2 Samuel 17 - Kashibo-Kakataibo Biblia

Ahitofelnën sinánkë bana Husai kakë unin masó ñuikë bana

¹ Usa ꞌain ka Ahitófelnën Absalón kakëxa: —ꞌËn kana bërí doce mil uni timëbianxun atubëtan ënë imë́bi min papa David nuikuanti ꞌain.

² Bërí ka asábi ꞌikën, nibaitia atsánkë ꞌikëishi nukúkin ami ꞌikuainkëx, ratúkin ka abëa kuankë unikaman abákin ashi ënkanti ꞌikën, usakin ëbiania kananuna atu ꞌakima ꞌapu David ashi ꞌati ꞌain,

³ usokin ꞌaxun kananuna kamabi Israel unikamaxa abë kuankë akamabi uisabi okima mi bëxúnti ꞌain, min kamina achúshi unishi ꞌanuxun barin, usokin nun ꞌakëbë ka kamabi unikamax nubë upitax tsóti ꞌikën.

⁴ Ësokian Ahitófelnën atu kakë bana ax ka Absalón ꞌimainun kamabi Israel unibunën kushikaman kuakëx asábi ꞌiakëxa.

⁵ Usa ꞌain ka an kuakëxa a bana asábi ꞌaínbi Absalónnën Husai arquita uni a kamiakëxa, uisa kara Ahitófelnën sinánkë bana ax ꞌikë kixuan anribi kuati unun kixun.

⁶ Usakin kamikëxa Husai anu ukë ka Absalónnën usakia Ahitófelnën sinánkë banakama a ñuixunkin kakëxa: Ñuixuntankëxun ka ñukákëxa. ¿Karanuna an sinánkësokin ꞌati ꞌain, karanuna ꞌatima ꞌain? Kamina mixribi kiti ꞌain.

⁷ Usakian ñukákëxun ka Husainën Absalón kakëxa: —Bëria Ahitófelnën mi sinánxun kakë bana ax ka upíma ꞌikën.

⁸ Minbi kamina upíokin ꞌunan min papa ꞌimainun aín unikama ax ka sinaira unibu ꞌikën, usa ꞌaish sapi ka atun nishkë bukubuisama pain ꞌikën, achúshi xaëón raëkëmaxa aín tuá bikuankëx ꞌikësaira ka bërí aín sinan ꞌiti ꞌikën. Min papa ax ka ꞌakánanti ꞌunainra uni ꞌikën usa ꞌaish sapi ka unin barikëxun ꞌunánx aín suntárukamabë ñantan ꞌima abi ꞌia.

⁹ Bëríbi sapi ka asérabi aín bashi kininu unëaxa, anu ꞌima kara amanu ñachatankëx anuribi ꞌia. Usa ꞌixun ka minmi atu ꞌanun kixun xutiabi min suntárukama, Davidtan kupímashi ꞌati ꞌikën, usokin ꞌakë ka raíri unikaman Davidtan ka min unikama ꞌaxa kixun kuati ꞌikën.

¹⁰ Usa ꞌain ka min suntáru axa ꞌakanantinuax këruirakë unikamaxbi atumi rakuë́ti paru ꞌinúan në́kë usa sinanbu ꞌaíshbi kërutima rakuë́ti abáti ꞌikën; minbi kamina kamabi Israel unikamabëtanbi ꞌunan min papa David ꞌimainun aín unikama ax ka asérabi këruira unibu ꞌikë kixun.

¹¹ Usa ꞌain kamina ësokin mi kamainun kuati kamabi Israel suntárukama axa Dan kakë ëmanu ꞌikë ꞌimainun Beerseba kakë ëmanuaribi timë́këx ka ꞌaisamaira ꞌaish parúmpapa kuëbiküa masi bëru iskësaira ꞌiti ꞌikën, usa ꞌikë kamina minbi a unikama ꞌakanankin buánti ꞌain.

¹² Usakiani kuanxun kananuna min papa aín unikama këñunbi uinu kara ꞌia anuabi nukuxun ꞌati ꞌain. Usokin a ꞌakin kananuna nibitan anu ꞌibúkin mekama chabókësa usakinshi kuaintisama okin bëararaxun achúshirabi kuaimikinma abëa ꞌikë unikama këñunbi a ꞌati ꞌain.

¹³ Anua ꞌikë anu ꞌima bëtsi ëma upíokin bëararakin kënëkë anubi kuankë ꞌain kananuna kamabi Israel suntárukama risi rinbianxun anun ëma bëararakë rurupakin añu ñubi anu bërutanuma kamabi maxáxkama tëkërë kapatankëxun nirinbianxun bakanu puti ꞌain, usokin ꞌakëx ka achúshi maxáxbi ami unë́ti ꞌaíma ꞌain sinánkamaia kananuna min papa ꞌati ꞌain.

¹⁴ Usai kia Absalón ꞌimainun kamabi Israel unikaman kuakëxbi ka Husainën atu sinánmikë ax asábira ꞌiakëxa. Ahitófelnëa atu sinánmikin kakë axa atun kuakëx asábiribi ꞌaínbi. Usai ka Diosan bërámabi Ahitófelnën kakësokin ꞌakantima kupí Davidnëa tëmaishi Absalón ꞌanun.

