2 Samuel 19 - Kashibo-Kakataibo Biblia

^1-2 Usaia ꞌapu David aín bëchikë Absalón rëtëkankë ñuikania kuati ka anun a banan ꞌitsaira masá sinani nitë́xëti inia, ka unikaman kuakëxa kuabiani anu rikianxun ka raíri unikaman Joab kakankëxa. Usakin ꞌakë ꞌain ka, a nëtën ꞌakanani kuanxa Absalón ñukë ꞌain, amia nishkë unikama kupitanuma ꞌabëtsini ukëbë kuëënti nëtë ꞌaínbi bamakë a sinani masá nuituti Davidtan suntárukamaxribi nitë́xëakëxa.

³ Usai ꞌikiani kuani ka Davidtan suntárukamax Mahanain ami kikiani kuani atun katë́bëshi kuantankëx ëma ꞌukëmëu atsíankëxa: Atsínkiani kuani ka ꞌakanani rikianxbi axa ami nishkë unikaman kupitanuma ꞌakëx ukësa ꞌinun katë́kë tibu ꞌaish ñuitsima rua kuanx atsínkankëxa.

⁴ Usa ꞌain ka chupan mapuax ꞌaisamaira masá sinani nitë́xëti, uínbi upí sinánmikin kaisama ꞌitánun ꞌapu David munuma banai rarumakëxa: Rarumati ka aín bakë bëchikënën anë ñui kiakëxa. “¡ꞌËn bakë bëchikë, ꞌibu Absalón! ¡ꞌËn bakë bëchikë ꞌibu Absalón!”

⁵ Usaia ꞌia ka Joabnën anua ꞌikë ꞌapun xubunu kuanxun ꞌapu David kakëxa: —Bërí kamina mix ꞌapu ꞌixun kamabi suntárunën kushikama ꞌimainun min unikamaribi axa mimi kuaikësamaira okin katëmian, usokin ꞌakin kamina bërí min bëchikë xanukama ꞌanan bëbukama ꞌimainun min xanukama, ꞌianan an mi ñu mëëxunkë xanukamaribi ië́mian.

⁶ Bërí kamina mix ꞌapu ꞌixunbi min suntárunën kushikama nuibakinma axa mimi nishkë unikama nuibati ꞌai kixun ꞌunánan, bërí ꞌapukama këñunbi kamabi nuibatin, ꞌimainun kamina uikaman kara mi nuibatia atu ꞌatima ꞌain, uikaman kara mi nuibakinma ꞌatimoia atubëribi ꞌakananima nuibananin. Bërí kana ꞌunanin min sinánkëx sapi ka nukamax bamamainun min bëchikë Absalón ax bamatima ꞌiaxa.

⁷ Usa ꞌain kamina bërí ëmánxun upíokin min suntárukama kuëëntanun kati ꞌain, usa ꞌaínbi kana manukimami sinánun Diosan kuamainunbi ꞌapu ꞌikë mi kain, ënë imë́bi ka uisa min unikama achúshibi ënu mi ꞌakini bërútima ꞌikën. Ësakin min kakëma ꞌaia min unikamax kuankëbë kamina bëráma bëná ꞌaíshmi ꞌiásamaira tëmërati ꞌain.

⁸ Ësokian kakëx ka ꞌapu David nirukiani kuantankëx anun ëmanu atsínti xëkuënu tsóbuakëxa. Usai anu tsókë kuabiani kuanx ka anua ꞌapu David tsókë xëkuë a rapasu aín suntárukamax nirakëkankëxa. Usai anu nirakëkin ka kamaxunbi ꞌapu kakankëxa. Usai ꞌimainun ka kamabi Israel suntárukamax atun xubunu abákankë ꞌiakëxa.

David Jerusalénnu kuantëkëan ñuikë bana

⁹ Usa ꞌain ka kamabi ñakánu ꞌikë Israel unikama atux kuëbikanani kikankëxa: “ꞌApu David an ka numi nishkia filisteo unikaman ꞌatimoiabi nu ꞌakinkin ië́miakëxa; usa ꞌaínbi ka Absalónnëxa ami nishkëx ënë menuax chikíakëxa.

