2 Samuel 22 - Kashibo-Kakataibo Biblia

David unikama ꞌatankëx Dios rabi kanta ñuikë bana

¹ Ësai ka David Dios rabi ami kantakëxa, Saúl ꞌimainun axa ami nishkë unikaman ꞌati ꞌikëbia Diosan ië́mikë ꞌaish ka.

² Ësai kiakëxa: Diosan ka ꞌë bërúankin ꞌakianxa, ax ka ami ꞌëx katamëkë a ꞌikën, usa ꞌixun ka ax ꞌëmi nishkë unikaman ꞌaisa taniabi ꞌë ꞌakianxa,

³ mix kamina ꞌën Dios ꞌain, usa ꞌaish kamina ami ꞌëx katamëkë ꞌaish mapara chaiira usaribi ꞌain, ꞌimainun kamina axa ꞌëmi nishkë unikaman ꞌati rabanan ami ꞌëx katamëkë manë pará usaribi ꞌain, usa ꞌixun kamina mix kushiira ꞌixun ꞌë ꞌiëmiakën ꞌimainun kamina ñu chaiirasa ꞌëx ami unëtisabi ꞌain, ꞌianan kamina mix ami ꞌëx katamëkë ꞌain, usa ꞌixun kamina mix chaiira ꞌixun ꞌë ꞌiëmiakën ax ꞌëmi nishkë unikaman ꞌati ꞌikëbi. ¡Uni axa ꞌakanantishi sinánkë unikaman ꞌaisataniabi kamina ꞌë ië́miakën!

⁴ Mix Dios ꞌikë mishi rabiti ka asábi ꞌikën: ax ꞌëmi nishkë unikaman ꞌaisatankëxun min ꞌakinun ñukákëxun kamina asérabi ꞌë ꞌakinkin ië́mian.

⁵ Axa ꞌëmi nishkë unikaman ꞌanuxun bëarabuinkëxun kana uníxa parúmpapa bëchunkin aín bëchunan bikëxun unin kana bamai kixun sinánkësaribi okin sinani atumi rakuëakën; rakuë́kin kana baka kushin ka ꞌë bërí bakamioia kixun unin sinánkësaribi okin sinánkën.

⁶ Unian ñuina rënuxun nëakësa usaribi tani kana uisax karana bamatinuax ië́ti ꞌai kixun sinánkën; ¡ꞌianan kana unían ñuina anu pakëminuxun ñu nanxunkë usoxunribia axa ꞌëmi nishkë unikaman biti sinani rakuëakën!

⁷ Usai rakuë́ti bënëti atsanxun kana Dios ꞌë ꞌakinun kixun ñukákën, usakin ꞌakëxun ka Diosan naínuxunbi ꞌën bana kuakin ꞌakiankëxa ꞌimainun ka; ¡munuma banakin ñukákëxun ꞌën bana kuakëxa!

⁸ Usa ꞌain ka ax Dios kushiira ꞌixun me kushiira shaíkinun ꞌimiakëxa: ꞌimikëbë ka aín tapúmiax naíkamë ꞌëo shaíkikëbë aín bashikamaxribi aín tapúmiaxbi shaíkiakëxa; usakin ka Dios ax kushiira ꞌixun shaíkinun ꞌimiakëxa.

⁹ Aín rëkinuax ka kuinsa ꞌinun chikíakëxa, aín kuëbitan ka an ñu këñukin xaroti tsi ëxkusa usaribi chikíakëxa; ¡usai ꞌika aín kuëbínuax tsísa ax xunkakëx ꞌikësai abisi tsuákiakëxa!

¹⁰ An ka naíkamë ꞌëo panarabënun ꞌimiakëxa. ¡Usai ꞌikëbë ka kuin këxtuira ꞌuí ꞌibunuxa túnania ꞌikësa a mëu ubúakëxa!

¹¹ Usai ꞌika achúshi ángel pëchiñu anu papiax bënëtishi ꞌë ꞌakinux uakëxa; usai ka achúshi ꞌisakaxa aín pëchi ñashi ꞌaish suñun bënëtishi nuankiani kuankësa usai ꞌinun ꞌiakëxa.

¹² Mix kamina ꞌuñe ꞌibunuxa kuin timë́ti tunankuatsinkësa mëu ꞌiakën, usai ꞌika anu ꞌitia chupa këxtú xubusa okin ꞌakë usa mëu ꞌiankën.

¹³ Anua ax ꞌikë anuaxa kaná kamë ꞌëo banaruaia ꞌikësai ꞌikëbë ka naínuax ꞌaisamaira ꞌuñe ꞌibúkësari ꞌi tsi ëxku rërëkibuakëxa.

¹⁴ Usai ꞌikëbëtan ka naínuaxa kanákamë ꞌëo banakësari munuma banakin aín bana kuanun Diosan nu kuamiakëxa:

¹⁵ an ka unían aín pia ñu ꞌakin nikësokinshi ꞌakin kaná banakësa ꞌitánun banakin axa ꞌëmi nishkë unikama ratuti abátanun ꞌimiakëxa.

