2 Samuel 2 - Kashibo-Kakataibo Biblia

David Judá menu ꞌitabati ꞌapu ꞌia ñuikë bana

¹ Usai kitankëxun ka Davidtan Dios abë banakin kakëxa: —¿Judá menu ꞌikë ëma achúshinu karana ꞌëx kuantima ꞌain? Kakëxun ka Diosan kakëxa: —Kamina kuanti ꞌai kixun kakëxa. Kixuan kakëxun ka Davidtan ñukákëxa: —¿Uinu karana kuanti ꞌain? Kixun ñukákëxun ka Diosan kakëxa: —Hebrón kakë menu kamina kuanti ꞌain.

² Kixuan Diosan kakëx ka David ꞌain xanu rabë́ buani kuankëxa: Kuankin ka Ahinóam ax ka Jezreel kakë ëmanu ꞌimainun ka Abigail Nabal kakë uni an raënkëa bikë ax Carmel kakë ëma anu tsókë ꞌiakëxa.

³ Usa ꞌain ka kuankin abë tsókë unikama aín aintsikëñunbi buani kuanx Hebrón kakë ëma chukúma anu ꞌiakëxa.

⁴ Anuxun ka Judánu ꞌikë unikaman timë́xun David atun ꞌapuisa ꞌinun kixun anu bëbakë anëakëxa. Anuxun ka uni raíritan David ñuixuankëxa Jabés kakë ëmanu tsókë Galaad menu ꞌikë unikama insa Saúl ñukë mainkanxa kixun,

⁵ kakëxun ka Davidtan anu ꞌikë unikama kamikin ësokia katánun uni xukin kamiakëxa: “Diosan ka mitsu ꞌupiokin nuibakin ꞌakinti ꞌikën, mitsun kamina Saúl ñukë ꞌikë upíokin mainkakën.

⁶ Usa ꞌain ka Diosan mitsu nuibakin ꞌakinti ꞌikën: ꞌAkimainun kana ꞌënribi mitsumi usakin ꞌakë a kupí nuibati ꞌain.

⁷ Usa ꞌain kamina kushi okin sinani nirukanti ꞌain, mitsun ꞌibu Saúl ñukë ꞌain ka Judá menu tsókë unikaman atun ꞌapu ꞌinun ꞌë anëaxa usa ꞌain.”