¹⁰ Absalón nun ꞌapu ꞌitinu anëkë ax ka ꞌakanankënuax bamaxa. ¿Usa ꞌain karanuna ui kainkin David nun ꞌapun ꞌinun ꞌimitima ꞌain?”

¹¹ Ësai Israel unikama kikankë ënë bana ka ñuikania aín xubunuxunbi Davidtan kuakëxa. Usa ꞌain ka uni sacerdote Sadoc ꞌimainun Abiatar ësokin atu katánun kixun kakëxa: “Mitsun kamina anu kuanxun Judánu ꞌikë unikama aín kushikama abë banakin ñukáti ꞌain, uisa kupí kara ꞌë ꞌapu ꞌimitisa tanibi ꞌitsaira basia kixun kamina atu ñukati ꞌain;

¹² ñukákin kamina ësokinribi kati ꞌain, atux kara ꞌëx atun ꞌapu ꞌiti kuëënia ꞌëx kana atun ꞌaintsi ꞌibu ꞌain kixun kamina atu kati ꞌain.”

¹³ Kanan ka Amasá aribi ësokin katánun kakëxa: “Mix kamina ꞌën ꞌaintsi ꞌIbu ꞌain, usa ꞌaish kamina bërí ꞌën suntárukaman kushi ꞌiti ꞌain, mix ꞌimainun ka Joab ax chikíkë ꞌiti ꞌikë kixun ka kamiakëxa. ꞌËn mi kakësokin ꞌaiama ka Diosan uisakin kara ꞌaisa tania usakin ꞌë ꞌatimoti ꞌikën.”

¹⁴ Ësokin kamikin ka Judánu ꞌikë unikama kuëënia achúshi unin sinánkësa okinshi sinania kuëëntanun kamiakëxa, kamikëx ka kamabi uni asábi ka nun ꞌapu ꞌinux ka aín suntárunën kushikamabëbi uti ꞌikë kixun atúnribi kamiakëxa.

¹⁵ Usakin kamikëx kuanxua kakëx ka ꞌapu amiribishi kuantëkënkin abëa ꞌikë unikamabë kuani Jordán kakë bakanu bëbai kuankëxa. Usai kuanmainun ka Judánu ꞌikë unikama atúxribi Guigal ëma anuxun aia bianan, Jordán kakë baka sikatia ꞌakini kuankankëxa.

¹⁶ Kuankëbë ka Simí Gueránën bakë bëchikë Benjamínën rëbúnki Bahurim anu ꞌikë axribi bënë́kiani Judánu ꞌikë unikama kuankëbë anribi ꞌapu David aia bitsi kuankëxa.

¹⁷ Kuankëbë ka Simí a nuibiani Benjamínën rëbúnki mil uni abë kuankëxa. Kuankëbë ka Sibá an ñu mëëxunkë Saúlnën aintsi axribi aín quince bakë bëchikëkama ꞌimainun an ñu mëëxunkë veinte unikama abë kuankëxa, kuanx ka ꞌapu David uisa ꞌaímabi atux pain Jordán kakë baka ꞌikë anu bëbakëxa,

¹⁸ bëbai ka baka sikakiani Davidtan aintsikama baka sikatia ꞌakini kuankëxa, usakin ꞌax isa abë upí ꞌiti ꞌikë kixun sinánbiani kuankëxa, Kuankëbëa David Jordán kakë baka shitánux ꞌikëbëbi ka a bëtánain ami ñanati ꞌikin,

¹⁹ Simín kakëxa: —ꞌËn kana mi ësokin kain, ꞌë kamina uisabi otima ꞌain, ꞌën kana mi ꞌatima banan kakën an mi ñu mëëxunti uni ꞌixunbi kana a nëtën mi Jerusalénnuax chikíkiani kuankin mi ká bana a kamina sinántima ꞌain. ꞌImainun kamina ꞌë istisama tani ꞌëmi nishtima ꞌain,

²⁰ ꞌënbi kana ꞌatimokin kana usakin ñu ꞌakë kixun ꞌunani, usa ꞌain ka kamabi Josénën rëbúnkikama bërí kana ꞌëx irapain mix ꞌapu ꞌikë aia mi bitsi uan.

