hebrón menuax ka Judá unibunën ꞌapu mapai ꞌimainun rabë́ bari inúmi ꞌitankëx mapai achúshi ꞌimainun achúshi ꞌuxë ꞌimi ꞌapu, Jerusalénnuribi kamabi Israel unibunën ꞌapu ꞌianan, Judá menu ꞌikë unikaman ꞌapuribi treinta y tres baritia ꞌapu ꞌiakëxa.

Davidtan aín suntárukamabëtan Sión kakë ëma bia ñuikë bana

⁶ Aín unikama buani ka David ꞌapu ꞌaish anuxun jebuseo, unikama anu tsókë akama ꞌanux Jerusalén menu kuankëxa. Kuankë ꞌikë ka jebuseo unikaman atun ëma buinarakin kënëarakë ꞌain, anun atsintisama sinani ami kuaikin David kakankëxa: “Mix anu atsintisama ka nun me ënëx ꞌikën, nun suntárukama bëxuñu ꞌianan aín xo ꞌatima ꞌaish masari nikë ꞌaínbi kamina mitsux ënu atsintsianma.”

⁷ Usakin kakëxunbi ka aín suntárukamabëtan Davidtan Jerusalén ëmanu ꞌikë suntárukama ñatankin biakëxa, usakin ꞌaxun ka Davidtan ëma kakin anëakëxa, anëa ꞌikë ka usakin anëkankëxa.

⁸ Usa ꞌain ka Davidnën usakin kamina anuxun ꞌati ꞌai kixun aín unikama kakë ꞌiakëxa: “jebuseo unikama ꞌakin kamina anúan ꞌumpax kuanti ꞌakë kini anun, atsínkin kamina kamabi uni bëxuñu ꞌimainun, aín xo ꞌatima masari nikë uni, akamami kana ꞌëx nishin usa ꞌain a këñukin ꞌati ꞌain.” Usa ꞌain ka a ñui a ꞌunánti bana ësai kia: “Uni aín niti upíma ꞌimainun, aín xo bamakë masari nikë a unikamax ka anuxun Dios rabiti xubunu atsintima ꞌikën, kiax ka unikamax kiakëxa.”

⁹ Usakin aín suntárukama ñatankin bianan unikama ꞌatankëx ka David, a ëmanu tsóti kuankëxa, usa ꞌikë ka Davidnën ëma kakin anëakëxa, ꞌimainun ka anu ꞌikin buinarakin aín ëman ꞌikë kinikama abi maxábëtan, me tëin bëtaskin anu ꞌapu ꞌikë xubu anubi sënëónkin kënëmiakëxa.

Hiram kakë ꞌapun aín menuxun an ñu ꞌunánkë unikama Davidnu xuá ñuikë bana

¹⁰ Usakin Dios kamabi kushiñu an ꞌakinkëxun Davidtan ꞌakëx ka kamabi ñu upí ꞌiakëxa, usakin ꞌaia ka Diosanbi ꞌakiankëxa.

¹¹ Usakian ꞌakëbëtan ka Tiro ëmanu ꞌikë ꞌapu Hiram kakë an, anu kuankian bëtsi menu ꞌikë ꞌapu añu kara ꞌaia kixun iskë aín unikama Davidnu kuantanun xuakëxa, xukin ka carpinterokama ꞌimainun an maxá ramëniokin mëníokë a ꞌianan, kunxan tëapakë akama tapan ꞌabiankin parúmpapan buánxun anu ꞌapu David ꞌiti xubu ꞌaxuntanun kixun xuakëxa.

¹² Usakin kamabi ñu ꞌakin ka Davidtan Diosanbi ka Israel unibunën ꞌapu ꞌinun ꞌë ꞌimiaxa kixun ꞌunánkëxa, ꞌimainun ka anbi ꞌapu ꞌixun ëma upí ꞌitanun mëníonan, Israel unikama upíokin ꞌakinun ꞌamiakëxa.