¹⁶ Aín banáinshi ka Diosan xunkakësa okinshi axa ꞌëmi nishkë unikama ꞌaisatankëxa, min kamina parúmpapa ꞌukëmëu ꞌikë ñukama ꞌimainun uinu kara naí sënë́ankëxa, axbia istisa ꞌitánun ꞌimiakën, axa usai banakëbëishi ꞌianan ka aín kushia usai ꞌinun ꞌimiakëxa.

¹⁷ Diosan ka ꞌë ꞌakinkin naínuxunbi aín mëkënan birukësa okin anua bitima parúmpapa nëbë́tsinua ꞌë ië́miakëxa.

¹⁸ An ka axa ꞌëmi nishkë uni kushiirabu an ꞌati ꞌikëbi ꞌë ië́miakëxa, atun ka ꞌë istisama tankëxa usa ꞌaish ka ꞌësama kushiirabu ꞌiakëxa.

¹⁹ Atux ka ꞌëbë ꞌakanankëxa ꞌëx ꞌaisama ñu inuti tëmërakëbëbi. ꞌAínbi ka Diosan usakin atu ꞌaiabi ꞌë nuibakin ꞌakiankëxa:

²⁰ an ka ꞌë ië́mikin upíokin ꞌakiankëxa; ¡usa ꞌixun ka an ꞌë nuibakëxa!

²¹ Diosan ka ꞌë upíokin ꞌakinkin ꞌitsaira ꞌakianxa ꞌën kana añu kara an iskëx asábi ꞌikë ashi ꞌan. Usa ꞌixun ka unían nun ñu ꞌinankësa usaribi okin ꞌë upíokin ñu ꞌaia ꞌakianxa,

²² ꞌën kana añu ꞌanun kara ꞌë kaia ashi ꞌaxunkin aín bana kuakëmasa ꞌixun ñu ꞌatima ꞌakin aín bana kikësama okin ꞌaxunkinma kana ¡uínsaranbi ꞌën Diosan bana ënkëma ꞌain!

²³ ꞌËn kana kamabi aín bana kuënëokama kikësabiokin ꞌain; ¡usa ꞌain kana uínsaranbi aín bana ꞌati manukin ënkëma ꞌain!

²⁴ ꞌËx kana Diosan kakësa ꞌoíshi ñu ꞌatima ꞌaíma tsóakën; usai ꞌikana ꞌatima ñu ꞌatimi rakuëakën.

²⁵ Diosan ka ꞌë ꞌitsaira ꞌakianxa an kakësokinshi añu kara upí ꞌikë a ꞌaia iskin.

²⁶ Dios mix kamina min kikësabiokin ñu ꞌanan uin kara min kakësabiokin ꞌaia aribi usabi okin ꞌakinin, ꞌimainun kamina uin kara min kakësama okin ꞌaima aribi ꞌásabiokin ꞌakinin,

²⁷ Dios min kamina uin kara këmëi banakinma mix kikësokin ꞌaia ashi ꞌakianan uix kara këmëirai banaia a bëtsiokin nanin.

²⁸ Min kamina axa ꞌakinsa unikama ashi ië́nun ꞌakinin, ꞌaínbi kamina uix kara këruti banaia a unikaman sinan ꞌunánkin ꞌaisama min isin.

²⁹ Dios min kamina ꞌëx upitax tsóti kuëënun ꞌimian; ꞌën ꞌIbu Dios min kamina axa ꞌëmi nishkë unikaman ꞌati ꞌikëbi achúshi tirísa ꞌixun ꞌë bërúankën.

³⁰ Minmi ꞌakinkëxun kana axa ꞌëmi nishkë unikama ꞌakin atun ëmanubi bëbarukin anuan atun ëma bëararakë abi rurupakin amia unë́ti ꞌaíma ꞌitánun ꞌaxun sinánkasmaia atu këñuti ꞌain.

³¹ ꞌËn ꞌIbu Dios min akë kamabi ñux ka upíira ꞌikën; minmi ꞌë ꞌakinkë an ka ꞌë kuëëmia, min kamina uix kara mimi katamëtia a unikama upíokin ꞌakinin suntárunëxa aín manë pará ami katamëkë usaribi ꞌitánun.

³² ¿Uix kara Diosaribi ꞌiti ꞌik? ¿Anu kara Diosaribi bëtsi dios an nu ꞌakinti ꞌik?

³³ Dios ax ka ami ꞌëx katamëkë kushiira a ꞌikën, usa ꞌixun ka an ꞌëx ꞌakánanti ꞌunainra ꞌinun ꞌimiakëxa ax ka ꞌëx upitax tsóti kuëënia,

³⁴ an ka bënëtishi abánun ꞌë kushi ꞌinania achúshi chaxux uni isbiani abákësa usaribiti ꞌinun, ꞌimianan bashi manan anuaxbi uisaibi ꞌiaxma ꞌinun ꞌë ꞌimia,

³⁵ an ka uisai karana ꞌakánanti ꞌai kixun ꞌë ꞌunánmiakëxa, ꞌimainun ka anun axa ꞌëmi nishkë unikama ꞌanux ꞌën kanti xo bëëkai kushiti kushiñu ꞌinun ꞌë ꞌimiakëxa.

