2 Samuel 23 - Kashibo-Kakataibo Biblia

David anuishi sënëni banai kia

¹ Ënë ka anuishi sënënia David kanta bana ꞌikën: ꞌËx kana David Jesé kakë uni aín bakë bëchikë ꞌain, aka Diosan uni sinánñuira ꞌinun ꞌimiakëxa, a ka Israel kaman ꞌapu ꞌinun aín xuta Jacobnën rabia Dios anbi kaisakëxa, ax ka Israel kaman Diosmi upiti sinani kantairakë uni ꞌikëa Israel kaman ꞌunánkë a ꞌain. Usa ꞌaish kana ësai banai kin.

² Ësai ꞌëx banakë ax ka ꞌënbi sinanx ꞌikëma ꞌikën ax ka Diosan bëru ñunshin an ꞌë sinánmikëx banakë ꞌikën, uisai kinun kara ꞌë sinánmia usaibi ki kana kantain.

³ Israel kaman Dios ax ka ësai kiaxa: An Israel kama ꞌakinkë Dios an ka ꞌë ësokin kakëxa: An unikama aín ꞌapu ꞌixun ꞌakinti ax ka uisa ñu ꞌatimabi ꞌakëma ꞌiti ꞌikën, usa ꞌixun ka Diosan kuëënkësabi okin unikama ꞌakinti ꞌikën,

⁴ ꞌakinkëx ka pë́karakëma ꞌaínshi nëtë upíira iskësa usaribi ꞌianan, barin urukin pë́kabëtsinkëbëa naínu kuin ꞌaíma ꞌikë usaribi ꞌianan, ꞌuñe ꞌibúkin me chabókëbëa ñu bërukama kookë usaribiti ꞌiti ꞌikën.

⁵ Usa ꞌain ka ꞌën rëbúnkikamax Diosanbi bërúankë unibu ꞌiti ꞌikën, an ka ëbëtan achúshi ñu sinántëkëntima okin ꞌakëxa, anbi ka usokin ꞌati sinánkëxa usa ꞌixun ka an kikësokinbi ꞌati ꞌikën. ꞌAkin ka axa ꞌëmi nishkë unikamabë ꞌakanankin ꞌën ꞌanun ꞌë ꞌamiti ꞌikën, ꞌamianan ka kamabi ꞌën ꞌaisatankë ñukamaribi ꞌanun ꞌë ꞌamiti ꞌikën.

⁶ ꞌAínbi ka kamabi unían ꞌatima ñu ꞌatishi kuëënkë unikama ax muxañu i usaribi ꞌikë anuaxa këñunun amo bukúnkë usaribi a unikamax ꞌiti ꞌikën usa ꞌikë ka unin mëkënan mëëkinmabi isëshikësa usaribi ꞌiti ꞌikën.

⁷ Usa ꞌikë ka muxa a mëkënan mëëkinma anun biti manë xëtokë ꞌakë anun bixun anuxun xaroti anu timëtankëxun ꞌaimaia këñutanun xaroti ꞌikën.