Davidtan bakë bëchikëkama ñuikë bana

¹³ Hebrón kakë menuax kuanx Jerusalén ëmanu tsókin Davidnën, anuxun aín xubu anua ꞌikë xanukama bianan, an ñu ꞌaxunkë xanukama aribi bixun atumiribi bëbu ꞌimainun xanu okinribi bëchipakëxa.

¹⁴ Aín bëchikëkama Jerusalén ëmanu tsókia bakë bëchipacëkama atun anë ka ꞌiakëxa: Samúa, Sobab, Natán, Salomón,

¹⁵ Ibhar, Elisúa, Néfeg, Jafía,

¹⁶ Elisamá, Eliadá ꞌimainun Elifélet akamax ka aín bakë bëchikëkama ꞌiakëxa.

Abë ꞌakanankin Davidtan filisteo suntárukama kupitanunma ꞌa bana

¹⁷ Israel unikaman ka atun ꞌapu ꞌiti David anëaxa kixun ka filisteo suntárunën kushikaman kuakëxa, kuabiani ka a ꞌakatsikiax a bari kuankankëxa, ꞌaínbi ka David anua ꞌikë anuax kuantankëx aín suntárukamabë unëkë ꞌiakëxa.

¹⁸ Usa ꞌain ka filisteo suntárukama anu kuanx, aín bashi Refaim kakë me sapan kiankë anu ꞌiakëxa.

¹⁹ Usai atux ꞌimainun ka, Davidtan ënë ñuikin abë banakin Dios kakëxa: —¿Filisteo unibunën suntárukama karana ꞌakanankinti ꞌain? ¿ꞌË kaina atu ꞌaia ꞌakinkin kushioti ꞌain? Kakëxun ka Diosan kakëxa: —Asabi ka, kamina atu ꞌati ꞌain, ꞌaia kana mi ꞌanun mitsu ꞌakinti ꞌain.

²⁰ Usakian ñukákëxuan kakëx ka aín suntárukama uani kuanx David Baal-Perasim kakë me anu bëbakëxa. Anu bëbaxun ka anuxun filisteo suntárukama kupitanuma ꞌakëxa. Usa ꞌain ka David anuxun ꞌakë a ñui ësai kiakëxa: “Diosan ka baka kushiira xobuti bëchunkë usaribi ꞌixun ꞌëmi nishkë unikama ꞌanun ꞌë uanxa.” Anuxun usakin ꞌaxun ka Baal-Perasim kakin anëakëxa. (Ënë banax ka Diosan ka anun kuanti bai nu ꞌaxuanxa ki kikë ꞌikën.)

²¹ Usakian ꞌakëx abákin rakabiania ka filisteo unikaman rabikë ñukama David ꞌimainun aín suntárukaman biakëxa.

²² Usai ꞌian basikëbë ka filisteo suntárukaman amiribishi Rafaim kakë me sapankiankë anu ritëkënkuatsiankëxa,

²³ ritëkënkuatsinkë ꞌain ka abë banakin David ësokin Diosan kakëxa: —ꞌAkin kamina ꞌashi buinxun atu ꞌatima ꞌain, anua bukukankë a kaxú kuainakëkin bëararatankëx kamina anua bálsamo kakë i nikë anu bëbakin ꞌati ꞌain.

²⁴ Anu bëbakin kamina anun nikiani kuankëbëa bálsamo i pëi chushirukë banaia kuati ꞌain; ax ka rëkuë́nkiani kuankësa ꞌiti ꞌikën, usai ꞌikëbë kuankin kamina min suntárukamabëtan, filisteo suntárukama ꞌati ꞌain.

²⁵ Usakin kakëxun ka Davidnën uisakin ꞌanun kara Diosan kaxa usakinbi ꞌakëxa, ꞌakin ka filisteo unikama Gabaón kakë ëmanuxunbi ꞌabianxun Guézer kakë ëmanu bëbakin ꞌakëxa.