2 Samuel 12 - Kashibo-Kakataibo Biblia

Natánën ñu ꞌaisama ꞌakë ñuikin David ka ñuikë bana

¹ Nukën ꞌIbun ka an ꞌain bana uni ñuixunkë Natán David istánun xuakëxa. Kuanx bëbaxun ka ësakin kakëxa: —Achúshi ëmanu ka rabë́ uni ꞌiakëxa. Achúshinëxa ñuñuira ꞌimainun ka bëtsix ñuñuma uni ꞌiakëxa.

² Ñuñuira uni an ka ꞌitsaira carneroñu ꞌianan vaca ꞌarakakëñu ꞌiakëxa,

³ ꞌaínbi ka uni ñuñuma an oveja ꞌitsama achúshiira maruxun ꞌarakakë ꞌiakëxa. Usakin ꞌarakakëxa kania ka carnero tuára a abëbi ꞌinun ꞌikikin aín bakë bëchikëkamabëbia ꞌinun bërúankëxa; bërúanan ka aín pikë ñubi pimikin, anúan xëakë ñumibi xëamikin aín ꞌuxti anubi ꞌuxmiakëxa. ¡Usakin ꞌakin ka a unin aín ini bëchikë achushira ꞌakësaribi okin kuëëankëxa!

⁴ Kuëënkian kaniokëbëbi ka achúshi nëtën ꞌura kuani nikë uni ñuñuira uni a isi kuanx anu bëbakëxa; bëbakë ꞌaínbi ka ñuñuira uni an aín carnero ꞌaisamatankin aín vacabi rëxun a uni pikinsama tankin, ñuñuma uni carnero bakë bixun rëxun piti ꞌaxun a isia kuankë uni pikiankëxa.

⁵ Ësakian unin ꞌakë a ñuixunkëxun a bana kuakin ka an usakin ꞌakë uni a sinani aín nuitu xuama tani nishkin Davidnën Natán kakëxa: —¡Min manukinma ꞌën kakë bana sinanatëkëntima okin Diosan ismainun mi kain a unix ka bamakë ꞌiti ꞌikën!

⁶ ¡Usa ꞌain ka an usakin aín carnero tuá ꞌakë an ñuñuma uni a rabë́ ꞌimainun rabë́ribi okin kupíoti ꞌikën, sinan ñumasa ꞌixun ka a nuibati sinánkima usakin ꞌaxa!

⁷ Ësokin kakëxun ka Natánën kakëxa: —¡Mix kamina a uni ꞌain! Ësai ka Israel unibunën Dios ax mi ñui, kiáxa: ꞌËn kana a Israel unibunën ꞌapu ꞌinun mi kaisakën: ꞌImainun kana Saúlnën ꞌati ꞌikëbi bërúankin ꞌakiankën;

⁸ mi kana anu ꞌapu ꞌikë xubu ꞌinánan ꞌapun xanu akamaribi min xanu ꞌinun mi ꞌinan, mixmi Israel unibu ꞌimainun Judánën ꞌapu inun mi ꞌimian. Usa ꞌixun kana a ñukamaxa chamara ꞌaínbi, ꞌitsaira ñu ꞌën mi ꞌinánkë ꞌitsían kiax ka kiakëxa.

⁹ ¿Uisa ꞌixun kaina ꞌën kakësabiokin ꞌakinma ꞌën kuëënkëma ñu ꞌan? Min kamina hitita uni Urías a amonita suntárukama këmëxun ꞌamiakën, ꞌaxun kamina aín xanu ꞌikëbi min xanu ꞌinun biakën.

¹⁰ Usa ꞌixun kamina min ꞌën kakëxunbi ꞌën bana kuaisama tankin hitita uni Urías ꞌamixun aín xanu min xanu ꞌiti bian, usa ꞌain ka uínsarabi mix ñukëma pain ꞌain min bakë bëchikëkama atuxi ꞌatimati bukui upitax tsótima ꞌikën.

¹¹ Ësai kana ꞌëx Dios ira ꞌaish kin: ꞌËnbi kana min aintsi ꞌibunbia ꞌaisamaira okin masókin mi tëmëraminun ꞌamiti ꞌain, ꞌimainun kana min aintsi ꞌibunbia min xanu mi ëmikin binun ꞌamiti ꞌain ꞌanan kana, ëma xabanuxunbi aín nami ꞌanun ꞌinánti ꞌain usai ꞌiaka bëtsi menu tsókë unikaman kuati ꞌikën.

¹² Min kamina kanankinma unëxun ñu ꞌakën, ꞌaínbi kana ꞌën unëxun ꞌakima kamabi Israel unibunën ismainunbi, nëtë xabanuxunbi ꞌain kiax ka Dios kiaxa kixun ka kakëxa.

¹³ Ësakian Dios kikë bana ñuikin kakëxun ka. Aín ꞌuchakë ñuixunkin Davidtan Natán kakëxa: —Asérabi kana ꞌëx Diosmi ꞌuchan. Kakëxun ka Natánën amiribishi katëkëankëxa: Diosan ka ꞌuchakë ꞌikëbi ꞌatimonan tëmëramikin mi bamamitima ꞌikën.