²¹ Ësokin kaia kuati ka Abisai Sarvian tuá ax kiakëxa: —¿Uisa ꞌaish kara Simí ax ꞌatimokin ꞌichakin Diosan kaískë ꞌikëbi ꞌapu ká ꞌaish bamakë ꞌitima ꞌik?

²² Kiabi ka Davidtan kakëxa: —¡Ënë ñux ka mitsun isti ñuma ꞌikën, Seruiánën bakë tuákama, ꞌëx kana usakinmi ꞌaisa tankë a kuëëniman! ¿Uisa ꞌixun kaina mitsun ꞌën ꞌakë ñu isti ꞌain? Bërí kana upíokin ꞌunanin ꞌëx kana Israel unikaman ꞌapu ꞌain, usa ꞌain ka israel uni achúshibi bërí nëtën bamatima ꞌikën.

²³ Katankëx ami kikin ka Simí, mi kana asérabi uisabi otima ꞌai kixun kakëxa.

²⁴ Usakin ꞌaxun ka Mefi-bóset kakë uni Saúlnën xuta aribi aia biakëxa. A nëtëan ꞌapu David Jerusalénnuax abati kuankë a nëtëkaman ka nitsibi uisaibi ꞌikëma asábi utëkëni, aín taë chukaima ꞌianan nashimabi ꞌiakëxa, usai ꞌianan ka aín kuëni kuëtërëkianan, ain chupabi chukaxun pañuima David ꞌikë ñu a sinanima ꞌiakëxa.

²⁵ Usa ꞌain ka Jerusalénnuax a bitsi kuankë ꞌapun ñukákëxa: —Mefi-bóset, ¿Uisakatsi kaina ꞌëbë kuankëma ꞌain?

²⁶ Kixuan kakëxun ka unin kakëxa: —ꞌËn ñu mëmikë unin ka ꞌë paránxa. ꞌËx kana ꞌën niti bëtsikë uni ꞌain, usa ꞌixun kana ꞌëa burro achúshi anu ꞌirukiani mibë kuani kuanun ꞌë tëkërëkaxunu kan.

²⁷ ꞌAínbi ka usakin ꞌaxumabi, mi paránkin ꞌëx isana ꞌapu ꞌisatani kixun mi kakëxa. Usa ꞌaínbi kamina mix ꞌapu ꞌaish Diosan ángelsa ꞌixun, uisakin kaina ꞌaisa tani usakin ꞌati ꞌain.

²⁸ ꞌËn aintsi ꞌibukamaxa min ꞌaisa ꞌaínbi kamina atu ꞌakima, an ñu mëëxunkë ënë min xubunuxuinsa pinun kixun kakën. ¿Usa ꞌain karana ꞌën añu ñu mi ñukáti ꞌain?

²⁹ Kakëxun ka ꞌapun kakëxa: —Asabi ka usa ꞌain kamina ꞌitsa banatima ꞌain. ꞌËn kana mi ꞌimainun Sibá bërámabi kan me a kamina bëtsin amoküa bimainun amoküa biti ꞌain kixun.

³⁰ Kakëxunbi ka Mefi-bósetnën kakëxa: —An ka ꞌën xuta Saúlnën me ꞌia a kamabi biti ꞌikën. ꞌAínbi ka ꞌën iskëx mixmi uisaibi ꞌima upí utëkëanx min ꞌapun xubunu amiribishi ꞌapu ꞌitëkëni ukë ax kuni asábi ꞌikën.

³¹ ꞌImainun ka Barzilai Galaadnu tsókë ax Roguelim kakë ëma anuax uxun ꞌapu Jordán kakë baka sikáti ꞌakintankëxun anuxun kuantanun kaxun xuti uaxa.

³² Ax ka kaniakëkë ꞌaish, ochenta baritia ñu ꞌiakëxa, an ka ꞌapu David Mahanaim, kakë ëma anu tsotia kamabi aín piti ꞌakinkin ꞌinánkëxa, usa ꞌaish ka ax ñu ñuira uni ꞌiakëxa.

³³ Usa ꞌain ka ꞌapu Davidtan Barzilai kakëxa: —ꞌËbë kamina Jerusalénnu kuanti ꞌain, anuxun kana ꞌën mi ꞌakianan bërúanti ꞌain.

