2 Samuel 16 - Kashibo-Kakataibo Biblia

David Sibá kakë unibë bana ñuikë bana

¹ Kuania David ꞌain bashi inubiani urira kikiankëbë ka Sibá kakë uni an Mefi-bóset ñu mëëxunkë uni ax abë mëranani kuankëxa. Kuankin ka burro rabë́ doscientos pán ꞌimainun cien pán ꞌakësokin chookin uvas bimi ëskakë akëñun cien ñu bimi ꞌaímai pëkë́kë aín unikaman bërí bikë akëñun achúshi ñuina xakánu ꞌarukë uvas baka aribi buánkëxa.

² Buania mërakin ka ꞌapun ñukákëxa: —¿Uisoti kara minmi bëkë ñukama ënëx ꞌik? Kixun ñukákëxun ka Sibánën kakëxa: —Burrokama ënëx ka anúan ꞌapu min xanu min bakë bëchikëkamax kuanti ꞌikën; ꞌianan ka pán ꞌimainun ñu bimi pëkë́këkama ënëx ka min suntárukaman piti ꞌikë, ꞌimainun ka ñuina xakánu bëkë uvas baka ënëx uix kara anu uni ꞌikëma menuax shimaia an xëati bëkë ꞌikën.

³ —¿Uinu kara Saúlnën xuta ax bërúax? —Kixun ka ꞌapun ñukákëxa. —Ñukákëxun ka ax ka Jerusalénnu bëruaxa —kixun Sibánën kakëxa—, an ka Israel unikaman ꞌain xuta Saúl ꞌasa okin ꞌapu ꞌimitisa sinánkëxa.

⁴ —Asabi ka —kixun ka ꞌapun kakëxa—, usa ꞌain kana an usakin sinánkëbëtan mi Mefi-bóset aín me ꞌia kamabi mi ꞌinánti ꞌain. —¡Usa ꞌain kana bërími ꞌakësokinbi ꞌë ꞌapu ꞌixun ꞌakinti kuëënin! —kixun kai ka Sibá ami ñanati ꞌapumi ꞌiakëxa.

⁵ Usa ꞌain ka ꞌapu Bahurim kakë ëma anu bëbakëxa, bëbakëbi ka anuax Saúlnën aintsi achúshi chikíakëxa. Ax ka Guerar kakë unin bakë bëchikë Simí kakin anëkë ꞌiakëxa, an ka kuania ami nishkin ꞌichakin,

⁶ maxá ami pukin David ꞌimainun ꞌain suntárunën kushikama ꞌakëxa, abë kuankë unikama ꞌimainun an bërúankë suntárukamabë kuaniabi ka,

⁷ Simí kakë an ꞌatimokin ꞌichakin kakëxa: —¡Ënuax kamina ꞌura kuanti ꞌain, mix kamina an uni ꞌakë ꞌaish ꞌatima uni ꞌain!

⁸ ¡Diosan ka mi tëmëramiti ꞌikën, min kamina Saúl ꞌimainun aín bëchikë bëbukama a chikimainun mixira ꞌapu ꞌikatsi kixun ax ꞌapu ꞌikëbi atu rëtëakën! ¡Usa ꞌain ka Diosan min bakë bëchikë Absalón mix chikimainun ax ꞌapu ꞌinun ꞌimiti ꞌikën, min uni ꞌakë kupínbi kamina usai ꞌin, usa ꞌaish kamina mix an uni ꞌakë ꞌain!

⁹ Ësai kikëbëtan ka Abisai Seruiánën tuá an ꞌapu kakëxa: —¿Uisati kara uni ñuumaratsunën mix ꞌapu ꞌikëbi usakin mi kain? ¡ꞌËn bëríbi tëbískatanun kamina ꞌë kati ꞌain!

¹⁰ Kakëxunbi ka ꞌapun kakëxa: —Ënëx ka mitsun isti ñuma ꞌikën, ꞌëx kana mitsun usakin ꞌaisa tankë a kuëëniman kixun ka Seruiánën tuá a kakëxa. An ꞌë ꞌatimokin sinánkin ꞌichákë ax ka Diosan usakin ꞌanun ꞌamikëxun ꞌë ꞌakë ꞌikën. Usa ꞌain kara, ¿Uin kara usakin ꞌaxuma ka ꞌat kixun kati ꞌik?