¹⁴ ꞌAínbi kamina minbi ꞌaisamaira oí ami kuaikin Diosan kakëxun kuaisama tankin aín bana parëkin an kuëënkëma ñu ꞌan, usa ꞌain ka min bakë bëchikë bërí náchikikë ax chamara ꞌaíshbi ñuti ꞌikën.

¹⁵ Ësakin kabiania Natán anua ꞌikë aín xubunu kuan ka, Diosanbi Davidnën bakë bëchikë Uríasnën xanumia bëchikë a ꞌaisamaira okin kushiira ꞌinsínmiakëxa.

¹⁶ Usai ꞌikëbë ka David aín bakë bëchikë chamara anun rabanan Diosbë banakin añubi piama ꞌikën. ꞌImainun ka a imë́kama usai Diosbë banai anua ꞌuxkë anu ꞌuxima men ꞌuxnë́akëxa.

¹⁷ Usai ꞌia ka anu rikianxun ꞌapu anu ꞌikë xubunua abë ꞌikë aín kushikaman menuira rakama kamina niruti ꞌai kixun kakëxbi ka nirutisama tankëxa, usai ꞌikin ka atun bana parëakëxa. ꞌImainun ka atubëtanbi usai ꞌikin piama ꞌikën.

¹⁸ Usaia ꞌian ka mapai achúshi ꞌimainun rabë́ nëtë ꞌikëbë aín bakë bëchikë ñukë, ꞌain ka Davidtan suntárunën ꞌapukaman ësokin sinánkëxa: “Aín bakë bëchikë ñukëma ꞌaínbi ka nukaman kakëxunbi nun bana parëaxa, ¿Usa ꞌain karanuna bërí aín bakë bëchikë ñukë ꞌain uisakin anu kuanxun kati ꞌain? ¡Anu kuanxun nun kakëxunbi sapi ka nishkin uisakin kara ꞌaisatania usakin nu ꞌati ꞌikën!”

¹⁹ Usai kanania aín suntárunën kushikaman atúnbi aín bakë bëchikë ñukë unë́xun ñuia kuakin ꞌunánkin ka Davidnën. Ñukákin kakëxa: —¿ꞌËn bëchikë kara ñuax? —Kixun ñukákëxun —atun ka ñuaxa kixun kakëxa.

²⁰ Usakian kakëx ratuti ka anua rakákë menuax, nirutankëx nashixun aín chupa pañutankëx David ro sanuira anun ꞌiakëxa, usai ro sanuiran ꞌitankëx ka anua abë banati ꞌakë xubunu Dios rabi atsíankëxa. Atsíanx anuax chikíkiani aín xubunu kuanxun ka anuxun, pananxun piti an ñu ꞌaxunkëkama ñukákëxa, ñukákëxuan ꞌinánkëxun ka piti piakëxa.

²¹ Usakian ꞌaia ka aín suntárunën kushikaman ñukákin kakëxa: —¿Uisa ꞌixun kaina mix nun ꞌapu ꞌixunbi usakin ꞌain? Min bakë bëchikë ñukëma ꞌain kamina, mix ꞌapu ꞌaínbi samáti anun rabanan ꞌianan usaibu ꞌikëma ꞌain; bërí ka min bakë bëchikë ñukë ꞌikën. ¡Usa ꞌain kamina mix nun ꞌapu ꞌaíshbi bëríra pi nirua!

²² Kixuan kakëxun ka Davidnën kakëxa: —ꞌËn kana ꞌën bakë bëchikë ñukëma ꞌaínbi pima samáti ꞌian, ꞌën sinánkëx ka ꞌiaxa Diosanbia ꞌë nuibakin ꞌëbëbia ꞌinun ꞌë pëxkuxuinsa kana sinan.

²³ ꞌAínbi ka ꞌën bakë bëchikë bërí ñukë ꞌikën. ¿Añunën rabanan karana ꞌëx axa tsókëbëtama pima samáti ꞌain? ¡ꞌËx kana ñukiani ꞌën rara itsi aín rara itsibë biranani kuanti ꞌain, ꞌaínbi ka ax ꞌëbë biranantima ꞌikën!

Salomón bakë́an ñuikë bana

²⁴ Usaia ꞌikë ꞌain ka David aín xanu Betsabé, nitë́xëti masá nuitukë a upíokin sinánmikin nitë́xëaxma ꞌinun kixun kakëxa. Ësakin kax abë ꞌikian aín nami ꞌakëx tutankëx ka achúshi bëbu tuá bakë́ankëxa, bakënkë ꞌikë ka Davidnën Salomón kakin anëakëxa. Usakin anëkë ꞌikë ka Diosan a tuára nuibakëxa,

²⁵ ꞌimainun ka usakin bërúankëbëtan an uni ꞌain bana ñuixunkë Natánën Nukën ꞌIbun ka ënë tuá bërúaia kixun David kakëxa. Usakin kakëxun ka Diosan ka ënë tuá bërúaia kixun ꞌunánkin Jedidías kakin Davidtan anëakëxa. “Ënë banax ka Diosan ka a nuibatia ki kikë bana ꞌikën.”