³⁶ “Min kamina axa ꞌëmi nishkë unikaman ꞌati ꞌikëbi bërúankin ꞌë ꞌakiankën; usa ꞌixun kamina mix kushiira ꞌixun ꞌë bërúanti ꞌain.

³⁷ Min kamina axa ꞌëmi nishkë unikaman anuxun nuikëx anun abáti bai upí ꞌinun ꞌimiakën, usokin ꞌakinkëxma abatibi rashkikuaianx nipakëtia ka axa ꞌëmi nishkë unikaman bitankëxun ꞌë ꞌakë ꞌitsíanxa.

³⁸ Axa ꞌëmi nishkë unikama abatia nuibianxun kana atu nukuxun ꞌakin këñukin ꞌakën, usokin ꞌakin kana achirabi kuaintanuma ꞌakin këñubëtsini ꞌën ꞌikënubi uakën.

³⁹ ¡Usokin ꞌakin kana axa ꞌëmi nishkë unikama këñukin ꞌakën! ¡Këñuxun kana tukapaxun buküankën, usokëx ka an ꞌë ubiotëkënti uni ꞌaíma ꞌiakëxa: usokin kana ꞌën taën amákësa okinshi kupitanuma ꞌakën!

⁴⁰ Min kamina ꞌakanania ꞌë kushiokën, usokin kamina a unikamaxa ꞌëmi rakuë́nun ꞌimiakën,

⁴¹ ꞌimianan kamina axa ꞌëmi nishkë unikama abámikin ꞌanun ꞌë ꞌamiakën. ꞌAmikëxun kana achirabi nitánuma a unikama këñukin ꞌakën.

⁴² ꞌAkëxun ka uin kara ꞌakinti ꞌikë kixun atun bariakëxa; barikëxunbi ka uínbi ꞌakianma ꞌikën, usokëxun ka an ꞌakinun kixun Dios ñukákankëxa ñukákëxunbi ka ꞌakianma ꞌikën.

⁴³ ¡Usokin kana atu maërakatia me kupúkë tákikësai ꞌia nëtë́tanun ꞌakën, ꞌakin kana atu këñukin unían anun nikin me tëi amákëxa chë́kikë usai ꞌitánun ꞌakën!

⁴⁴ Min kamina ꞌën kaibunëxbia ꞌë ꞌakatsikiax kikëbëtanbi ꞌë ꞌakiankën, min kamina ꞌëx Israel unikaman ꞌapu ꞌianan ꞌën uínsaranbi ꞌunánkëma unikaman ꞌë ñu mëëxunun ꞌamiakën.

⁴⁵ Usa ꞌixun ka bëtsi menu tsókë unikaman ꞌëx atun ꞌapu ꞌixun ꞌakinkëxun añu ꞌanun karana kai usakinbi ꞌakankëxa,

⁴⁶ bëtsi menu tsókë unikamax ka ꞌëbë ꞌakánanti sinaxbi amiribishi rakuë́akëxa, usai ꞌika uinu kara unëaxa anuaxbi chikíküatsini rakuë́tan bamai ꞌëmi katamëti ukankëxa.

⁴⁷ Dios ax ka chuámarua bërámabi ꞌiá ꞌaish, usabi ꞌikën usa ꞌixun ka an ꞌë ꞌakinia, ꞌën Dios ax ka an ꞌë bërúanan asérabi ꞌakinkë a ꞌikën.

⁴⁸ Ax ka Dios axa ꞌëmi nishkë unikama ꞌanun ꞌë ꞌakinkë a ꞌikën, ꞌimainun ka ꞌën raíri ëmakaman ꞌapu ꞌixun atu ꞌakinun ꞌimiakëxa.

⁴⁹ An ka axa ꞌëmi nishkë unikama bana kuakëma akaman ꞌakatsiabi ië́mikin ꞌë ꞌakian a ꞌikën ¡Dios min kamina an bënë́kinshi ꞌakánanti sinánkë unikaman ꞌakatsiabi ꞌë ꞌakiankën!

⁵⁰ Usa ꞌain kana kamabi menu ꞌikë unikaman kuamainun min anë rabi ësai kantati ꞌain.

⁵¹ Min kamina axa ꞌëmi nishkë unikama ꞌitsokin ꞌanun ꞌë ꞌamiakën, minbi ꞌapu ꞌinun ꞌë kaisa ꞌixun; kamina ꞌë nuibakësaribi okin ꞌën rëbúnkikamaribi xënibua ꞌaínbi nuibati ꞌain.”