2 Samuel 14 - Kashibo-Kakataibo Biblia

Joabnën ꞌapu Davidtan aín bakë bëchikë Absalón ꞌitsa sinania ꞌunan ñuikë bana

²¹ Usa ꞌain ka ꞌapun ꞌitsa baritia inúkëbëtan Joab achúshi nëtën kuënxun kakëxa: —ꞌËn kana bëráma ꞌikë ñukama mënion, usa ꞌain kamina anu kuanxun ꞌën bëchikë Absalón na utëkënun kai kuanti ꞌain,

²² Usokian kakëx ka Joab aín bëmánanën me tikai tsóbukin ka upíokin sinánxunkin ꞌapu kakëxa: —Bërí kana ꞌën bërúnbi mi isin, asérabi kamina min ꞌë nuibakin ꞌën mi ñukákësabi okin ꞌai kixun.

²³ Usakin kakëxëshi nirukiani ka Joab Guesur kakë anua Absalón Jerusalénnua kuanun kai kuankëxa.

²⁴ ꞌAínbi ka ꞌapux kiakëxa, aín xubunu ka ënu aíma kuanti ꞌikën, usai kikëbë ka anu kuanma ꞌikën; usai kikëbë ka Absalón aín xubunu kuankëxa, ꞌapu isi kuanima.

²⁵ Kamabi Israel me kamanu ka Absalón iskësaribi uni aín upíira ꞌaíma ꞌiakëxa, ꞌimainun ka kamabi unin ax ka raíri unikamasamaira ꞌikë kixun rabikë ꞌaíma uni ꞌiakëxa. Usa ꞌaish ka aín taënuaxbi aín maxkánu sënën uisaibi ꞌikëma aín bëmánan axbi upíira upí ꞌiakëxa.

²⁶ Usa uni ꞌikë ka baritia këñukëtibi aín bu chaxkë́ti ꞌiëkin masámikëxun tëamiakëxa, usokin tëakëx ka aín bux ꞌapun tupumikëx rabë́ kilo inúkë ꞌiakëxa.

²⁷ Absalón ax ka achúshi ꞌimainun rabë́ bakë bëchikë bëbuñu ꞌiakëxa, ꞌimainun ka aín ꞌini bëchikë xanu achúshi ñuribi ꞌiakëxa, aín anëx ka Tamar kakë ꞌaish aín upíira xanu ꞌiakëxa.

²⁸ Rabë́ baritia ꞌimi Jerusalénnu tsókinbi ka Absalónnën aín papa ꞌisama ꞌikën,

²⁹ usa ꞌixun ka Absalónnën ꞌapu isa isuntanun kixun Joab kakëxa; kakëxbi ka Joab kuaisama tankëxa. Usai kuainsama tankë ka amiribishi Absalónnën kuantanun kixun katëkëankëxa, kakëxbi ka kuanma ꞌikën.

³⁰ Usai ꞌikëbëtan ka Absalónnën aín uni kakëxa: —Ka kuat, Joabnën ka ꞌën kakësokin ꞌaisama tania, usa ꞌain kamina aín naë ka ꞌën naë rapasubi anua cebada ꞌapákë ꞌikën; ¡usa ꞌain kamina anu kuantankëxun xarátanun tsi bimi kuanti ꞌain! Usokin Absalónnën kakëx kuanxun ka aín unin Joabnën cebada ꞌapákë mënútanun tsin bimiakëxa,

³¹ usakian aín ñu ꞌapákë ꞌamikë ka Joabnën kuakëxa; kuabiani ka bënëtishi aín xubunu kuanxun Absalón ñukákëxa: —¿Uisokin sinánxun kara min unikaman ꞌën ñu ꞌapákë xarátanun tsin bimi bëtsianx?

³² Kixuan kakëxun ka Absalónnën kakëxa: —ꞌËn kana ësokinmi ꞌë ñuikin ꞌapu kaxuntanun kixun kanuxun mi kamian, uisa kupín kara istisama tankinbi ꞌë Guesur ëmanuax unun kixun kamiaxa; usa ꞌain kana anubi tsóti bërúti ꞌian. ꞌËx kana abë banatisa tanin, an iskëx ꞌaisama uni ꞌikë ka ꞌë ꞌatankëxun rakanti ꞌikën.

³³ Usakian kakëx ka Joab anu kuanxun ꞌapu Absalónnën usakian a ñuikin kanun kakë bana ñuikin kakëxa, kakëxun ka ꞌapun anua kuanun kixun kamiakëxa, kamikëx kuani ka, Absalón ꞌapu ꞌikë a ꞌurama ꞌoíshi aín bëmánanën me tikai tsóbuakëxa. Usai ꞌia ka ꞌapun bëtsuku kakin ꞌikúkin biakëxa.