¹⁵ Usa ꞌain ka Husainën ꞌapun xubu chaiira anuax chikixun sacerdote Sadoc ꞌimainun Abiatar kakëxa, Ahitófelnëa Absalón ꞌimainun Israel unikaman kushibu sinánmikin kaia kana kuan, kuakin kana ꞌënribi sinánmikin atu kan,

¹⁶ usa ꞌain kamina bënëti kuantankëxun David kai kuanti ꞌain, aín unikamabëa anu uni ꞌikëma me anu ënë imë́ ꞌitëkëaxma kuantanun kixun kati ꞌain, Absalónnëma aín suntárukama buani kuanxun anua nukuxun aín unikama këñunbi ꞌaia, bënëtishi kuanxa Jordán kakë baka sikarakëkiani kuanun kamina kai kuanti ꞌain.

¹⁷ Usakin kakëx kuanx ka Jonatán ꞌimainun Ahimaas ax achúshi xëxá En-roguel kakë anu pain unikaman isma Jerusalénnu atsinia isia kixun sinani bërúakëxa, anuxun ka an ñu ꞌaxunkë xanu David kaxuntanun kixun xuakëxa, xukëx kuanxua kakëbëshi atúxribi bënëtishi anu kuanxun ka David bana ñuixuankëxa.

¹⁸ ꞌAínbi ka achúshi tuá bërunanën usai ꞌia kuabianxun Absalón ñuixuankëxa. Ñuixunia ꞌunánbiani ka a rabëtaxbi bënëtishi anuax kuantankëx an ꞌunánkë uni Bahurim ëmanua ꞌikë aín xubunu kuankëxa, kuanx ka anuax achúshi kini xubu rapasu ꞌikë anu unëti atsíankëxa.

¹⁹ Usai ꞌikëbëtan ka uni aín xanun achúshi ñu pará bitankëxun anun kini a mapuakëxa, mapuxun ka akamanan aín trigo bimi barionkëxa. Usokin ꞌakë ka uínbi anu ka uni unëaxa kixun ꞌunániamabi atun ishi ꞌunánkëxa.

²⁰ Usokin ꞌanbi ka Absalónnën xukëx atu nuibiani kuankë suntárukamax anu bëbakin xubu ꞌibun xanu a ñukákëxa: —¿Ënu kara Ahimaas ꞌimainun Jonatán ukëma ꞌik? —Kixuan ñukákëxunbi ka báko kikiani kuania kana isan —kixun xanun kakëxa. Usa ꞌain ka Absalónnën suntárukama barikinbi ꞌakasmabiani amiribishi Jerusalénnu rikiantëkëankëxa.

²¹ Rikian ka Ahimaas ꞌimainun Jonatán anua unëkë kini anuax bënëtishi chikíkiani kuanxun ꞌapu David kakëxa; ënuax bënëtishi min unikamabë kuantankëx kamina Jordán baka sikarakëti kuanti ꞌain, Ahitófelnën ka mi isa ꞌaxun rakanun kixun Absalón ꞌësëaxa.

²² Usakian kakëx ka David abëa kuankë unikamabëbi kuantankëx bënëtishi a imë́bi Jordán baka sikarakëakëxa. Usai ꞌian ka a pëkarakëbë ax baka sikarakëti uni ꞌaíma ꞌiakëxa.

²³ Usa ꞌain ka Ahitófelnëx an kakësa okían Absalónnën ꞌakëma ꞌain, aín burro bibiani anua tsókë ëma anu ꞌikë aín xubunu kuankëxa kuanx ka anuax aín aintsikamabë banakin uisai kara atux ꞌiti ꞌikë kixun kakëxa, usakin katankëx sënë́anx abi tëtsëkiax. Ñukë ka anua aín papa ñukë maínkan me anubi maínkankëxa.

David Mahanaim kakë ëmanuax ꞌia ñuikë bana

²⁴ Absalón Israel unikamabë nuibiani kuani, Jordán baka sikarakëmainun ka David aín unikamabë kuantakëx achúshi ëma upiokin bëararakin kënëkë Mahanaim anu bëbakëxa.

²⁵ Absalónnën ka Amasá axa suntárukaman kushi ꞌinun anëkë ꞌiakëxa, Joab kakë uni a chikíanan. Amasá ax ka achúshi ismaelita uni Itrá aín bakë bëchikë ꞌiakëxa, ax ka Abigail Joab aín titan xukën abë birakakë ꞌiakëxa, Abigail ax ka Nahasnën xanu tuá ꞌimainun Seruiánën chirabakë xanu ꞌiakëxa.

²⁶ Usa ꞌain ka kuantankëx Absalón aín suntárukamabë Galaad kakë me anu pain ꞌiakëxa,

²⁷ usaía David atun ëma Mahanain kakë anu bëbakë ka, Sobí kakë uni Nahasnën bakë bëchikë axa Amón kakë menua ꞌikë ëma Rabá anu tsókë uni an pain David kuëënkin biakëxa; bitsia ka Amielnën bakë bëchikë Maquir Lodebar kakë ëmanua ꞌikë anribi biakëxa; bitsia ka Bazilai kakë uni axa Galaad menua ꞌikë ëma Roguelim anu ꞌikë uni akamabëtan David biakëxa.

²⁸ Bitankëxun ka anua nukúkë David anúan ꞌuxi rakúti chupa ꞌinánan anun mëchukati ꞌumpax anu nanti a ꞌinánan kënti me ꞌakë kama a ꞌinánan trigo bimi cebada harina putuakë ꞌimainun ñu bëru tutush okë uvas ëskakë a ꞌimainun purutusa ñu bimi akamaribi ꞌinánkankëxa,

²⁹ ꞌinánan ka buna rëpa vaca xuma sëruakin ꞌanan, ë́skakin oveja xuma ꞌakë akama abëa kuankë unikamabëtan pinun kixun ꞌinánkëxa; usakin ka anu uni ꞌikëma menuax ai ka panani ꞌitsaira nitsi atsanxa kixun sinánkin ꞌakëxa.