¹¹ Kai ami kikin ka Abisai ꞌimainun aín suntárunën kushikama kakëxa: —ꞌËn bëchikënënbi ka ꞌë ꞌaisatania, ¡Usa ꞌain kara Benjamínën aintsikaman ax bëtsi unikama ꞌixun ꞌë ꞌaisaira tanima ꞌiti ꞌik! ¡ꞌËa ꞌatimokin sinánxunia kamina uisabi otima ꞌain, Diosanbi sapi ka usakin ꞌë ꞌanun sinánmiaxa!

¹² Usa ꞌain ka Diosan tëmërakin ꞌatimokin sinania okin ꞌë upíokin sinánxunti ꞌikën, usa ꞌaínbi kana bërí ꞌatimokin ñuikin ꞌë ꞌichákëxun kuatin.

¹³ Kikiani ka David ꞌimainun abë kuankë unikama kuankëxa, kuanmainun ka Simí aín bashi tanarati kuankin ka David ꞌatimai banakin ꞌichábiani kuankin ami maxá pukin meribi kupútanun ami puakëxa.

¹⁴ Pukían ꞌakëx kuanx ka ꞌapu ꞌimainun abëa kuankë unikama Jordán kakë baka kuëbí bëbakëxa, bëbax ka ꞌaisamaira kuanbaiti atsánkë ꞌaish anu tanti bukubukankëxa.

Absalón Jerusalénnu atsían ñuikë bana

¹⁵ Usai ꞌimainun ka Absalón Jerusalénnu atsíankëxa, abëa nikë Israel unikama raíri ꞌimainun Ahitófel kakë uni abë.

¹⁶ Atsínkëbë ka arquita uni Husai Davidtan ꞌunánkë ax munuma banakiani Absalón abë mëranani kushin banai kiakëxa: —¡Nukamax kananuna ꞌaxa nun ꞌapu ꞌiti kuëënin ax ka ꞌapu ꞌiti ꞌikën!

¹⁷ Ësai kia ka Absalónnën ñukákëxa: —¿Uisakin kaina min ꞌunánkë uni nuibakin rabikin kain? ¿Uisati kaina abë kuankëma ꞌain?

¹⁸ Kakëxun ka —Abë kana kuanima —kixun Husainën kakëxa—, ꞌËx kana kuanima mix kamina Diosan Israel unikaman ꞌapu ꞌiti kaískë a ꞌain, mibëbi kana ꞌëx bërúti ꞌain kixun ka kakëxa.

¹⁹ ꞌImainun kana, uinu ꞌikë uni karana ñu mëëxunin ax ka ꞌën ꞌunánkë unin bëchikë bakë ꞌiti ꞌikën. Usa ꞌain kana mixmi ꞌapu ꞌikë min papa ꞌaxuansaribi okin mi ñu mëëxunti ꞌain.

²⁰ Usa ꞌain ka Absalónnën Ahitófel ñukákëxa: —¿Añu ꞌanun kaina mikaman nukama kati ꞌain?

²¹ Kakëxun ka Ahitófelnën Absalón kakëxa: —Min papa an ñu ꞌaxunkë xanu kamabë kamina aín nami ꞌai abë ꞌi ꞌuxti ꞌain, an ka anua ꞌikë ꞌapun xubu bërúanxunun atu ëbianxa. Usaími ꞌikë ka kamabi Israel unikaman kuati ꞌikën, min kamina min papa nishmikin usakin ñu ꞌa kixun, usa ꞌain ka an mi nuikë unikama an kuati kuëënti ꞌikën.

²² Usakian kan ka aín unikaman chupa xubusa okin ꞌakë a xubu manámi anu Absalón pëninxuankëxa, usokin ꞌaxunkëx ka Absalón aín papa an ñu ꞌaxunkë xanukama abë ꞌuxkin ꞌain nami ꞌakëxa. Usakin ꞌakë ka kamabi Israel unikaman kuakëxa;

²³ a nëtëkaman ka Ahitófelnën bana ñukákë ax Diosbë banakësa ꞌiakëxa. Ahitófel a pain ka David ꞌimainun Absalónnën añu kara ꞌaisatania a ꞌanuxun ñukákëxa.