³⁴ ꞌAínbi ka Barzilainën kakëxa: —ꞌËx kana ꞌitsama baritiashi tsóti ꞌain, usa ꞌain kana mibë Jerusalénnu kuantima ꞌain,

³⁵ ꞌëx kana bërí ochenta baritiañu ꞌain; usa ꞌixun kana pianan xëakin uisa kara ꞌain nëish ꞌikë tanan, kana ax ka nëish ꞌikë kianan ax ka nëishma ꞌikë kisamabi ꞌain; ꞌimainun kana axa kantakë unikama ꞌimainun axa kantakë xanukama kantaia kuaisamabi ꞌain, usa ꞌain kana ꞌë bëruain mix atsantima kupí mibë kuantima ꞌain.

³⁶ Usa ꞌain kana Jordán baka shítatishi mibë kuanti ꞌain, ¿usa ꞌaínbi kaina mix ꞌapu ꞌixun min ñu ꞌinainshikatsi kixun ꞌë kain?

³⁷ Usa ꞌain kana ꞌën mi kain, mix ꞌapu ꞌixun kamina ꞌën ëmanubi ñui kuantanun ꞌë xuti ꞌain, anuax ñuia ka ꞌën papakama anu maían anubi ꞌë mainkanti ꞌikën. ꞌAínbi ka ꞌapu ꞌikë an mi ñu mëëxunti bëtsi uni ënu ꞌikën: ax ka ꞌën bëchikë Quimham ꞌikën, usa ꞌain kamina mix ꞌapu ꞌixun uanxun ꞌë min ꞌaxuansaribi okin mix kuëënkësabi okin ñu min a ꞌaxúnun ꞌamiti ꞌain.

³⁸ Kakëxun ka ꞌapun kakëxa: —ꞌËbë ka Quimham ax kuanti ꞌikën, ꞌën kana minmi ꞌë usakin ꞌaxúnun kakësabiokin a ꞌaxúnti ꞌain. ꞌAxuanan kana a minmi ꞌë ñukákë ñukama a ꞌinánti ꞌain.

³⁹ Usakin kamainun ka kamabi unikama Jordán kakë baka sikarakëakëxa. Sikákëbëtan ka ꞌapun Barzilai kana kuantëkëni kixun kakin achúshi okin bëtsuku kakëxa. Usokin ꞌaxun kuantanun ëbiani ka Barzilai anuaxa ukë ꞌain xubunubi kuantëkëankëxa.

⁴⁰ Kuantamainun ka ꞌapu David Guigal kakë anu Quimham a ꞌimainun Judánu ꞌikë aín suntárukamabë kuani, Israel unikaman suntárukama raíribë kuankëxa.

⁴¹ Kuanxa anu ꞌain ka kamabi Israel unikaman a isi kuanxun ꞌapu kakankëxa: —¿Uisai kara nun aintsi Judánu ꞌikë unikamax ꞌapu ꞌikë mi ꞌibuaxun bërúanan min aintsi ꞌibukamakëñunbi atun suntáru rinbianxun Jordán kakë baka sikatia mi ꞌakini kuankë ax ꞌiti ꞌik?

⁴² Ësokin kaiabi ka Judánu ꞌikë unikama atun Israel unikama kakëxa: —ꞌApux ka nun aintsi ꞌibu ꞌikën. Usa ꞌain ka a kupínnu mitsubë nishananti ñu ꞌaíma ꞌikën. ¿Nukaman karanuna ꞌapun piti bixun pian, ꞌimainun karanuna ꞌain ñu nunan ꞌinun bian?

⁴³ Kia ka Israel unikaman atu kakëxa: —Nukamax kananuna mapai rabë́ ñakánuax ukë a ꞌain. ꞌAínbi kamina mitsux achúshi ñakáratsushi ꞌain, usa ꞌain kananuna nukamax mitsun aintsi ꞌibubi ꞌain. ¿Usa ꞌaínbi karamina mitsux nukamami nishin? ¿Mitsun kaina nukamanu nun ꞌapu ka nunubi utëkënti ꞌikë kiax kikë a sinaniman? Usakian atun kakëxbi ka Judánu ꞌikë unikama atuxira ꞌatimati banai Israel unikama ꞌikësamairai nishi banai kikankëxa.